ଭୁବନେଶ୍ବର, ୨୩ା୫(ବ୍ୟୁରୋ): ରାଜ୍ୟରେ ମହିଳାଙ୍କ ପ୍ରତି ଅତ୍ୟାଚାର ବଢୁଥିବା ଅଭିଯୋଗ ଆଣି ରାଜ୍ୟ ସରକାରଙ୍କ ଉପରେ ପ୍ରଦେଶ ମହିଳା କଂଗ୍ରେସ ବର୍ଷିଛି। କଂଗ୍ରେସ ଭବନଠାରେ ଆୟୋଜିତ ଏକ ଖବରଦାତା ସମ୍ମିଳନୀରେ ମହିଳା ନେତ୍ରୀମାନେ କହିଛନ୍ତି, ବିଜେଡି ସରକାରର ମହିଳାକୁ ସମ୍ମାନ ଏକ ଫମ୍ପା ଆହ୍ବାନ। ବିଜେଡି ସରକାରର ୨୩ ବର୍ଷରେ ରାଜ୍ୟର ମହିଳା ଅତି ଶୋଚନୀୟ ଭାବେ ଉପେକ୍ଷିତ ଓ ଅତ୍ୟାଚାରିତ ହୋଇ ରହିଛନ୍ତି। ବିଜେଡିର ଚରିତ୍ର ମା’ଙ୍କୁ ନିର୍ଯାତନା। ବଲାଙ୍ଗୀର ଜିଲାର ଶାସକ ଦଳର ତୁଙ୍ଗ ନେତା ପୂର୍ବତନ ମନ୍ତ୍ରୀ, ତାଙ୍କ ପୁଅ ପୂର୍ବତନ ଏମ୍ପିଙ୍କ ବିରୋଧରେ ବଧୂ ନିର୍ଯାତନା ଅଭିଯୋଗ ହୋଇ ମକଦ୍ଦମା ହୋଇ ତଦନ୍ତ ଚାଲୁଛି। କେନ୍ଦ୍ରାପଡ଼ା ବିଧାୟକଙ୍କ ବିରୋଧରେ ବଧୂନିର୍ଯାତନା ଅଭିଯୋଗ ଆସିବା ପରେ ତଦନ୍ତ ଚାଲୁଛି। କେନ୍ଦ୍ରାପଡ଼ାର ଏମ୍ପିଙ୍କ ବିରୋଧରେ ନାରୀ ନିର୍ଯାତନାର ଅଭିଯୋଗ ସମସ୍ତେ ଦେଖି ଆସୁଛନ୍ତି। ଜଗତସିଂହପୁର ଜିଲାର ଜଣେ ବିଧାୟକଙ୍କ ବିରୋଧରେ ଜଣେ ଝିଅ ଅଭିଯୋଗ ଆଣୁଛନ୍ତି। ହେଲେ ଆଇନ କେଉଁ ବାଟରେ ଯାଉଛି ତାହା ଜଣାପଡୁ ନାହିଁ। ସେହିପରି ଓଡ଼ିଶାରେ ମହିଳା ସମ୍ପର୍କିତ ଅପରାଧ ଅତ୍ୟନ୍ତ ଉଦ୍ବେଗଜନକ। ୨୦୧୨ରେ ଉତ୍ତର ପ୍ରଦେଶ ଓ ଆସାମ ପରେ ଓଡ଼ିଶା ଦେଶର ୩ୟ ରାଜ୍ୟ ଭାବେ ଥିଲା। ଯୌତୁକ ନିର୍ଯାତନା, ବଳାତ୍କାର, ପାରିବାରିକ ହିଂସା କ୍ଷେତ୍ରରେ ଓଡ଼ିଶାର ସ୍ଥିତି ଚିନ୍ତାଜନକ। ୨୦୨୦ ତୁଳନାରେ ୨୦୨୧ରେ ୧୩୭.୮ ପ୍ରତିଶତ ବୃଦ୍ଧି ପାଇଥିଲା। ୨୦୨୩ରେ ଓଡ଼ିଶା ବିଧାନସଭାରେ ଉପସ୍ଥିତ ଘରୋଇ ବିଭାଗର ଶ୍ୱେତପତ୍ର ଅନୁସାରେ ମହିଳା ସମ୍ପର୍କିତ ମାମଲା ବିଚାରାଧୀନ ହୋଇ ପଡ଼ିରହିଥିବା ହେଉଛି ୯୮.୬%। ଭାରତ ବର୍ଷରେ ଏହା ସର୍ବାଧିକ। ଦଣ୍ଡବିଧାନ କ୍ଷେତ୍ରରେ ଓଡ଼ିଶାର ଚିତ୍ର ଅତ୍ୟନ୍ତ ନୈରାଶ୍ୟଜନକ। ଏହି ପ୍ରସଙ୍ଗରେ ପ୍ରଦେଶ ମହିଳା କଂଗ୍ରେସର ଏକ ପ୍ରତିନିଧି ଦଳ ରାଜ୍ୟ ମହିଳା କମିଶନ ଅଧ୍ୟକ୍ଷା ମିନତୀ ବେହେରାଙ୍କୁ ଭେଟି ଏକ ସ୍ମାରକପତ୍ର ପ୍ରଦାନ କରିଛନ୍ତି।
