ନବରଙ୍ଗପୁର, ୧୦।୮(ବି.ପ୍ର.): ପ୍ରଶାସନ ଓ ଲୋକ ପ୍ରତିନିଧିଙ୍କ ଦୁର୍ବଳତା ଯୋଗୁ ଜିଲାରେ ଏଯାଏ ୧୬୫ ଗାଁକୁ ଆମ୍ବୁଲାନ୍ସ ପହଞ୍ଚତ୍ ପାରୁନାହିଁ। ୭୭ ଗାଁକୁ ପଦାଚଲା ରାସ୍ତା ରହିଛି। ୫୭ ଗାଁରେ ଲୋକ ଚୁଆ ଓ ନଦୀ ନାଳ ପାଣି ବ୍ୟବହାର କରୁଛନ୍ତି। ଅନେକ ଗାଁକୁ ନଦୀ ନାଳ ଉପରେ ସଂଯୋଗୀକାରଣ ନାହିଁ। ଏବେ ଲଗାଣ ବର୍ଷା ଯୋଗୁ ନଦୀ ନାଳ ଜଳସ୍ରୋତ ବଢ଼ିବାରେ ଲାଗିଛି। ଅନ୍ୟ ପକ୍ଷରେ ଜିଲାର ବିଭିନ୍ନ ଗାଁରେ ଝାଡ଼ାବାନ୍ତିରେ ଲୋକେ ଆକ୍ରାନ୍ତ ହେଉଛନ୍ତି। ଏଭଳି ସ୍ଥଳରେ ଭ୍ରାମ୍ୟମାଣ ସ୍ବାସ୍ଥ୍ୟସେବା ଓ ଡାକ୍ତରୀ ଦଳ ଗାଁରେ ପହଞ୍ଚତ୍ ପାରୁନାହାନ୍ତି। ରୋଗୀ ବଞ୍ଚତ୍ବା ପାଇଁ କଲବଲ ହେଉଥିବା ବେଳେ ଡାକ୍ତର ସେବା ଦେବାକୁ ମଧ୍ୟ ପ୍ରସ୍ତୁତ କିନ୍ତୁ ରାସ୍ତାଘାଟ ଓ ନାଳ ନଦୀ ଏଥିରେ ବାଧକ ସାଜିଛି। ଏହାର ଏକ ଦୃଶ୍ୟ କିଛି ଦିନ ତଳେ ନବରଙ୍ଗପୁର ଜିଲା ତୁଳସୀପଦର ଗାଁରେ ଦେଖିବାକୁ ମିଳିଛି।
ପାପଡାହାଣ୍ଡି ବ୍ଲକ ତୁଳସୀପଦରରେ ଗତ ସପ୍ତାହ ଧରି ଝାଡାବାନ୍ତି ଲାଗିରହିଥିବା ବେଳେ ଜଣଙ୍କର ମୃତ୍ୟୁ ହୋଇଛି। ୨୦ରୁ ଊର୍ଦ୍ଧ୍ୱ ଲୋକେ ଆକ୍ରାନ୍ତ ହୋଇସାରିଛନ୍ତି। ଗାଁର ପ୍ରାୟ ୭ ଜଣ ବିଭିନ୍ନ ଡାକ୍ତରଖାନାରେ ଚିକିତ୍ସିତ ହେଉଥିବା ବେଳେ ବର୍ତ୍ତମାନ ଝାଡାବାନ୍ତି ନିୟନ୍ତ୍ରଣ ରହିଛି। ତୁଳସୀପଦର ଗାଁକୁ ଯିବାକୁ ହେଲେ ୨୬ ନଂ ଜାତୀୟ ରାଜପଥରୁ ପ୍ରାୟ ଦେଢ଼ କିମି କଚ୍ଚା ରାସ୍ତା ଓ ନଦୀ ପାର ହୋଇ ଯିବାକୁ ପଡିଥାଏ। ରବିବାରଠାରୁ ନବରଙ୍ଗପୁର ଜିଲାରେ ଲଘୁଚାପ ଜନିତ ଲଗାଣ ବର୍ଷା ଲାଗିରହିଛି। ତୁଳସୀପଦର ନଦୀ ଜଳସ୍ରୋତ ପ୍ରଖର ରହିଛି। ରବିବାର ଡାକ୍ତର ଜ୍ୟୋତ୍ସ୍ନାରାଣୀ ଦାସ, ବିଭୂତି ଭୂଷଣ ନାୟକ, ଇତିଶ୍ରୀ ପଲାଇ ଓ ଫାର୍ମାସିଷ୍ଟ, ସ୍ବାସ୍ଥ୍ୟକର୍ମୀଙ୍କୁ ନେଇ ମେଡିକାଲ ଟିମ୍ ତୁଳସୀପଦର ଗାଁ ନିକଟ ନାଦୀ ପାଖରେ ଅଟକି ରହିଲେ। ତୁଳସୀପଦର ନଦୀରେ ପାଣି ଅଧିକ ଥିବାରୁ ପ୍ରାୟ ଅଧ କି.