ଛେଣ୍ଡିପଦା,୨୦ା୮ (ସ୍ବ.ପ୍ର.): ଛେଣ୍ତିପଦା ବ୍ଲକ ପାତ୍ରପଡା ପଞ୍ଚାୟତର ରାଇପାଳ ଗ୍ରାମରେ ରାଶନ ସାମଗ୍ରୀ ବଣ୍ଟନରେ ଅନିୟମିତତା ଅଭିଯୋଗ ହୋଇଛି। ଏ ନେଇ ଗ୍ରାମବସୀ ଶୁକ୍ରବାର ବ୍ଲକ ଘେରାଉ କରିବା ସହିତ ବିଡିଓଙ୍କୁ ଦାବିପତ୍ର ପ୍ରଦାନ କରିଛନ୍ତି। ଦାବିପତ୍ରରେ ଦର୍ଶାଯାଇଛି, ରାଶନ ପ୍ରଦାନରେ ଅନିୟମିତତା ସହ ହିତାଧିକାରୀମାନଙ୍କୁ ଖରାପ ବ୍ୟବହାର ପ୍ରଦର୍ଶନ କରାଯାଉଛି। ରାଶନ ସାମଗ୍ରୀରୁ କିଛି କାଟି ରଖାଯାଉଛି। ଏ ନେଇ ଗ୍ରାମବାସୀ ପୂର୍ବରୁ ବ୍ଲକ୍ ପ୍ରଶାସନକୁ ୨ଥର ଅଭିଯୋଗ କରିଥିଲେ। ପ୍ରଶାସନ ଅନ୍ୟ ଜଣେ ଡିଲରଙ୍କୁ ରାଶନ ବଣ୍ଟନ ପାଇଁ ନିର୍ଦ୍ଦେଶ ଦେଇଥିଲେ। କିନ୍ତୁ ଚଳିତ ମାସରେ ପୂର୍ବରୁ ଦାୟିତ୍ୱରେ ଥିବା ଡିଲର ରାଶନ ବଣ୍ଟନ କରିବାକୁ ଆଣିଥିବା ବେଳେ ହିତାଧିକାରୀମାନେ ତାହାକୁ ବିରୋଧ କରିଥିଲେ। ତୁରନ୍ତ ସମ୍ପୃକ୍ତ ଡିଲରଙ୍କୁ ରାଶନ ବଣ୍ଟନରୁ ବାଦ୍ ଦେବାକୁ ଗ୍ରାମବାସୀ ଦାବି କରିଛନ୍ତି। ଏ ସମ୍ପର୍କରେ ବିଡିଓ ତ୍ରିବିକ୍ରମ କୁମୁରା କହିଛନ୍ତି, ଯୋଗାଣ ଅଧିକାରୀ ଆସିବା ପରେ ଅଭିଯୋଗର ତଦନ୍ତ କରାଯାଇ ପଦକ୍ଷେପ ନିଆଯିବ।
