ଗଞ୍ଜାମ,୧୬ା୧୦(ବିଦ୍ୟାଧର ସାହୁ): ଗଞ୍ଜାମ ମହାବିଦ୍ୟାଳୟରେ ଛାତ୍ର ସଂସଦ ନିର୍ବାଚନ ଅନୈତିକତାକୁ ନେଇ ବିଜୁ ଜନତା ଦଳ ସମର୍ଥିତ ଛାତ୍ର ପକ୍ଷରୁ ଅଭିଯୋଗ ହୋଇଛି l ଗୁରୁବାର ଦୀର୍ଘ ଦେଢ଼ ଘଣ୍ଟା ସମୟ ଧରି କଲେଜ ମୁଖ୍ୟ ଫାଟକ ଅବରୋଧ କରି ହୋ-ହଲ୍ଲା କରିବା ସହ ପ୍ରତିବାଦ କରାଯାଇଥିଲା। ଯାହାକୁନେଇ ସେଠାରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ଖବର ପାଇ ଗଞ୍ଜାମ ଥାନା ଆଇଆଇସି ସୁମିତ୍ରା ପାତ୍ର, ଅତିରିକ୍ତ ଆଇଆଇସି ଶୁଭଲକ୍ଷ୍ମୀ କହଁର ପ୍ରମୁଖ କଲେଜ ଯାଇ ପରିସ୍ଥିତି ନିୟନ୍ତ୍ରଣ କରିଥିଲେ। ନିର୍ବାଚନ ଶେଷ ହେବା ପରେ ଗଣତି ସମୟରେ ଏଜେଣ୍ଟମାନଙ୍କୁ ୪୦ ମିନିଟ୍ ପର୍ଯ୍ୟନ୍ତ ବାହାରକୁ ବାହାର କରିଦିଆଯାଇଥିଲା। ସେ ସମୟରେ ବାଲଟ ପେପରରେ ଏପଟ ସେପଟ କରି ଦିଆଯାଇଥିବା ବିସିଜେଡି ଅଭିଯୋଗ କରିଛି। ବିକ୍ଷୋଭକାରୀ ଛାତ୍ରମାନେ ସେ ସମୟର ସିସିଟିଭି ଫୁଟେଜ ଦେଖାଇବା ପାଇଁ ଦାବି କରିଥିଲେ।
କଲେଜର କିଛି କର୍ମଚାରୀ ବିପକ୍ଷ ପ୍ରାର୍ଥୀମାନଙ୍କୁ ଖୋଲାଖୋଲି ସହଯୋଗ କରୁଥିବା ସେମାନେ ଅଭଯୋଗ କରିଛନ୍ତି। ଏନେଇ କର୍ମଚାରୀମାନେ ବିପକ୍ଷ ଦଳର ଛାତ୍ରମାନଙ୍କ ସହ ନିର୍ବାଚନ ରଣନୀତି ପ୍ରସ୍ତୁତ କରୁଥିବା ନେଇ ଭିଡିଓ ଭାଇରାଲକୁ ନେଇ ସିଧା ସଳଖ ନିର୍ବାଚନରେ ସମ୍ପୃକ୍ତ ରହିଥିବା ଅଭିଯୋଗ ହୋଇଛି। ଯାହାକୁ ନେଇ ଛାତ୍ରୀଛାତ୍ରଙ୍କ ମଧ୍ୟରେ ଘୋର ଅସନ୍ତୋଷ ପ୍ରକାଶ ପାଇଛି। କଲେଜ ପରିସରରେ କଲେଜ ଅଧ୍ୟକ୍ଷାଙ୍କ ସହ କିଛି ଅଧ୍ୟାପକ ଓ ଅଧ୍ୟାପିକା ଓ କର୍ମଚାରୀମାନଙ୍କୁ ବାହାରକୁ ଛଡ଼ା ଯାଇ ନ ଥିବା ଫଳରେ ଗଞ୍ଜାମ ଥାନା ଅଧିକାରୀ ସୁମିତ୍ରା ପାତ୍ରଙ୍କ ସହ ପୋଲିସ ଟିମ୍ କଲେଜ ପରିସରରେ ପହଞ୍ଚି ବିକ୍ଷୋଭକାରୀ ଛାତ୍ରମାନଙ୍କୁ ବୁଝାଇବା ପାଇଁ ଚେଷ୍ଟା କରିଥିଲେ ସୁଦ୍ଧା ଦୀର୍ଘ ସମୟ ଧରି ଛାତ୍ରମାନେ ହୋ-ହଲ୍ଲା କରିଥିଲେ।
ନିର୍ବାଚନ ଫଳ ପ୍ରକାଶ ପାଇବା ପରେ ସମସ୍ତ ଏବିଭିପି ପ୍ରାର୍ଥୀ ବିଜୟ ହୋଇଥିବା ଘୋଷଣା କରାଯାଇଥିଲା। ଏନେଇ କଲେଜ ଅଧ୍ୟକ୍ଷା ଡଃ. ସ୍ମରଣିକା ହୋତାଙ୍କ ପ୍ରତିକ୍ରିୟା ନେବାରେ ସରକାରଙ୍କ ନୀତିନିୟମ ପ୍ରକାରେ ସମସ୍ତ ନିର୍ବାଚନ କାର୍ଯ୍ୟକ୍ରମ ହୋଇଥିବା ପ୍ରକାଶ କରିଛନ୍ତି। ଗତକାଲି କୌଣସି ନିଷ୍କର୍ଷ ବାହାରି ନ ଥିବାବେଳେ ଶୁକ୍ରବାର ପୁଣି ଛାତ୍ରମାନେ ଧାରଣା ଦୃଷ୍ଟିରୁ କଲେଜ ପରିସରରେ ପୋଲିସ ଛାଉଣୀ ଥିବା ଦେଖିବାକୁ ମିଳିଛି।