ମି. ଦୂରରେ ରହିଥିଲେ। ଅସୁବିଧା ହେଲେ ଅଙ୍ଗନୱାଡି ଦିଦିଙ୍କୁ ଫୋନ ମାଧ୍ୟମରେ ଯୋଗାଯୋଗ କରିପାରିବେ ବୋଲି ଡାକବାଜି ଯନ୍ତ୍ରରେ ଗାଁ ଲୋକଙ୍କୁ ସଚେତନ କରିଥିଲେ। ପଲିଥିନରେ ବାନ୍ଧି ନଦୀ ଆରପଟକୁ ଫୋପାଡି ଥିବା ଔଷଧକୁ ଗ୍ରାମବାସୀଙ୍କ ସହ ଅଙ୍ଗନୱାଡି କର୍ମୀ ଆସି ସଂଗ୍ରହ କରି ନେଇଥିଲେ। ତେବେ ପ୍ରଶାସନ ନିକଟରେ ଗୁହାରି କରିଲେ ମଧ୍ୟ ନଦୀରେ ପୋଲ କିମ୍ବା ପକ୍କା ରାସ୍ତା ହୋଇପାରୁ ନାହିଁ ବୋଲି ଗ୍ରାମବାସୀ କହିଛନ୍ତି। ୨୦୧୦ରେ ତୁଳସୀପଦର ଗାଁରେ ଝାଡ଼ାବାନ୍ତି ବ୍ୟାପୀ ୨୬ ଜଣ ଆକ୍ରାନ୍ତ ହୋଇଥିଲେ। ଗାଁକୁ ରାସ୍ତା ଓ ପାନୀୟ ଜଳ ବ୍ୟବସ୍ଥା ନଥିବା ଧରିତ୍ରୀରେ ପ୍ରଥମ ଥର ପ୍ରକାଶ ପାଇଥିଲା। ସେହି ସମୟରେ ତତ୍କାଳୀନ ଜିଲାପାଳ ଶିବବ୍ରତ ଦାଶ ତତ୍ପର ହୋଇ ଗାଁ ଭିତରର ସିଣ୍ଟେସ୍କ ଯୋଗେ ପାଣି ପହଞ୍ଚାଇବା ସହ ଏକ ନଳକୂପ ଖନନ କରିଥିଲେ । ଗାଁ ଭିତରେ କଂକ୍ରିଟ ରାସ୍ତା କରାଇଥିଲେ। ତୁଳସୀ ପଦର ଗାଁ ଜଙ୍ଗଲ ଜମିରେ ରହିଥିବାରୁ ଏଯାଏ ନଦୀ ଉପରେ ପୋଲ ନିର୍ମାଣ ହୋଇପାରିନାହିଁ। ଗାଁ ଲୋକ ବର୍ଷା ଦିନେ ଏକ ପ୍ରକାର ଜଳବନ୍ଦୀ ହୋଇ ରହିଯାଆନ୍ତି। ଘରେ ଯାହା ଗଚ୍ଛିତ ଖାଦ୍ୟ ଶସ୍ୟ ରହେ ତାହାକୁ ଖାଇଥାନ୍ତି। ଏତେ ବର୍ଷ ପରେ ମଧ୍ୟ ତୁଳସୀପଦରବାସୀଙ୍କ ଅବସ୍ଥା ସୁଧୁରି ନାହିଁ। ଏବେବି ଗାଁକୁ ଭଲ ରାସ୍ତା ଖଣ୍ଡେ ନାହିଁ। ଏ ଦିଗରେ ଦୃଷ୍ଟି ଦେବାକୁ ବୁଦ୍ଧିଜୀବୀମାନେ ଦାବି କରିଛନ୍ତି।
