ନୟାଗଡ଼ ଅଫିସ,୧।୫: ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ନୟାଗଡ଼ ବ୍ଳକ ଜୟପୁର ଗାଁର ମଞ୍ଜୁ ମହାରଣା(୬୦) ନାମକ ଜଣେ ମହିଳାଙ୍କ ମୃତ୍ୟୁ ଘଟିଛି। ଏହାକୁ ନେଇ ରବିବାର ପୂର୍ବାହ୍ନରେ ଉତ୍ତେଜନା ପ୍ରକାଶ ପାଇଥିଲା।
ଚିକିତ୍ସାରେ ଅବହେଳା ଯୋଗୁ ଏପରି ଘଟିଲା ବୋଲି ମଞ୍ଜୁଙ୍କ ପରିବାର ଓ ଆମତ୍ୀୟ ଲୋକେ ପାଟିତୁଣ୍ଡ କରିଥିଲେ। ଝାଡା,ବାନ୍ତି ଓ ଜ୍ୱରରେ ଆକ୍ରାନ୍ତ ହୋଇ ଡାକ୍ତରଖାନାକୁ ଆସିଥିଲେ ମଞ୍ଜୁ।
ଚିକିତ୍ସାରେ ଅବହେଳା ଅଭିଯୋଗ ଆସିଲା ପରେ ଜିଲା ମୁଖ୍ୟ ଚିକିତ୍ସାଧିକାରୀ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି।
ପୁଅ ପୂର୍ଣ୍ଣ ମହାରଣା କୁହନ୍ତି, ମା ଶନିବାର ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ହେଲେ ନର୍ସ ଓ ଡାକ୍ତରଙ୍କ ସେବା ଦେବାରେ ଅବହେଳା କରିବାରୁ ରବିବାର ବଞ୍ଚିବା ଲୋକ ମରିଗଲେ।
ଯେଉଁମାନେ ଚିକିସତ୍ାରେ ଅବହେଳା କରିଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ଭାଇ ଅକ୍ରୁର ମହାରଣାଙ୍କ ଅଭିଯୋଗ ଅନୁସାରେ ଭଉଣୀଙ୍କୁ ଚିକିତ୍ସାରେ ଅବହେଳା କରାଯିବାରୁ ରବିବାର ପ୍ରାଣ ହରାଇଲେ। ଏହାର ତଦନ୍ତ ହେବା ଦରକାର। ଟାଉନ ଥାନାର ତଦନ୍ତକାରୀ ଅଧିକାରୀ ଧର୍ମେନ୍ଦ୍ର ସିଆଳ କୁହନ୍ତି, ପରିବାର ପକ୍ଷରୁ ମୃତଦେହ ବ୍ୟବଚ୍ଛେଦ କରିବାକୁ ମନା କରାଯାଇଥିଲା। ଏହାପରେ ତାଙ୍କୁ ମୃତଦେହ ହସ୍ତାନ୍ତର କରାଯାଇଛି । ସିଡିଏମ୍ଓ ମକରନ୍ଦ ବେଉରା କୁହନ୍ତି, ଚିକିତ୍ସାରେ ଅବହେଳା ଅଭିଯୋଗ ଆସିବା ପରେ ତଦନ୍ତ ଆରମ୍ଭ ହୋଇଛି। ରବିବାର ଦାୟିତ୍ୱରେ ଥିବା ସୁପରିଟେଣ୍ଡେଣ୍ଟ ପ୍ରାଥମିକ ରିପୋର୍ଟ ଦେଇଛନ୍ତି। ସୋମବାର ଜିଲା ମୁଖ୍ୟ ଚିକିତ୍ସାଳୟର ସୁପରିଟେଣ୍ଡେଣ୍ଟ ତଦନ୍ତ କରି ରିପୋର୍ଟ ଦେବେ। ରିପୋର୍ଟ ହସ୍ତଗତ ପରେ ପରବର୍ତ୍ତୀ ରିପୋର୍ଟ ଦିଆଯିବ।
ସାମାଜିକ କର୍ମୀ ସନ୍ତୋଷ ପ୍ରଧାନ କୁହନ୍ତି, ଜିଲା ମୁଖ୍ୟ ଚିକିତ୍ସାଳୟରେ ବିଭିନ୍ନ ସମୟରେ ଏପରି ଘଟଣା ଯୋଗୁ ରୋଗୀ ପ୍ରାଣ ହରାଉଛନ୍ତି। ଏଣୁ ଅଭିଯୋଗକୁ ଅଣଦେଖା ନ କରି ସଠିକ୍ ଭାବେ ତଦନ୍ତ ହେବା ଦରକାର।
