ନୂଆଦିଲ୍ଲୀ, ୨୧।୧୧: ୟୁଏପିଏ ଆଇନ ବଳରେ ଗିରଫ ହୋଇ ଉତ୍ତରପ୍ରଦେଶର ଏକ ଜେଲରେ ଥିବା କେରଳ ଖବରଦାତା ସିଦ୍ଦିକ୍ କପ୍ପାନଙ୍କୁ ଭେଟିବା ପାଇଁ ସୁପ୍ରିମକୋର୍ଟ ଶୁକ୍ରବାର ଆଇନଜୀବୀଙ୍କୁ ଅନୁମତି ଦେଇଛନ୍ତି। ଜାମିନ ପାଇବା ପାଇଁ ତାଙ୍କ ସ୍ବାକ୍ଷରର ଆବଶ୍ୟକତା ଥିଲା। ଉତ୍ତରପ୍ରଦେଶ ସରକାରଙ୍କର ଆପତ୍ତି ନ ଥିବାରୁ ଅଭିଯୁକ୍ତଙ୍କୁ ଭେଟିବା ଲାଗି ପ୍ରଧାନ ବିଚାରପତି ଏସ୍.ଏ. ବୋବ୍ଡେଙ୍କ ଅଧ୍ୟକ୍ଷତାରେ ଗଠିତ ୩ ଜଣିଆ ଖଣ୍ଡପୀଠ ଅନୁମତି ଦେଇଛନ୍ତି।
ଏହା ପୂର୍ବରୁ ୟୁପି ସରକାର ସତ୍ୟପାଠ ଜରିଆରେ ଅଦାଲତଙ୍କୁ ଜଣାଇଥିଲେ, କପ୍ପାନଙ୍କୁ ବେଆଇନ ଭାବେ ହାଜତରେ ରଖାଯାଇ ନାହିଁ। କୋର୍ଟଙ୍କ ନିର୍ଦ୍ଦେଶକ୍ରମେ ତାଙ୍କୁ ବିଚାର ବିଭାଗୀୟ ହାଜତରେ ରଖାଯାଇଛି। ରାଜ୍ୟ ସରକାର ଆହୁରି କହିଛନ୍ତି, କପ୍ପାନ ହେଉଛନ୍ତି ପପୁଲାର ଫ୍ରଣ୍ଟ ଅଫ୍ ଇଣ୍ଡିଆର ଅଫିସ ସମ୍ପାଦକ। ସେ କେରଳ ଖବରକାଗଜ ‘ତେଜସ୍’ର ପରିଚୟପତ୍ର ଦେଖାଇ ନିଜକୁ ସାମ୍ବାଦିକ ବୋଲାଉଥିଲେ। ଉକ୍ତ ଖବରକାଗଜ ୨୦୧୮ରୁ ବନ୍ଦ ହୋଇଯାଇଛି। କପ୍ପାନ ଜାତିଭେଦ ସୃଷ୍ଟି କରିବା ସହ ଜିଲାରେ ଆଇନଶୃଙ୍ଖଳା ସ୍ଥିତି ଉପୁଯାଇବା ପାଇଁ ହାଥ୍ରସ ଯାଉଥିଲେ ବୋଲି ୟୁପି ସରକାର ଅଭିଯୋଗ କରିଛନ୍ତି। ପ୍ରକାଶ ଯେ, ହାଥ୍ରସରେ ଜଣେ ଯୁବତୀଙ୍କୁ ଗଣବଳାତ୍କାର ପରେ ହତ୍ୟା କରାଯାଇଥିଲା। ଖବର ସଂଗ୍ରହ ଲାଗି କପ୍ପାନ ଯାଉଥିବାବେଳେ ତାଙ୍କୁ ଗିରଫ କରାଯାଇଥିଲା।
