ବଡ଼ଗଁା,୮ା୨(ଡି.ଏନ.ଏ.): ସୁନ୍ଦରଗଡ ଜିଲାର ବଡଗଁା ବ୍ଲକରେ ଆବାସ ଯୋଜନାରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି। ଏହି ବ୍ଲକର ବରଙ୍ଗାକଛାର ପଞ୍ଚାୟତର ଅଧିକାଂଶ ଗ୍ରାମରେ ବହୁ ଗରିବ ବ୍ୟକ୍ତି ଆବାସ ଯୋଜନାରେ ଘର ପାଇବାରୁ ବଞ୍ଚିତ ହୋଇ ଦୁର୍ଦ୍ଦିନରେ ଦିନ କାଟୁଛନ୍ତି। ବର୍ଷ ବର୍ଷ ଧରି ସେମାନଙ୍କ ଉପରେ ପ୍ରଶାସନର ନଜର ପଡୁନାହିଁ। ଫଳରେ ପ୍ରତିଥର ଆବେଦନ କରି ଆସୁଥିଲେ ହେଁ ବିଭିନ୍ନ କାରଣ ଦର୍ଶାଇ ସେମାନଙ୍କୁ ବାଦ୍ ଦିଆଯାଉଛି। ଏନେଇ ସରପଞ୍ଚ, ୱାର୍ଡ ମେମ୍ବରଙ୍କ ଠାରୁ ଆରମ୍ଭ କରି ବିଡ଼ିଓଙ୍କ ଠାରେ ଗୁହାରି କରି ଆସୁଥିଲେ ହେଁ କୌଣସି ସୁଫଳ ମିଳିନାହିଁ। ଫଳରେ ବହୁ ଯୋଗ୍ୟ ହିତାଧିକାରୀ ଭାଗ୍ୟକୁ ଆଦରି ପଡି ରହିଛନ୍ତି। ପ୍ରକାଶ ଯେ, ବରଙ୍ଗାକଛାର ପଞ୍ଚାୟତ ଭେଲୁଆବାହାଲ ଗ୍ରାମର ଖତି ମହାନନ୍ଦିଆ (୭୧)। ତାଙ୍କର ଦୁଇ ଝିଅ ବିବାହ କରି ସାରିଛନ୍ତି। ଦୁଇ ବର୍ଷ ତଳେ ସ୍ବାମୀଙ୍କ ଦେହାନ୍ତ ପରେ ବୃଦ୍ଧା ଜଣକ ଘରେ ଏକାକୀ ରହୁଛନ୍ତି। ସେ ରହୁଥିବା ଭଙ୍ଗା ଦଦରା ଘର ଭିତରେ ଦୁଇ ଫୁଟ ଉଚ୍ଚର ଉଇହୁଙ୍କା ା ବିପଦଶଙ୍କୁଳ ଅବସ୍ଥାରେ ଥିବା ବାରଣ୍ଡାରେ ରୋଷେଇ କରି କୌଣସି ମତେ ଚଳୁଛନ୍ତ। ଘରର ଖପର ନାହିଁ। ଖରା, ବର୍ଷା ଓ ଶୀତରେ ବହୁ କଷ୍ଟରେ ଦୟନୀୟ ଭାବେ ଦିନ କାଟିବାକୁ ପଡୁଛି ବୋଲି କୁହନ୍ତି ଖତି। ତାଙ୍କୁ ପଚାରିବାରେ ସେ କହିଥିଲେ, ଭୋଟ ବେଳେ ନେତା, ସରକାରୀ ବାବୁ ଆସନ୍ତି। ଘର ମିଳିବ ବୋଲି ପ୍ରତିଶ୍ରୁତି ଦିଅନ୍ତ। ହେଲେ ଭୋଟ ସରିବା ପରେ କାହାରି ଦେଖା ମିଳେନାହିଁ। ଫଳରେ ବର୍ଷା ହେଲେ ପଡିଶା ଘରେ ଆଶ୍ରୟ ନେବାକୁ ପଡୁଛି। ବାର୍ଦ୍ଧକ୍ୟ ଭତ୍ତା ଓ କଣ୍ଟ୍ରୋଲ ଚାଉଳରେ ଚଳିବାକୁ ପଡୁଛି। ଘର ମରାମତି ପାଇଁ ପାଖରେ ଟଙ୍କା ନାହିଁ। ରୋଷେଇ କରୁଥିବା ବାରଣ୍ଡାର ମରାମତି ପାଇଁ ଗାଁ ଗୌନ୍ତିଆଙ୍କ ଠାରୁ ହଜାରେ ଟଙ୍କା ଧାର ଆଣିଛି। ଏ ଯାଏଁ ଟଙ୍କା ଶୁଝି ପାରିନି। ଏ ବୟସରେ କେଉଁଠି କାମ କରି ଦି ପଇସା ରୋଜଗାର କରିବା ସମ୍ଭବ ହେଉନାହିଁ ବୋଲି ସେ ଦୁଃଖର ସହ କହିଛନ୍ତି ା
ସେହିପରି ବରଙ୍ଗାକଛାର ଗାଁର କୁନ୍ତଳା ମାଝୀ। ଚାରି ଅବିବାହିତ ଝିଅ, ଗୋଟିଏ ପୁଅ ସହ ଘରେ ପରିବାରର ୭ ପ୍ରାଣୀ କୁଟୁମ୍ବ। ତାଙ୍କ ନାଁରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ପାଇଁ ଜିଇଓ ଟ୍ୟାଗ କରାଯାଇଥିଲା। କିନ୍ତୁ ପରବର୍ତ୍ତୀ ସମୟରେ ଘର କଟି ଯାଇଥିବା ତାଙ୍କ ଠାରୁ ଜଣାପଡିଛି। ଭାଙ୍ଗି ଯାଇଥିବା ଝାଟିମାଟି ଘରେ ପିଲାଛୁଆ ଧରି ବହୁ କଷ୍ଟରେ ଚଳୁଥିବା ସେ କହିଛନ୍ତି ା ଏହି ପଞ୍ଚାୟତ ଅଧୀନ କୁଲଗା ଟୁଙ୍କୁରିପଡାର ପ୍ରଦୀପ ଡୁଙ୍ଗଡୁଙ୍ଗ ୨୦ ବର୍ଷ ହେଲା ଗୋଟିଏ ବଖରା ମାଟି ଘରେ ପରିବାର ସହ ରହି ଆସୁଛନ୍ତି। ଶ୍ରମିକ ଭାବେ କାମ କରି ସେ ପରିବାର ଚଳାଉଥିବା ବେଳେ ଘର କରିବାକୁ ନିଜର ସମ୍ବଳ ନାହିଁ ା ପ୍ରଦୀପ ଗ୍ରାମସଭା, ପଲ୍ଲୀସଭା ଓ ଜନ ପ୍ରତିନିଧିଙ୍କୁ ଜଣାଇ ଆସୁଛନ୍ତି। ହେଲେ ଏଯାଏ ଘର ପାଇପାରିନାହାନ୍ତି। ଆବାସ ଯୋଜନାରେ ଘର ପାଇଁ ଏହି ଗ୍ରାମର ପ୍ରଫୁଲ୍ଲ ବ୍ରିନେତ ମଧ୍ୟ ଗ୍ରାମସଭା, ପଲ୍ଲୀସଭା ଓ ସରପଞ୍ଚଙ୍କୁ ଜଣାଇ ନିରାଶ ହୋଇଥିବା କହିଛନ୍ତି। ଏହାଛଡା କୁଲଗା ଗାଁର ଚେରୁ ତାଜନ, ରବି ମାଝୀ , କୌଶିକ ମହାନନ୍ଦିଆଙ୍କୁ ଘର ମିଳିନାହିଁ। ବରଙ୍ଗାକଛାର ଗ୍ରାମର ଗୋବର୍ଦ୍ଧନ ତାଣ୍ଡିଆ ଘର ନ ପାଇ ବହୁ କଷ୍ଟରେ ଦିନ କାଟୁଛନ୍ତି ା ଏହି ଗଁାର ବିଧବା ମହିଳା ରୁକ୍ମିଣୀ ସା ଦୁଇ ଛୋଟ ପୁଅଙ୍କୁ ନେଇ ଭଙ୍ଗା ଦଦରା ଘରେ ରହୁଛନ୍ତି। ତଳିମୁଣ୍ଡା ଗୀର୍ଜାପଡାର ହାବିଲ ଟପ୍ନୋ ରହୁଥିବା ଘର ଯେ କୌଣସି ମୁହୂର୍ତ୍ତ ରେ ଧସି ପଡ଼ିବା ଆଶଙ୍କା ଥିବା ବେଳେ ସେ ଭାଗ୍ୟକୁ ଆଦରି ରହୁଛନ୍ତି। ଏହିପରି ପଞ୍ଚାୟତର ବିଭିନ୍ନ ଗାଁ ଓ ପଡାଗ୍ରାମଗୁଡିକରେ ୫ରୁ ୧୦ ଜଣ ଯୋଗ୍ୟ ହିତାଧିକାରୀ ଦୀର୍ଘ ବର୍ଷ ଧରି ଭଙ୍ଗା ଓ ବିପଦସଙ୍କୁଳ ଘରେ ରହି ଆସୁଛନ୍ତି। ସେମାନେ କାହିଁକି ଆବାସ ଯୋଜନାରେ ଘର ପାଉନାହାନ୍ତି ଜନପ୍ରତିନିଧି, ରାଜନୈତିକ ଦଳର ନେତା ଓ ପ୍ରଶାସନ ମିଳିତ ଭାବେ ତଦନ୍ତ କଲେ ବାସ୍ତବତା ଜାଣିପାରନ୍ତେ ବୋଲି ସାଧାରଣରେ ମତପ୍ରକାଶ ପାଉଛି।
