କେନ୍ଦୁଝର,୧୪ା୩(ସ୍ବ.ପ୍ର.):କେନ୍ଦୁଝର ସଦର ବ୍ଲକ୍ ଦନାର୍ଦ୍ଦନପୁର ପଞ୍ଚାୟତ ଭାଲିଆଡ଼ିହି ସରକାରୀ ପ୍ରାଥମିକ ବିଦ୍ୟାଳୟରେ ପଶି ଜଣେ ନିଶାସକ୍ତ ଯୁବକ ଉନ୍ମତ୍ତକାଣ୍ଡ ଭିଆଇଛନ୍ତି। ଛାତ୍ରୀଛାତ୍ର ଓ ଶିକ୍ଷୟିତ୍ରୀଙ୍କୁ ହାଣିବାକୁ ଗୋଡ଼ାଇଥିବା ବେଳେ କଟୁରି ଆକ୍ରମଣରେ ୨ଜଣ ଶିଶୁଙ୍କ ସମେତ ଜଣେ ଶିକ୍ଷୟିତ୍ରୀ ଆହତ ହୋଇଛନ୍ତି। ଏନେଇ ପ୍ରାଧାନ ଶିକ୍ଷୟିତ୍ରୀ ଥାନାରେ ଅଭିଯୋଗ କରିଛନ୍ତି। ପୋଲିସ ଯୁବକଙ୍କୁ ଅଟକ ରଖି ତଦନ୍ତ କରୁଛି।
ସୂଚନା ଅନୁଯାୟୀ, ସୋମବାର ମଧ୍ୟାହ୍ନ ୧୨ଟା ୪୫ରେ ସ୍କୁଲ ଚାଲିଥିବା ବେଳେ ଭାଲିଆଡ଼ିହି ଗ୍ରାମର ନାରଣ କାର୍ଜୀ ନାମକ ଯୁବକ ଏକ କଟୁରି ଧରି ସ୍କୁଲ ଭିତରେ ପ୍ରବେଶ କରିଥିଲେ। ଶିକ୍ଷୟିତ୍ରୀ ଝୁନୁ ବେହେରା ପଢ଼ାଉଥିବା ଶ୍ରେଣୀଗୃହରେ ପଶି ଶିକ୍ଷୟିତ୍ରୀଙ୍କୁ ଦୁର୍ବ୍ୟବହାର କରିଥିଲେ। ଛାତ୍ରୀଛାତ୍ର ଭୟରେ ଶ୍ରେଣୀ କକ୍ଷ ଛାଡ଼ି ଦୌଡ଼ି ପଳାଇଥିଲେ। ଯୁବକ ଛାତ୍ରୀଛାତ୍ରଙ୍କୁ ସ୍କୁଲ ହତାରେ ଗୋଡ଼ାଉଥିବା ବେଳେ ପ୍ରଥମ ଶ୍ରେଣୀର ଛାତ୍ରୀ ଶ୍ରୀମତୀ ଦେହୁରୀ ପଡ଼ିଯାଇଥିଲେ। ସେହି ସମୟରେ ନିଶାସକ୍ତ ଯୁବକ ତାଙ୍କ ପିଠିକୁ କଟୁରିରେ ଆକ୍ରମଣ କରିଥିଲେ। ଫଳରେ ଗଭୀର କ୍ଷତ ହୋଇ ରକ୍ତସ୍ରାବ ହୋଇଥିଲା। ତାଙ୍କୁ କାବୁ କରିବାକୁ ଉଦ୍ୟମ ବେଳେ ଶିକ୍ଷୟିତ୍ରୀ ବେହେରା ଆକ୍ରମଣର ଶିକାର ହୋଇଥିଲେ। ତୃତୀୟ ଶ୍ରେଣୀ ଛାତ୍ର ଅନିଲ ନାଏକଙ୍କୁ ମଧ୍ୟ ସେ ମାଡ଼ ମାରିବା ସହ କଟୁରିରେ ଆକ୍ରମଣ କରିଥିଲେ। ବିଦ୍ୟାଳୟର କେତେକ ସାମଗ୍ରୀ ଭାଙ୍ଗି ଦେଇଥିବା
ପ୍ରଧାନ ଶିକ୍ଷୟିତ୍ରୀ କହିଛନ୍ତି।
ନିଶାସକ୍ତ ଯୁବକଙ୍କ ଉନ୍ମତ୍ତକାଣ୍ଡ ଦେଖି ଅନ୍ୟ ଛାତ୍ରୀଛାତ୍ର, ଶିକ୍ଷୟିତ୍ରୀମାନେ ସ୍କୁଲରୁ ଦୌଡ଼ି ପଳାଇଥିଲେ। ଚିତ୍କାର ଶୁଣି ଗ୍ରାମବାସୀ ଆସିବା ଦେଖି ଯୁବକ ଜଣଙ୍କ ପଳାଇଥିଲେ। ପ୍ରଧାନ ଶିକ୍ଷୟିତ୍ରୀ ରିତା ମୁର୍ମୁ ଏ ନେଇ ସଦର ପୋଲିସକୁ ସୂଚନା ଦେବା ସହ ଲିଖିତ ଏତଲା ଦେଇଛନ୍ତି। ସଦର ଥାନା ଅଧିକାରୀ ସୁଶାନ୍ତ ଦାଶ କହିଛନ୍ତି, ଅଭିଯୁକ୍ତଙ୍କୁ କାବୁ କରି ତଦନ୍ତ କରାଯାଉଛି। ବିଦ୍ୟାଳୟର ପାଚେରି ନ ଥିବାରୁ ସ୍କୁଲ ହତା ମଧ୍ୟକୁ ନିଶାସକ୍ତ ଯୁବକ ଅବାଧରେ ପ୍ରବେଶ କରୁଥିବା ଅଭିଭାବକ ଅଭିଯୋଗ କରିଛନ୍ତି।
