ଚିତ୍ରଡ଼ା,୧୦।୪(ଡି.ଏନ.ଏ.)- ପ୍ରଶାସନିକ ଅବହେଳା କାରଣରୁ ମୟୂରଭଞ୍ଜ ଜିଲା ମୋରଡ଼ା ବ୍ଲକ ଅଧୀନ ଚିତ୍ରଡ଼ା ଗ୍ରାମର ବୃଦ୍ଧ ଦମ୍ପତି ପ୍ରସାଦ ବେହେରା ଓ ତାଙ୍କ ସ୍ତ୍ରୀ ଭଙ୍ଗାକୁଡ଼ିଆରେ ଦୟନୀୟ ଅବସ୍ଥାରେ କାଳାତିପାତ କରୁଛନ୍ତି। ଗରିବ ଲୋକଙ୍କ ପାଇଁ ପ୍ରଧାନମନ୍ତ୍ରୀ ଆବାସ ଓ ବିଜୁ ପକ୍କା ଘର ଭଳି ଯୋଜନା ରହିଥିଲେ ମଧ୍ୟ ଏଥିରୁ ସେମାନେ ବଞ୍ଚିତ ହୋଇଛନ୍ତି। ଫନୀ ଝଡ଼ବାତ୍ୟାରେ ତାଙ୍କ ଟାଇଲି ଛପର ଘରଟି ଭାଙ୍ଗିରୁଜି ଯାଇଥିବା ବେଳେ ଅଦ୍ୟାବଧି ତାଙ୍କୁ ଘର ଖଣ୍ଡିଏ ମିଳି ପାରିନାହିଁ। ଘରଭଙ୍ଗା ସହାୟତା ପାଇଁ ତଦନ୍ତ ହୋଇଥିଲେ ମଧ୍ୟ ତାଙ୍କୁ ସହାୟତା ମିଳିନାହିଁ। ଘର ଖଣ୍ଡେ ପାଇଁ ପଞ୍ଚାୟତଠାରୁ ବ୍ଲକ କାର୍ଯ୍ୟାଳୟ ପର୍ଯ୍ୟନ୍ତ ଦୌଡ଼ି ଦୌଡ଼ି ନୟାନ୍ତ ହୋଇ ପଡ଼ିଥିଲେ ମଧ୍ୟ ତାଙ୍କ ଗୁହାରି କେହି ଶୁଣୁ ନ ଥିବା ଏହି ଦମ୍ପତି ଅଭିଯୋଗ କରିଛନ୍ତି।
ପ୍ରସାଦ ପେଶାରେ ଚେରମୂଳି ବିକ୍ରି କରିଥାନ୍ତି। ୨୦୧୯ ଫନି ବାତ୍ୟାରେ ତାଙ୍କ ଟାଇଲି ଛପର ମାଟି ଘରଟିି ସମ୍ପୂର୍ଣ୍ଣ ଭାଙ୍ଗି ଯାଇଥିଲା। ସ୍ଥାନୀୟ ରାଜସ୍ବ ନୀରିକ୍ଷକ ଏବଂ ସରପଞ୍ଚ ତଦନ୍ତ କରିବାକୁ ଆସି ତାଙ୍କୁ ଘର ମିଳିବ ବୋଲି ପ୍ରତିଶ୍ରୁତି ଦେବା ସହ ଖଣ୍ଡେ ପଲିଥିନ ଦେଇ ଚାଲି ଯାଇଥିଲେ। ଭଙ୍ଗା ଘରେ ପଲିଥିନ ତଳେ କିଛିଦିନ ରହିବା ପରେ ପଲିଥିନ ନଷ୍ଟ ହୋଇ ଯାଇଥିଲା। ଫଳରେ ବିପଦସଂକୁଳ ଉକ୍ତ ଘରେ ଦୟନୀୟ ଅବସ୍ଥାରେ ଉଭୟ ରହୁଛନ୍ତି। ପ୍ରସାଦଙ୍କ ପଡ଼ୋଶୀ ସନ୍ତୋଷ କୁମାର ବେହେରା କୁହନ୍ତି, ବର୍ଷା ପବନ ଆସିଲେ ଉକ୍ତ ଦମ୍ପତି ନିକଟସ୍ଥ ସ୍କୁଲ ଘରେ ଆଶ୍ରୟ ନେଇଥାନ୍ତି । ତାଙ୍କର ଆସବାବପତ୍ର ବର୍ଷାରେ ଓଦା ହୋଇଯାଇଥାଏ। ସେମାନେ ବହୁତ ଦୁଃଖ କଷ୍ଟରେ ଜୀବନ ବିତାଉଛନ୍ତି। ଚିତ୍ରଡା ପଞ୍ଚାୟତର ସରପଞ୍ଚ ଦୁଲାରୀ ମାରାଣ୍ଡିଙ୍କୁ ପଚାରିବାରୁ ରାଜସ୍ବ ନୀରିକ୍ଷକ ତାଙ୍କ ତଦନ୍ତ ରିପୋର୍ଟ ପ୍ରଶାସନକୁ ଦେଇଥିଲେ। ତେବେ ବ୍ଲକ ଓ ତହସିଲ ପ୍ରଶାସନର ଅବହେଳା ଯୋଗୁ ପ୍ରସାଦଙ୍କୁ ଘରଭଙ୍ଗା ସହାୟତା କିମ୍ବା ଘର ମିଳିପାରି ନାହିଁ ବୋଲି କହିଛନ୍ତି। ଚିତ୍ରଡ଼ା ପଞ୍ଚାୟତର କାର୍ଯ୍ୟନିର୍ବାହୀ ଅଧିକାରୀ ପର୍ଶୁରାମ ସାହୁଙ୍କ ପ୍ରତିକ୍ରିୟା ନେବାରୁ ସେ କିଛିଦିନ ପୂର୍ବରୁ ଏହି ପଞ୍ଚାୟତରେ କାର୍ଯ୍ୟଭାର ଗ୍ରହଣ କରିଥିବାରୁ ଏ ବିଷୟରେ କିଛି ଜାଣି ନାହାନ୍ତି। ଆଗାମୀ ଦିନରେ ସେ କିପରି ଘର ପାଇବେ ସେ ନେଇ ପ୍ରଶାସନକୁ ଅବଗତ କରାଇବେ ବୋଲି କହିଛନ୍ତି। ଏ ସଂକ୍ରାନ୍ତରେ ତହସିଲଦାର ଅନନ୍ତ କୁମାର ହାଁସଦାଙ୍କୁ ପଚାରିବାରୁ ସେ ନିଜେ ତଦନ୍ତ କରିବେ ଏବଂ ଉକ୍ତ ବୃଦ୍ଧ ଦମ୍ପତିଙ୍କୁ ଯଥାଶୀଘ୍ର କିପରି କ୍ଷତିପୂରଣ ଅର୍ଥ ମିଳିବ ସେ ନେଇ ବ୍ୟବସ୍ଥା କରିବେ ବୋଲି କହିଛନ୍ତି।
