ନୂଆଦିଲ୍ଲୀ,୧୨।୩: ଟିମ ଇଣ୍ଡିଆ ଲଗାତାର ଦ୍ୱିତୀୟ ଥର ପାଇଁ ଟି-୨୦ ବିଶ୍ୱକପ ଜିତିଛି। ଟିମ ଇଣ୍ଡିଆ ଅହମ୍ମଦାବାଦରେ ଖେଳାଯାଇଥିବା ଫାଇନାଲରେ ନ୍ୟୁଜିଲାଣ୍ଡକୁ ପରାସ୍ତ କରି ରେକର୍ଡ ତୃତୀୟ ଥର ପାଇଁ ଟ୍ରଫି କବଜା କରିଛି। ଟିମ ଇଣ୍ଡିଆର ଖେଳାଳିମାନେ ଏହି ବିଜୟ ସେଲିବ୍ରେଶନରେ ମାତିଛନ୍ତି ଏବଂ ନିଜ ଘରକୁ ଫେରିଛନ୍ତ। ଟାଇଟଲ ଜିତିବାର ମାତ୍ର ତିନି ଦିନ ପରେ ଦଳର ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ନିଜକୁ ଅସୁବିଧାରେ ପକାଇଛନ୍ତି। ପୁଣେର ଜଣେ ଓକିଲ ହାର୍ଦ୍ଦିକଙ୍କ ବିରୋଧରେ ପୋଲିସ ଅଭିଯୋଗ ଦାଖଲ କରିଛନ୍ତି। ଏଥିରେ ସେ ଜାତୀୟ ପତାକାକୁ ଅପମାନ କରିଥିବା ଅଭିଯୋଗ କରିଛନ୍ତି।
ପୁନେର ଶିବାଜୀନଗର ପୋଲିସ ଷ୍ଟେଶନରେ ହାର୍ଦ୍ଦିକ ପାଣ୍ଡ୍ୟାଙ୍କ ବିରୋଧରେ ଏକ ଅଭିଯୋଗ ଦାୟର କରାଯାଇଛି। ସ୍ଥାନୀୟ ଓକିଲ ୱାଜିଦ ଖାନ ଅଭିଯୋଗ କରିଛନ୍ତି, ହାର୍ଦ୍ଦିକ ପାଣ୍ଡ୍ୟା ତାଙ୍କ ମ୍ୟାଚ ପରେ ସେଲିବ୍ରେଶନ ସମୟରେ ଜାତୀୟ ପତାକାକୁ ଅସମ୍ମାନ କରିଛନ୍ତି। ପାଣ୍ଡ୍ୟାଙ୍କୁ ଏକ ମଞ୍ଚରେ ଗର୍ଲଫ୍ରେଣ୍ଡଙ୍କ ସହ ଶୋଇଥିବାର ଦେଖାଯାଇଥିଲା। ଏହି ସମୟରେ ତାଙ୍କ ଶରୀରରେ ଜାତୀୟ ପତାକା ଗୁଡ଼ାଯାଇଥିଲା।
ଅଭିଯୋଗକାରୀ ଏହି ମାମଲାରେ ଭାରତୀୟ କ୍ରିକେଟରଙ୍କ ବିରୋଧରେ ଏଫଆଇଆର ଦାୟର କରିବାକୁ ଦାବି କରିଛନ୍ତି। ସେ ତାଙ୍କ ଅଭିଯୋଗରେ ଉଲ୍ଲେଖ କରିଛନ୍ତି ଯେ, ଜାତୀୟ ପତାକାକୁ ସମ୍ମାନ ଦେବା ପ୍ରତ୍ୟେକ ନାଗରିକଙ୍କ ଦାୟିତ୍ୱ ଏବଂ ଏହି ମାମଲାରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ। ଯଦିଓ ପୋଲିସ ଏପର୍ଯ୍ୟନ୍ତ ଏଫଆଇଆର ରୁଜୁ କରିନାହିଁ, ସେମାନେ ଏହି ଘଟଣାର ତଦନ୍ତ କରିବେ ବୋଲି ପ୍ରତିଶ୍ରୁତି ଦେଇଛନ୍ତି।
ଏହି ଘଟଣା ଫାଇନାଲ ପରେ ଘଟିଥିଲା। ପୁରସ୍କାର ବଣ୍ଟନବେଳେ ସମସ୍ତ ଖେଳାଳି ପଡ଼ିଆରେ ସେମାନଙ୍କ ପରିବାର ସହିତ ବିଜୟ ସେଲିବ୍ରେଶନ କରୁଥିଲେ। ହାର୍ଦ୍ଦିକଙ୍କ ସହିତ ତାଙ୍କ ପ୍ରେମିକା ମାହିକା ଶର୍ମା ମଧ୍ୟ ଥିଲେ। ପ୍ରେମିକାଙ୍କ ସହ ହାର୍ଦ୍ଦିକ ଆଲିଙ୍ଗନ, ଚୁମ୍ବନ ଏବଂ ନାଚୁଥିବାର ଦେଖାଯାଇଥିଲା। ଏହି ସମୟରେ ହାର୍ଦ୍ଦିକ ଏବଂ ମାହିକାଙ୍କୁ ପୋଡିୟମରେ କିଛି ସମୟ ପାଇଁ ଏକାଠି ଶୋଇଥିବା ଦେଖାଯାଇଥିଲା। ଏଠାରେ ହାର୍ଦ୍ଦିକ ତାଙ୍କ ଶରୀରରେ ତ୍ରିରଙ୍ଗା ଗୁଡ଼ାଇ ରଖିଥିଲେ। ଏ ସମ୍ପର୍କରେ ଏବେ ଏକ ଅଭିଯୋଗ ଦାଖଲ କରାଯାଇଛି।