ରାଇଘର, ୨୪।୪(ଡି.ଏନ୍.ଏ.): ନବରଙ୍ଗପୁର ଜିଲା ରାଇଘର ବ୍ଲକରେ ଏମ୍ଜିଏନ୍ଆର୍ଇଜିଏସ୍ରେ ଖୋଲାଖୋଲିଭାବେ ମେସିନ ଦ୍ୱାରା କାର୍ଯ୍ୟ କରାଯାଉଛି। ଗତ ଆର୍ଥିକ ବର୍ଷରେ ବ୍ଲକର ୨୬ ପଞ୍ଚାୟତରେ ଏହି ଯୋଜନାରେ ମେଶିନ୍ ଦ୍ବାରା କାର୍ଯ୍ୟ କରାଯାଇ ଶ୍ରମିକଙ୍କୁ କାମ ଦିଆଯାଇଥିବା ଦର୍ଶାଇ କୋଟି କୋଟି ଟଙ୍କା ଉଠାଣ ହୋଇଥିବା ଅଭିଯୋଗ ହୋଇଥିଲା। ବର୍ତ୍ତମାନ ଏଭଳି ଦୃଶ୍ୟ ଦେଖିବାକୁ ମିଳିଛି ମୁଣ୍ଡିବେଡ଼ା ପଞ୍ଚାୟତ ଖିଡିଙ୍ଗିମାଲ ଗ୍ରାମରେ।
ରାଇଘର ବ୍ଲକ ମୁଣ୍ଡିବେଡ଼ା ପଞ୍ଚାୟତ ଅଧୀନ ଖିଡିଙ୍ଗିମାଲ୍ ଗ୍ରାମରେ ଏକ ନୂତନ ପୋଖରୀଖୋଳା କାମ ଆରମ୍ଭ ହୋଇଛି। ସୂଚନା ଫଳକରେ ଉକ୍ତ କାର୍ଯ୍ୟର କୋଡ୍ ନମ୍ବର କିମ୍ବା କାର୍ଯ୍ୟ ଆରମ୍ଭ ସମ୍ପର୍କରେ ଉଲ୍ଲେଖ ନାହିଁ। ସେଥିରେ କେବଳ ଅମୃତ ସରୋବର ନାମରେ ଏହି ପୋଖରୀ କାର୍ଯ୍ୟ ହେଉଥିବା ଲେଖାରହିଛି। ଏମ୍ଜିଏନ୍ଆର୍ଇଜିଏସ୍ରେ ୨୯ ଲକ୍ଷ ଓ ସିଏଫ୍ସି ଯୋଜନାରେ ୨ଲକ୍ଷ ଟଙ୍କାର ପ୍ରକଳ୍ପ ହୋଇଥିବାବେଳେ ଆରମ୍ଭରୁ ମେଶିନ୍ ବ୍ୟବହାର କରି ଅର୍ଥ ହରିଲୁଟ୍ କରାଯାଉଥିବା ଅଭିଯୋଗ ହୋଇଛି। ଗୋଟିଏପଟେ ସୂଚନା ଫଳକରେ କୋଡ୍ ନମ୍ବର ଉଲ୍ଲେଖ ନ କରିବା ସହ ଶ୍ରମିକ ବଦଳରେ ମେଶିନ ଲଗାଇ ଅର୍ଥଉଠାଣ ହୋଇଥିବା ଜଣାପଡିଛି। ମୁଣ୍ଡିବେଡ଼ା ପଞ୍ଚାୟତରେ ମୋଟ ୨ଟି ଅମୃତ ସରୋବର ପୋଖରୀ ନିମନ୍ତେ ଫାଇଲ୍ ଖୋଲାଯାଇଛି। ଏଥିପାଇଁ ୬୨ ଲକ୍ଷ ଟଙ୍କା ବ୍ୟୟ ବରାଦ ହୋଇଛି। ଯୋଜନା ନିୟମାନୁଯାୟୀ ଏଥିରେ ଅଣକୁଶଳୀ କାର୍ଯ୍ୟ କରିବାକୁ ଇଚ୍ଛୁକ ଥିବା ପ୍ରତ୍ୟେକ ଗ୍ରାମୀଣ ପରିବାରକୁ ୧୦୦ଦିନ ନିଶ୍ଚିତ କାମ ମିଳିବା କଥା। ପଞ୍ଚାୟତରେ ଲିଖିତଭାବେ ଆବେଦନ କରିବାର ୧୫ଦିନ ମଧ୍ୟରେ ଘରଠାରୁ ୫କିମି ଦୂରତା ମଧ୍ୟରେ କାମ ଯୋଗାଇ ଦିଆଯାଏ। କିନ୍ତୁ ଏଠାରେ ଶ୍ରମିକ ବଦଳରେ ମେଶିନ ବ୍ୟବହାର କରାଯାଉଅଛି। ବର୍ତ୍ତମାନ ସୁଦ୍ଧା ମୁଣ୍ଡିବେଡ଼ା ପଞ୍ଚାୟତର ଏହି ୨ ପ୍ରକଳ୍ପରେ ୯ ଲକ୍ଷରୁ ଊଦ୍ଧର୍ବ ଟଙ୍କା ଶ୍ରମିକଙ୍କୁ ଦିଆଯାଇଥିବା ଦର୍ଶାଇ ହରିଲୁଟ କରାଯାଇଥିବା ଅଭିଯୋଗ ହେଉଛି। ଲୋକେ ଏହାର ତଦନ୍ତ ଦାବି କରିଛନ୍ତି। ମେଶିନ୍ ଦ୍ୱାରା କାର୍ଯ୍ୟ କରି ଶ୍ରମିକଙ୍କୁ ଅର୍ଥ ଲୋଭ ଦେଖାଇ ତାଙ୍କ ଖାତାରେ ଟଙ୍କା ଜମା କରି ଉଠାଯାଉଥିବାବେଳେ କେତେକ ସ୍ଥାନରେ ଅଳ୍ପ କାର୍ଯ୍ୟ କରି ଅଧିକ ଅର୍ଥ ଉଠାଯାଉଥିବା ଅଭିଯୋଗ କରାଯାଇଛି। ଏ ନେଇ ଜଣାଇବା ସତ୍ତ୍ୱେ ତଦନ୍ତ ହେଉ ନ ଥିବା ଲୋକେ ଅଭିଯୋଗ କରିଛନ୍ତି। ରାଇଘର ବ୍ଲକରେ ଏମ୍ଜିଏନ୍ଆର୍ଇଜିଏସ୍ରେ ମହାଦୁର୍ନୀତି ହୋଇଛି। ଏହାର ଭିଜିଲାନ୍ସ ତଦନ୍ତ ଆବଶ୍ୟକ ବୋଲି ସ୍ଥାନୀୟ ଲୋକେ କହିଛନ୍ତି। ରାଇଘର ବ୍ଲକରେ ଲୋକଙ୍କୁ କାର୍ଯ୍ୟ ମିଳୁ ନ ଥିବାରୁ ଅଞ୍ଚଳବାସୀ ବାହାର ରାଜ୍ୟରେ ଦାଦନ ଖଟୁଛନ୍ତି। ଅପହଞ୍ଚ ଇଲାକାରେ ଲଗାତାର ଭାବେ ଯେଉଁ ଭଳି ଉନ୍ନୟନ କାର୍ଯ୍ୟରେ ଦୁର୍ନୀତି ହେଉଛି ଜିଲା ପ୍ରଶାସନ ସ୍ବତନ୍ତ୍ର ଦୃଷ୍ଟି ଦେବାକୁ ଦାବି ହୋଇଛି। ତଦାରଖ ଅଭାବ ନା ଟାର୍ଗେଟ ନାମରେ ଏଭଳି କାର୍ଯ୍ୟ ହେଉଛି ଏହାକୁ ନେଇ ବୁଦ୍ଧିଜୀବୀ ପ୍ରଶ୍ନ ଉଠାଇଛନ୍ତି। ଏ ନେଇ ବିଭାଗୀୟ କନିଷ୍ଠ ଯନ୍ତ୍ରୀଙ୍କୁ ପଚାରିବାରୁ ୫-ଟି ବିଦ୍ୟାଳୟ କାର୍ଯ୍ୟ ନିମନ୍ତେ ବ୍ୟସ୍ତ ରହିଥିବା ଯୋଗୁ ଏମ୍ଜିଏନ୍ଆର୍ଇଜିଏସ୍ କାର୍ଯ୍ୟ ତଦାରଖ ହୋଇପାରି ନାହିଁ। ଅଭିଯୋଗକୁ କିନ୍ତୁ ଗୁରୁତ୍ୱ ଦେଇ ସ୍ବତନ୍ତ୍ର ଭାବେ ତଦନ୍ତ କରାଯିବ ବୋଲି କହିଛନ୍ତି।