ବେଆଇନ ବ୍ୟବସାୟ ଅଭିଯୋଗ: ୪୩ ଭାରତୀୟଙ୍କୁ ଦେଶରୁ ବିତାଡିତ କରିବ ମାଳଦ୍ୱୀପ…

ମାଲେ,୧୫।୨ : ବେଆଇନ ଉପାୟରେ ବ୍ୟବସାୟ କରିବା ଅଭିଯୋଗରେ ୪୩ ଜଣ ଭାରତୀୟଙ୍କ ସମେତ ୧୮୬ ବିଦେଶୀ ନାଗରିକଙ୍କୁ ମାଳଦ୍ୱୀପ ଦେଶରୁ ବିତାଡିତ କରିବ। ବିଦେଶୀ ନାଗରିକଙ୍କୁ ଦେଶରୁ ବିତାଡିତ କରିବାକୁ ନିର୍ଦ୍ଦେଶ ଜାରି କରାଯାଇଛି। ସମସ୍ତ ବିଦେଶୀ ନାଗରିକଙ୍କ ବିରୋଧରେ ମାଳଦ୍ୱୀପରେ ବିଭିନ୍ନ ପ୍ରକାରର ଅପରାଧରେ ସମ୍ପୃକ୍ତ ଥିବା ଅଭିଯୋଗ ହୋଇଛି। ବିଶେଷ କରି ସମସ୍ତେ ବେଆଇନ ଉପାୟରେ ବ୍ୟବସାୟ କରୁଥିବା ଅଭିଯୋଗ ହୋଇଛି। ମାଳଦ୍ୱୀପ ଗୃହ ମନ୍ତ୍ରଣାଳୟ ଦାବି କରିଛି ଏହି ବିଦେଶୀମାନେ ସ୍ଥାନୀୟ ଲୋକଙ୍କ ନାମରେ ବ୍ୟବସାୟ କରୁଛନ୍ତି, କିନ୍ତୁ ନିଜ ଆକାଉଣ୍ଟରେ ଟଙ୍କା ଜମା କରୁଛନ୍ତି।

ମାଳଦ୍ୱୀପ ଗୃହ ମନ୍ତ୍ରଣାଳୟ ଦ୍ୱାରା ଜାରି କରାଯାଇଥିବା ଏକ ସାଧାରଣ ସୂଚନା ଅନୁଯାୟୀ, ଦେଶର ୧୨ ଟି ଦେଶର ମୋଟ ୧୮୬ ନାଗରିକଙ୍କୁ ଦେଶରୁ ବିତାଡିତ କରିବାକୁ ନିଷ୍ପତ୍ତି ନିଆଯାଇଛି। ସେମାନଙ୍କ ମଧ୍ୟରୁ ସର୍ବାଧିକ ୮୩ ହେଉଛନ୍ତି ବାଂଲାଦେଶୀ ନାଗରିକ। ଦ୍ୱିତୀୟ ସ୍ଥାନରେ ୪୩ ଜଣ ଭାରତୀୟ ଅଛନ୍ତି। ଏହା ପରେ ତୃତୀୟ ସ୍ଥାନରେ ୨୫ ଶ୍ରୀଲଙ୍କା ଏବଂ ଚତୁର୍ଥ ସ୍ଥାନରେ ୮ ନେପାଳ ନାଗରିକ ଅଛନ୍ତି। କୌତୁହଳର ବିଷୟ, ଏହି ତାଲିକାରେ କୌଣସି ଚାଇନାର ନାଗରିକ ନାହାନ୍ତି। ତେବେ ବର୍ତ୍ତମାନ ସୁଦ୍ଧା ଦେଶ ଛାଡିବାର ଶେଷ ତାରିଖ ସମ୍ପର୍କରେ କୌଣସି ସୂଚନା ଦିଆଯାଇ ନାହିଁ।

ବିଦେଶୀମାନଙ୍କୁ ଦେଶାନ୍ତର କରିବା ପ୍ରସଙ୍ଗରେ ଇମିଗ୍ରେଶନ କଣ୍ଟ୍ରୋଲର ଶମା ୱାହିଦ କହିଛନ୍ତି ବେଆଇନ ବ୍ୟବସାୟ କରୁଥିବା ବିଦେଶୀମାନଙ୍କୁ ଖୋଜିବା ପାଇଁ ନିରନ୍ତର ଅପରେଶନ ଚାଲିଛି। ଏପର୍ଯ୍ୟନ୍ତ ଅନେକ ଲୋକଙ୍କୁ ଅଟକ ରଖାଯାଇଛି, ଯେଉଁମାନଙ୍କର ବୈଧ ଡକ୍ୟୁମେଣ୍ଟ ଏବଂ ପାସପୋର୍ଟ ଅଛି ସେମାନଙ୍କୁ ଦେଶରୁ ବିତାଡିତ କରାଯିବ। ଶମା କହିଛନ୍ତି ଇମିଗ୍ରେଶନ ଏବଂ ପୋଲିସର ଏହି ଅଭିଯାନ କୌଣସି ନିର୍ଦ୍ଦିଷ୍ଟ ଗୋଷ୍ଠୀ ବିରୁଦ୍ଧରେ ନୁହେଁ।

ମାଳଦ୍ୱୀପ ସରକାରଙ୍କ ଅନୁଯାୟୀ ଦେଶରେ ଚାଲୁଥିବା ସମସ୍ତ ବେଆଇନ ବ୍ୟବସାୟ ବନ୍ଦ କରାଯିବ। ମାଲଦ୍ୱୀପ ଗୃହମନ୍ତ୍ରୀ ଅଲି ଇହୁସାନ କହିଛନ୍ତି ଡିସେମ୍ବର ୨୦୨୧ ରେ ଅଣାଯାଇଥିବା ଆଇନ ଅନୁଯାୟୀ ଏହି ନିଷ୍ପତ୍ତି ନିଆଯାଇଛି।