ଶ୍ରୀନଗର,୨୪।୬: କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଶନିବାର ଶ୍ରୀନଗରର ମଝିରେ ଥିବା ପ୍ରତାପ ପାର୍କରେ ‘ବଳିଦାନ ସ୍ତମ୍ଭ’(ଶହୀଦଙ୍କ ସ୍ମାରକ)ର ଶିଳାନ୍ୟାସ କରିଛନ୍ତି। ଅଧିକାରୀ କହିଛନ୍ତି, ଶାହା ଜମ୍ମୁ-କଶ୍ମୀରର ଲେଫ୍ଟନାଣ୍ଟ ଗଭର୍ଣ୍ଣର ମନୋଜ ସିହ୍ନାଙ୍କ ସହ ଶ୍ରୀନଗର ସହରର ବ୍ୟବସାୟିକ କେନ୍ଦ୍ର ଲାଲ ଚକ ସିଟି ସେଣ୍ଟର ନିକଟରେ ଅବସ୍ଥିତ ପ୍ରତାପ ପାର୍କରେ ଏହି ସ୍ତମ୍ଭର ମୂଳଦୁଆ ପକାଇଛନ୍ତି। ଅଧିକାରୀଙ୍କ କହିବାନୁସାରେ, ଶ୍ରୀନଗର ସ୍ମାର୍ଟ ସିଟି ପ୍ରକଳ୍ପ ଅଧୀନରେ ଏହି ସ୍ମାରକୀ ନିର୍ମାଣ କରାଯାଉଛି ଏବଂ ଦେଶ ପାଇଁ ନିଜ ଜୀବନକୁ ବଳିଦାନ ଦେଇଥିବା ଶହୀଦମାନଙ୍କ ପାଇଁ ଶ୍ରଦ୍ଧାଞ୍ଜଳୀ।
ଭିତ୍ତି ପ୍ରସ୍ତର ସ୍ଥାପନ କରିବାର କିଛି ସମୟ ପରେ ଶାହା ଉପରାଜ୍ୟପାଳଙ୍କ ସରକାରୀ ବାସଭବନ ରାଜଭବନରେ ପହଞ୍ଚିଥିଲେ। ଏହି କାର୍ଯ୍ୟ ପାଇଁ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲା, କିନ୍ତୁ ପାର୍କ ଏବଂ ଏହାର ଆଖପାଖରେ ଥିବା ଦୋକାନଗୁଡ଼ିକ ଖୋଲା ରହିଥିଲା ଏବଂ ଯାତାୟାତ ସ୍ବାଭାବିକ ଥିଲା ବୋଲି ଅଧିକାରୀମାନେ କହିଛନ୍ତି।
