ବିଶୋଇ,୧୭ା୬(ଡି.ଏନ୍.ଏ.): ରାଇରଙ୍ଗପୁର ବନଖଣ୍ଡ ଅନ୍ତର୍ଗତ ମଣଦା ବନାଞ୍ଚଳ ଅନ୍ତର୍ଗତ ସ୍ଥାନୀୟ ଦେଓପଟା ବିଟ ଅଧୀନ ଦେଓପଟା ଗ୍ରାମରେ ଗୁରୁବାର ରାତିରେ ଏକ ଅଭାବନୀୟ ଘଟଣା ଘଟିଛି। ଏକ ମାଈ ହାତୀ ଉକ୍ତ ଗ୍ରାମକୁ ପଣସ ଖାଇବାକୁ ଆସିଥିବାବେଳେ ଗ୍ରାମର ଜଣେ ବ୍ୟକ୍ତିଙ୍କ ସହ ମୁହାଁମୁହିଁ ହୋଇଥିଲା। ପରେ ଘର ନିକଟରୁ ୫୦ ମିଟର ଦୂରତାକୁ ଘୋଷାଡ଼ି ନେଇ ଦଳିଦେଇଛି। ଫଳରେ ତାଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ମୃତକ ଜଣଙ୍କ ହେଲେ ଦେଇପଟା ଗ୍ରାମର ରତନ ସୋରେନ (୫୭)।
ସୂଚନାଥାଉକି, ରତନ ଗତକାଲି ରାତିରେ ଶୌଚ ହେବା ପାଇଁ ବାହାରକୁ ଯାଉଥିବା ସମୟରେ ନିଜ ଘରକୁ ଲାଗି ରହିଥିବା ପଣସ ଗଛରେ ପଣସ ଖାଉଥିବାର ଏକ ହାତୀ ସହିତ ମୁହାଁମୁହିଁ ହୋଇଯାଇଥିଲେ। ହାତୀଟି ରତନଙ୍କୁ ଘୋଷାଡ଼ି ନେଇ ତାଙ୍କ ମୁଣ୍ଡ ଓ ଛାତିରେ ଆକ୍ରମଣ କରିଥିଲା। ହାତୀ ଓ ରତନଙ୍କ ଚିତ୍କାର ଶୁଣି ପରିବାର ଲୋକେ ଘଟଣାସ୍ଥଳରେ ପହଞ୍ଚିଲା ବେଳକୁ ହାତୀ ସ୍ଥାନ ଛାଡ଼ି ପଳାଇଯିବାର ଲୋକେ ଦେଖିଥିଲେ। ପରେ ଗ୍ରାମବାସୀ ରତନଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରି ୧୦୮ ଆମ୍ବୁଲାନ୍ସ ଯୋଗେ ରାଇରଙ୍ଗପୁର ଉପଖଣ୍ଡ ଚିକିତ୍ସାଳୟକୁ ପଠାଇଥିଲେ। ମାତ୍ର ସେଠାରେ ଡାକ୍ତର ରତନଙ୍କୁ ମୃତ ଘୋଷଣା କରିଥିଲେ। ଏହି ବିଷୟରେ ଖବର ପାଇ ଆଜି ସକାଳୁ ମଣଦା ରେଞ୍ଜର ଧରିତ୍ରୀ ମୁର୍ମୁଙ୍କ ନେତୃତ୍ୱରେ ବନବିଭାଗ ଟିମ୍ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି। ଏଥିସହିତ ଜିଲା ପରିଷଦ ସଦସ୍ୟା ବିନ୍ଦୁସ୍ମିତା ଦେଓ, ଖଡ଼ମବେଡା ସରପଞ୍ଚ ସୋମବାରୀ ସିଂ,ପଞ୍ଚାୟତ ସମିତି ସଦସ୍ୟା ବାସନ୍ତୀ ହାଁସଦା,ସମାଜସେବୀ ସୁରାଇ ହାଁସଦା, ଦିଲ୍ଲୀପ ସିଂ ପ୍ରମୁଖ ପହଞ୍ଚି ପରିବାର ଲୋକଙ୍କୁ ସମବେଦନା ଜଣାଇବା ସହିତ ମୃତ ରତନଙ୍କ ଅନ୍ତିମ କ୍ରିୟା ପାଇଁ ପରିବାର ଲୋକଙ୍କୁ ଯଥାଶୀଘ୍ର ଆର୍ଥିକ ସହାୟତା ଯୋଗାଇବା ପାଇଁ ବନବିଭାଗ ସହିତ ଆଲୋଚନା କରିଛନ୍ତି।
