ନୟାଗଡ଼ ଅଫିସ/ରଣପୁର,୨୩ା୩(ସ୍ବ.ପ୍ର.): କ୍ୟାମେରାମ୍ୟାନ ମାନସ ସ୍ବାଇଁ ହତ୍ୟା ଘଟଣା ଧୀରେ ଧୀରେ ବିବାଦୀୟ ହେବାରେ ଲାଗିଛି। ଏହି ଘଟଣାରେ ଦୁଇ ମନ୍ତ୍ରୀ ଦିବ୍ୟ ଶଙ୍କର ମିଶ୍ର ଓ ପ୍ରତାପ ଜେନା ସମ୍ପୃକ୍ତ ଅଛନ୍ତି ବୋଲି ମାନସଙ୍କ ସ୍ତ୍ରୀ, ମା ଓ ଭାଇ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ମାନସଙ୍କ ପରିବାର ପକ୍ଷରୁ ଚାନ୍ଦବାଲି ଥାନାରେ ଅଭିଯୋଗ କରାଯାଇଛି। ହେଲେ ହତ୍ୟାକାରୀଙ୍କୁ ଗିରଫ କରାଯାଉନାହିଁ। ହତ୍ୟାକାରୀଙ୍କ ପଛରେ ମନ୍ତ୍ରୀ ଓ ବଡ଼ବଡ଼ିଆଙ୍କ ହାତ ଥିବାରୁ ଉକ୍ତ ଘଟଣାକୁ ଚାପି ଦେବା ପାଇଁ ଉଦ୍ୟମ ହେଲାଣି। ତେଣୁ ଉଭୟ ମନ୍ତ୍ରୀଙ୍କ ସମେତ ବଡ଼ବଡ଼ିଆଙ୍କୁ ଗିରଫ କରାଯାଉ, ଘଟଣାର ସିବିଆଇ ତଦନ୍ତ କରାଯାଉ ବୋଲି ମାନସଙ୍କ ପରିବାର ପକ୍ଷରୁ ହାଇକୋର୍ଟରେ ଏକ ଆବେଦନ କରାଯାଇଛି। ଶର୍ମିଷ୍ଠାଙ୍କ ସହିତ ପୂର୍ବତନ ମନ୍ତ୍ରୀ ପ୍ରଫୁଲ୍ଲ ଘଡ଼େଇ ଓ ରାଜ୍ୟ ସଭା ସାଂସଦ ପ୍ରତାପ ଦେବଙ୍କ ଭଳି ଅନେକ ନେତାଙ୍କ ସହ ଫଟୋ ମଧ୍ୟ ଭାଇରାଲ ହେବାରେ ଲାଗିଛି।
ମାନସଙ୍କ ସ୍ତ୍ରୀ ଯମୁନା ସ୍ବାଇଁ କହିଛନ୍ତି, ମୋ ସ୍ବାମୀଙ୍କ ହତ୍ୟା ପଛରେ ୨ ମନ୍ତ୍ରୀ ଦିବ୍ୟ ଶଙ୍କର ମିଶ୍ର୍ର ଓ ପ୍ରତାପ ଜେନା ଜଡ଼ିତ ଅଛନ୍ତି। ସେମାନଙ୍କ ଫଟୋ ସୋସିଆଲ ମିଡିଆ ଓ ବିଭିନ୍ନ ଗଣମାଧ୍ୟମରେ ଆସିଛି। ମେମୋରି ଚିପ୍ରେ ମାଡାମ୍ ଶର୍ମିଷ୍ଠା ରାଉତଙ୍କ କିଛି କଳା କାରନାମା ରହିଥିଲା। ସେହି ମେମୋରି ଚିପ୍ ଜବତ ହେଲେ ସବୁ ଗୁମର ଫିଟିବ। ନ୍ୟାୟ ନ ପାଇଲେ ମୁଁ ନବୀନ ନିବାସ ସମ୍ମୁଖରେ ଆମତ୍ହତ୍ୟା କରିବି ବୋଲି ସେ କାନ୍ଦି କାନ୍ଦି କହିଛନ୍ତି। ମାନସଙ୍କ ମା’ଜୟନ୍ତୀ ସ୍ବାଇଁ ବି ଏ ସଂକ୍ରାନ୍ତରେ ଗଣମାଧ୍ୟମ ଆଗରେ ମୁହଁ ଖୋଲିଛନ୍ତି, ଏହି ଘଟଣାରେ ୨ ମନ୍ତ୍ରୀଙ୍କ ସମେତ ବଡ଼ିବଡ଼ିଆଙ୍କ ହାତ ଅଛି। ଶର୍ମିଷ୍ଠା ରାଉତ ମୋ ପୁଅକୁ ମାରିଦେଲେ। ମୋ ପୁଅ କିଛି କଳାକାରନାମା ଜାଣିଥିଲା। ମେମୋରି ଚିପ୍ରେ କିଛି ଥିଲା, ଗୁମର ଖୋଲିଯିବା ଭୟରେ ମୋ ପୁଅକୁ ରାସ୍ତାରୁ ହଟାଇ ଦିଆଗଲା। ପୁଅ ମାନସ ସମେତ ଆମ ପରିବାରକୁ ନ୍ୟାୟ ମିଳୁ ବୋଲି ସେ କହିଛନ୍ତି। ଭାଇ ରାକେଶ କହିଛନ୍ତି, ଏହି ହତ୍ୟା ପଛରେ ବଡ଼ବଡ଼ ନେତା ଓ ମନ୍ତ୍ରୀ ଅଛନ୍ତି। ମୁଖ୍ୟ ହତ୍ୟାକାରୀ ୱେବ୍ ନ୍ୟୁଜ୍ ପୋର୍ଟାଲ ସମ୍ପୂର୍ଣ୍ଣାର ମାଲିକାଣୀ ତଥା ଖବରଦାତା ଶର୍ମିଷ୍ଠା ରାଉତ ଗିରଫ ହେବା ଦରକାର। ପୋଲିସ ଥାନାକୁ ଡକାଇ ତାଙ୍କୁ ଛାଡି ଦେଇଛି। ଶର୍ମିଷ୍ଠାଙ୍କ ସହ ବଡ଼ ନେତା, ମନ୍ତ୍ରୀ ଅଛନ୍ତି। ମେମୋରି ଚିପ୍ରେ କିଛି ଗୁମର ରହିଥିଲା କିମ୍ବା ଭାଇ କିଛି ଗୁମର ଜାଣିଥିଲେ। ଏଣୁ ତାଙ୍କୁ ରାସ୍ତାରୁ ହଟାଇ ଦିଆଯାଇଛି। ପୋଲିସ ଯଦି ଉକ୍ତ ଘଟଣାର ନିରପେକ୍ଷ ତଦନ୍ତ କରିପାରୁନି ତେବେ ଏହାର ସିବିଆଇ ତଦନ୍ତ କରାଯାଉ ବୋଲି ସେ କହିଛନ୍ତି।
ମାନସଙ୍କ ସ୍ତ୍ରୀଙ୍କ ଅଭିଯୋଗ ପରେ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର କହିଛନ୍ତି, ଆପଣମାନେ ସତ୍ୟ କ’ଣ ସବୁ ଜାଣିଛନ୍ତି। ବିଜେଡି ଗୋଟିଏ ଅତ୍ୟନ୍ତ ଶୃଙ୍ଖଳିତ ଦଳ। ଆମେ ଅନୁଶାସନ ଭିତରେ ରହି ବିଧିବ୍ୟବସ୍ଥା ମାନି ରାଜନୀତି କରୁ। ନିଶ୍ଚିତ ଭାବେ ବିଜେଡି ଆଇନକୁ ଅନୁପାଳନ କରିବ ବୋଲି ଦିବ୍ୟଶଙ୍କର କହିଛନ୍ତି।
ଅନ୍ୟପକ୍ଷେ ମନ୍ତ୍ରୀ ପ୍ରତାପ ଜେନାଙ୍କ ପ୍ରତିକ୍ରିୟା ନେବା ପାଇଁ ତାଙ୍କ ସହ ଯୋଗାଯୋଗ କରାଯାଇଥିଲା। ହେଲେ ସେ ଟେଲିଫୋନ ଉଠାଇ ନ ଥିଲେ।
