ଅନୁଗୋଳ ଅଫିସ, ୧୫।୩: ଓଡ଼ିଶା କ୍ରିକେଟ୍ ଆସୋସିଏଶନ (ଓସିଏ) ପକ୍ଷରୁ କଳାହାଣ୍ଡି କପ୍ ପାଇଁ ଜିଲାସ୍ତରୀୟ ଖେଳାଳି ଚୟନ ପ୍ରକ୍ରିୟା ବେଳେ ଅନୁଗୋଳ ଜିଲା କ୍ରିକେଟ୍ ଆସୋସିଏଶନ (ଏଡିସିଏ) ବିରୋଧରେ ପକ୍ଷପାତିତା ଅଭିଯୋଗ ହୋଇଛି। ଏଡିସିଏ ଠିକ୍ ଭାବେ ଖେଳାଳି ଚୟନ କରି ନ ଥିବା ୨ ଖେଳାଳି ଦୁଷ୍ମନ୍ତ ନାଏକ ଓ ଶୁଭକାନ୍ତ ସାହୁ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି।
ଅଭିଯୋଗରେ ଖେଳାଳି ଦ୍ୱୟ ଦର୍ଶାଇଛନ୍ତି, ଆସନ୍ତା ୧୬ ତାରିଖରୁ କଳାହାଣ୍ଡି କପ୍ ଖେଳାଯିବ। ଏଥିନିମନ୍ତେ ଖେଳାଳି ଚୟନ ପାଇଁ ଅନୁଗୋଳ ଜିଲା କ୍ରିକେଟ୍ ଆସୋସିଏଶନ ଦ୍ୱାରା ଇଣ୍ଟ୍ରା ସିଲେକ୍ସନ ମ୍ୟାଚର ଆୟୋଜନ କରାଯାଇଥିଲା। ସ୍ଥାନୀୟ କଦମ ପଡ଼ିଆରେ ଅନୁଷ୍ଠିତ ଏହି ମ୍ୟାଚରେ ନିୟମିତ ଭାବେ ଉତ୍ତମ ଖେଳ ପ୍ରଦର୍ଶନ କରିଥିଲେ। ଶୁଭକାନ୍ତ ସାହୁ ୪ ମ୍ୟାଚରେ ୧୧୪ ରନ କରିବା ସହ ୮ ଉଇକେଟ ନେଇଥିଲେ। ସେହିପରି ଦୁଷ୍ମନ୍ତ ନାୟକ ୪ ମ୍ୟାଚରେ ୧୮୨ ରନ ଓ ୧ଟି ଉଇକେଟ ନେଇଥିଲେ। ହେଲେ ଏଡିସିଏ ପକ୍ଷରୁ ଖେଳାଳି ଚୟନ ତାଲିକା ପ୍ରକାଶ କରାଗଲା ନାହିଁ। ଏପରି କି ପକ୍ଷପାତ ମନୋଭାବ ରଖି ଖେଳାଳିମାନଙ୍କୁ ଫୋନ କରାଯାଇ ଅପରାହ୍ନ ୨ଟାରେ ବସ୍ଷ୍ଟାଣ୍ଡରେ ପହଞ୍ଚିବାକୁ କୁହାଗଲା। ଏହା ଜାଣିବା ପରେ ଦୁହେଁ ଏଡିସିଏ ସମ୍ପାଦକ ଓ କର୍ମକର୍ତ୍ତାଙ୍କୁ ଯୋଗାଯୋଗ କରିଥିଲେ। ହେଲେ ସେମାନଙ୍କ ଅଭିଯୋଗକୁ କେହି କର୍ଣ୍ଣପାତ କଲେ ନାହିଁ। ସମ୍ପାଦକ କିଛି କରିପାରିବେ ନାହିଁ ବୋଲି ସିଧାସଳଖ କହିବା ସହ ସିଲେକ୍ସନ କମିଟି ଯେଉଁ ଖେଳାଳି ତାଲିକା ଘୋଷଣା କରିଛି, ସେହି ଟିମ୍ ଖେଳିବାକୁ ଯିବ ବୋଲି କହିଥିଲେ। ତେବେ ଅଭିଯୋଗ ପରେ ଅନ୍ୟ ଜଣେ ଖେଳାଳିଙ୍କୁ ଫୋନ କରାଯାଇ ବସ୍ଷ୍ଟାଣ୍ଡରେ ପହଞ୍ଚିବାକୁ କୁହାଯାଇଥିଲା। ବାହାର ଜିଲାର ଖେଳାଳିଙ୍କୁ ଅନୁଗୋଳରେ ଖେଳିବାର ସୁଯୋଗ ଦିଆଯିବା ସହ ଚୟନ କରାଯାଉଥିବା ବେଳେ ଏଠାକାର ପ୍ରତିଭା ସମ୍ପନ୍ନ ଖେଳାଳିଙ୍କୁ ଉପେକ୍ଷା କରାଯାଉଥିବାରୁ କାହା ସ୍ବାର୍ଥରେ ଅନୁଗୋଳ ଜିଲା କ୍ରିକେଟ୍ ଆସୋସିଏଶନ କାର୍ଯ୍ୟ କରୁଛି ବୋଲି ଖେଳାଳି ଦ୍ୱୟ ପ୍ରଶ୍ନ କରିଛନ୍ତି। ଏ ସମ୍ପର୍କରେ ଅଭିଯୋଗକାରୀ ଶୁଭକାନ୍ତ କହିଛନ୍ତି, ରାତିରେ ଫୋନ୍ ଯିବ ବୋଲି ୧୩ ତାରିଖ ଅପରାହ୍ନରେ ଆମମାନଙ୍କୁ କୁହାଯାଇଥିଲା। ହେଲେ ଯେଉଁମାନେ ଭଲ ପ୍ରଦର୍ଶନ କରି ନ ଥିଲେ ସେମାନଙ୍କୁ ଫୋନ୍ କରାଗଲା। ଅନୁଗୋଳ ଜିଲା କ୍ରିକେଟ ଆସୋସିଏଶନ ସଭାପତି ପ୍ରତାପ ପ୍ରଧାନ କହିଛନ୍ତି, ଚୟନରେ କୌଣସି ପାତର ଅନ୍ତର କରାଯାଇନାହିଁ। ଇଣ୍ଟ୍ରା କ୍ଲବରେ ଭଲ ପ୍ରଦର୍ଶନ କରିଥିବା ଖେଳାଳିଙ୍କ ନାମ ଓସିଏକୁ ଯାଇଥିଲା। ସେଠାରୁ ଏକ ୩୫ ଜଣିଆ ତାଲିକା ଆସିଥିଲା। ଏହା ମଧ୍ୟରୁ ପିଲାଙ୍କୁ ଚୟନ କରାଯାଇଛି। ୩ ଜଣ ଚୟନକର୍ତ୍ତା ରହିଥିବାବେଳେ ଏଡିସିଏ ସମ୍ପାଦକ ତଦାରଖ କରିଥିଲେ। ସେଥିମଧ୍ୟରୁ ୧୮ ଜଣଙ୍କୁ ଚୟନ କରାଯାଇଛି। ଏନ୍ଓସି ନେଇ ଆସିଥିବା ପିଲା ଅନୁଗୋଳ କ୍ରିକେଟ କ୍ଲବରେ ଖେଳୁଥିଲେ। ତେଣୁ ସେମାନଙ୍କୁ ଚୟନ କରାଯାଇଛି। ଚୟନରେ କୌଣସି ପକ୍ଷପାତିତା କରାଯାଇ ନ ଥିବା ଏଡିସିଏ ସଭାପତି ପ୍ରଧାନ ପ୍ରକାଶ କରିଛନ୍ତି।
