ଛତ୍ରପୁର,୨୮ା୪(ଡି.ଏନ୍.ଏ.): ଛତ୍ରପୁର ନିକଟ ମାଟିଖାଲସ୍ଥିତ ଭାରତୀୟ ବିରଳ ମୂର୍ତ୍ତିକା ଲିଃ (ଆଇଆରଇ)ରେ ବିଭିନ୍ନ ବେନିୟମ କାର୍ଯ୍ୟ ଓ ଦୁର୍ନୀତି ହେଉଥିବା ଅଭିଯୋଗ କରିଛି ଭାରତୀୟ ବିକାଶ ପରିଷଦ। ଛତ୍ରପୁର ଠାରେ ଏକ ଖବରଦାତା ସମ୍ମିଳନୀରେ ଅଭିଯୋଗ କରାଯାଇଛି ଯେ, କାରଖାନା ପକ୍ଷରୁ ବିନା ଚୁକ୍ତିନାମାରେ ଲୋକଙ୍କୁ ଧମକ ଦେଇ ଦଲାଲ ମାଧ୍ୟମରେ ଜମିରେ ଖନନ କରାଯାଉଛି। ୨୦୧୯ଠାରୁ ୨୦୨୨ ବିନା ପରିବେଶ ମଞ୍ଜୁରିରେ ଖଣିଜ ସମ୍ପଦ ଖନନ କରିଥିଲା, ଏହା ପ୍ରଶାସନ ଓ ପରିବେଶ ଅଧିକାରୀଙ୍କ ଜ୍ଞାତସାରରେ ହୋଇଥିବା ଅଭିଯୋଗ କରିଛନ୍ତି। ପରିବେଶ ମଞ୍ଜୁରୀ ନିୟମକୁ ଅଣଦେଖା କରି ଋଷିକୁଲ୍ୟା ନଦୀ ନିକଟସ୍ଥ ୨କିମି ମଧ୍ୟ ଦୂରତା ମଧ୍ୟରେ ଖନନ କରାଯାଇଛି। ଆର୍ଯ୍ୟପଲ୍ଲୀ ପଞ୍ଚାୟତର ଲୋକଙ୍କ ଆର୍ଥିକ ଉନ୍ନତି ପାଇଁ ୨୦୦୬ ଓ ୨୦୧୩ ସାହାଯ୍ୟ ଓ ଥାଇଥାନ ନିୟମ ଥିବାବେଳେ କିଛି ନକରି ଟଙ୍କା ଆତ୍ମସାତ କରିଥିବା ଅଭିଯୋଗ କରାଯାଇଛି। କାରଖାନା ପକ୍ଷରୁ ସିଆରସି ପାଣ୍ଠିକୁ ଅଞ୍ଚଳ ସ୍ବାସ୍ଥ୍ୟ, ଶିକ୍ଷା, ଜନ କଲ୍ୟାଣ, ଚାରା ରୋପଣ ନିମନ୍ତେ ବିନିଯୋଗ କରିବା କଥା। କିନ୍ତୁ ତାହା ନକରି ନାମକୁମାତ୍ର ମାତ୍ର ବିନିଯୋଗ କରି ବାର୍ଷିକ କୋଟିକୋଟି ଟଙ୍କା ଦୁର୍ନିତିଗ୍ରସ୍ତ କର୍ମଚାରୀମାନେ ଲୁଣ୍ଠନ କରୁଛନ୍ତି। ଏହି ସମସ୍ତ କାର୍ଯ୍ୟରେ କିଛି ଅଧିକାରୀ ଓ ମାଇନିଙ୍ଗ କର୍ମଚାରୀ ଲିପ୍ତ ଅଛନ୍ତି। ଏମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଭାରତୀୟ ବିକାଶ ପରିଷଦ ଦାବି କରିଛି। ଏ ସମ୍ପର୍କରେ କେନ୍ଦ୍ର ଓ ରାଜ୍ୟ ପରିବେଶ ବିଭାଗ, ଗଞ୍ଜାମ ଜିଲାପାଳଙ୍କ ନିକଟରେ ଲିଖିତ ଭାବେ ଦାବି କରାଯାଇଛି। ୧୫ ଦିନ ମଧ୍ୟରେ ଏହି ଅଭିଯୋଗର ସମାଧାନ କରା ନଗଲେ କୋର୍ଟରେ ମାମଲା ରୁଜୁ କରାଯିବ ବୋଲି ପରିଷଦ ପକ୍ଷରୁ ଚେତାବନୀ ଦିଆଯାଇଛି। ଏହି ଖବରଦାତା ସମ୍ମିଳନୀରେ ପରିଷଦର ସଭାପତି ସୁରେନ୍ଦ୍ର ପାଣିଗ୍ରାହୀ, ରାଜେନ୍ଦ୍ର ବେହେରା, ଗୁରୁଚରଣ ପାତ୍ର, ଏମ ଜଙ୍ଗମାୟ, ଦଣ୍ଡପାଣି ପ୍ରଧାନ, ସୂର୍ଯ୍ୟ ବେହେରା ଭୀମ ବେହେରା ପ୍ରମୁଖ ଉପସ୍ଥିତ ଥିଲେ।
