ନୂଆଦିଲ୍ଲୀ,୧୯।୬: ବିଶ୍ୱର ଦୁଇ ବଡ଼ ଦେଶ ଇରାନ ଏବଂ ଇସ୍ରାଏଲ ମଧ୍ୟରେ ବଢ଼ୁଥିବା ଯୁଦ୍ଧ ସ୍ଥିତି ବିଶ୍ୱ ବଜାରରେ ଚିନ୍ତାର ଲହରୀ ସୃଷ୍ଟି କରିଛି। ମଧ୍ୟପ୍ରାଚ୍ୟରେ ପରିସ୍ଥିତି ବିସ୍ଫୋରକ ରହିଛି । ଅଶୋଧିତ ତୈଳ, ସୁନା ଏବଂ ଡଲାରର ମୂଲ୍ୟରେ ଉତ୍ଥାନ ପତନ ଦେଖିବାକୁ ମିଳୁଛି। ଏଭଳି ସ୍ଥିତିରେ ଆମେରିକାର ଫେଡେରାଲ ରିଜର୍ଭ ଚମକାଇବା ଭଳି ନିଷ୍ପତ୍ତି ନେଇଛି। ଫେଡ୍ କୌଣସି ପରିବର୍ତ୍ତନ ନକରି ସୁଧ ହାରକୁ ସ୍ଥିର ରଖିବାକୁ ଘୋଷଣା କରିଛି ଏବଂ ଏହି ନିଷ୍ପତ୍ତି ଏବେ ବିଶ୍ୱ ବଜାରକୁ କିଛି ଆଶ୍ୱସ୍ତି ଦେଉଥିବା ପରି ମନେ ହେଉଛି।
ଫେଡ୍ ବୁଧବାର ଏହାର ଦୁଇ ଦିନିଆ ବୈଠକ ପରେ ଘୋଷଣା କରିଛି ଯେ ବେଞ୍ଚମାର୍କ ଋଣ ହାର ୪.୨୫% ରେ ସ୍ଥିର ରଖାଯିବ। ତଥାପି, ଏହି ବର୍ଷ ଶେଷ ସୁଦ୍ଧା ହାରରେ ସମ୍ଭାବ୍ୟ ହ୍ରାସ ଆଶା କରାଯାଉଛି।
ଫେଡ୍ର ରିପୋର୍ଟ ଅନୁଯାୟୀ, ଆମେରିକା ଏବେ ବି ମୁଦ୍ରାସ୍ଫୀତି ଏବଂ ମନ୍ଥର ଅର୍ଥନୈତିକ ଅଭିବୃଦ୍ଧିର ଦ୍ୱୈତ ଚ୍ୟାଲେଞ୍ଜର ସମ୍ମୁଖୀନ ହେଉଛି। କମିଟି ବିଶ୍ୱାସ କରେ ଯେ ଏହି ପରିସ୍ଥିତିକୁ ଦୃଷ୍ଟିରେ ରଖି, ବର୍ତ୍ତମାନର ସୁଧ ହାର ଉପଯୁକ୍ତ ରହିବ। ଫେଡ ମୁଖ୍ୟ ଜେରୋମ ପାୱେଲ କହିଛନ୍ତି ଯେ ଦେଶରେ ଆର୍ଥିକ କାର୍ଯ୍ୟକଳାପ ସ୍ଥିର ରହିଛି, କିନ୍ତୁ ଆଗାମୀ ସମୟରେ ମୁଦ୍ରାସ୍ଫୀତିରେ ନୂତନ ଚ୍ୟାଲେଞ୍ଜ ଦେଖାଦେଇପାରେ।
ଫେଡ୍ର ନିଷ୍ପତ୍ତିକୁ ଆମେରିକୀୟ ଷ୍ଟକ ବଜାର ଦ୍ୱାରା ସ୍ବାଗତ କରାଯାଇଛି। କାରଣ ଡାଓ ଜୋନ୍ସ ୧୦୦ ପଏଣ୍ଟ ବୃଦ୍ଧି ପାଇଥିଲା, ଯେତେବେଳେ S&P ୫୦୦ ୦.୩୩% ବୃଦ୍ଧି ପାଇଛି। NASDAQ ମଧ୍ୟ ୦.୫୧% ବୃଦ୍ଧି ରେକର୍ଡ କରଛି।
ଫେଡ୍ ଘୋଷଣାର ଠିକ ପୂର୍ବରୁ, ପୂର୍ବତନ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ଫେଡ ମୁଖ୍ୟ ଜେରୋମ ପାୱେଲଙ୍କୁ ଟାର୍ଗେଟ କରି ତାଙ୍କୁ “ମୂର୍ଖ” ବୋଲି କହିଥିଲେ।
FOMC ବୈଠକ ପରେ, ପାୱେଲ କହିଥିଲେ ଯେ ନେଟ ରପ୍ତାନି ଏବଂ ଟାରିଫ ଯୋଗୁ ଅର୍ଥନୀତିରେ ଉତ୍ଥାନ-ପତନ ଦେଖାଦେଇଛି, କିନ୍ତୁ ଶ୍ରମ ବଜାର ଏବଂ ନିଯୁକ୍ତି ପରିସ୍ଥିତି ଏବେ ବି ସୁଦୃଢ଼ ଅଛି। ସେ ଜୋର ଦେଇ କହିଥିଲେ ଯେ ଫେଡର ପ୍ରାଥମିକତା ହେଉଛି ୨% ମୁଦ୍ରାସ୍ଫୀତି ଏବଂ ପୂର୍ଣ୍ଣ ନିଯୁକ୍ତିର ଲକ୍ଷ୍ୟ, ଯାହା ବର୍ତ୍ତମାନ ପରିସ୍ଥିତିରେ ହାସଲ କରିବା ଚ୍ୟାଲେଞ୍ଜିଂ ହେବ।
