କୋରୁକୋଣ୍ଡା,୨୧ା୬(ଅବିନାଶ ବେହେରା): ମାଲକାନଗିରି ଜିଲା କୋରୁକୋଣ୍ଡା ବ୍ଲକ ଚିତାପାରି ୩ ପଞ୍ଚାୟତ ଅଧୀନସ୍ଥ ସିତାଗନ୍ଧୀ ଗ୍ରାମରେ ଏକ ଅଭାବନୀୟ ଘଟଣା ଘଟିଥିବା ନଜରକୁ ଆସିଛି। ଗତ ୧୯ ତାରିଖ ସୋମବାର ରାତିରେ ସୀତାଗନ୍ଧି ଗ୍ରାମରେ ରହୁଥିବା ଲଇଖନ ଖରା ନାମକ ଜଣେ ବୃଦ୍ଧଙ୍କୁ ଉକ୍ତ ଗ୍ରାମରେ ରହୁଥିବା ରଘୁ ହନ୍ତାଳଙ୍କ ପୁଅ ଧନେଶ୍ୱର (୨୪) ଗ୍ରାମଠାରୁ ୧ କିଲୋମିଟର ଦୂରରେ ରାସ୍ତାରେ ଏକୁଟିଆ ପାଇ ତାଙ୍କୁ ସେଠାରେ ମାଡ଼ ମାରିବା ସହ ଗାମୁଛାରେ ତାଙ୍କ ବେକକୁ ଭିଡ଼ି ହତ୍ୟା କରିବା ପରେ ମୃତଦେହକୁ ନିକଟରେ ଥିବା ମୁହୁଲ ଗଛ ତଳେ ପକାଇ ଦେଇଥିବା ଘଟଣା ସମ୍ପର୍କରେ ଅଭିଯୋଗ ନେଇ ଲଇଖନ ଖରାଙ୍କ ପୁତୁରା ଥାନାରେ ଏକ ଲିଖିତ ଏତଲା ପ୍ରଦାନ କରିଥିଲେ। ଉକ୍ତ ଏତଲାକୁ ଭିତ୍ତି କରି ଥାନାରେ କେସ୍ ନଂ ୧୯୬/୨୩ରେ ଏକ ରୁଜୁ କରି ଓର୍କେଲ ଥାନା ଅଧିକାରୀ ରଘୁନାଥ ମାଝିଙ୍କ ନେତୃତ୍ୱରେ ଏସ୍ଆଇ ଗୌତମ ହରିଜନ, ଏଏସ୍ଆଇ ଅଜିତ କୁମାର ଷଡ଼ଙ୍ଗୀଙ୍କ ସମେତ ଅନ୍ୟ ପୋଲିସ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଲଇଖନଙ୍କ ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଥିଲେ। ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଥିଲେ। ଏହି ଘଟଣାରେ ସଂପୃକ୍ତ ଥିବା ଧନେଶ୍ୱର ହନ୍ତାଳଙ୍କୁ ଗିରଫ କରି କୋର୍ଟଚାଲାଣ କରାଯାଇଥିବା ଥାନା ଅଧିକାରୀ ଶ୍ରୀ ମାଝି ସୂଚନା ଦେଇଛନ୍ତି।
ମିଳିଥିବା ସୂଚନାନୁଯାୟୀ, ପ୍ରାୟ ୩ ବର୍ଷ ପୂର୍ବେ କୌଣସି କାରଣରୁ ଧନେଶ୍ୱରଙ୍କ ସ୍ତ୍ରୀ ଓ ପିଲାଙ୍କର ମୃତ୍ୟୁ ହୋଇଥିଲା। ତେବେ ଉକ୍ତ ଗ୍ରାମର ଲଇଖନ ଖରା ଗୁଣିଗାରେଡ଼ି କରିଥିବାରୁ ତାଙ୍କ ସ୍ତ୍ରୀ ଓ ପିଲାମାନେ ମୃତ୍ୟୁ ହୋଇଥିବା ସନ୍ଦେହ କରି ଧନେଶ୍ୱର ପ୍ରତିଶୋଧ ନେବା ପାଇଁ ଏଭଳି କାଣ୍ଡ ଭିଆଇଛନ୍ତି ବୋଲି କିଛି ଅଞ୍ଚଳବାସୀ ମଧ୍ୟରେ ଆଲୋଚନା ହେଉଥିବା ଜଣାପଡ଼ିଛି। ପୋଲିସ ପକ୍ଷରୁ ଘଟଣାର ତଦନ୍ତ ଜାରି ରହିଛି। ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ଓ ପୋଲିସର ତଦନ୍ତ ପରେ ହତ୍ୟାକାଣ୍ଡର ପ୍ରକୃତ କାରଣ ଜଣାପଡ଼ିବ ବୋଲି ଥାନା ଅଧିକାରୀ କହିଛନ୍ତି।
