ବାଲିକୁଦା,୨୩।୧(ତାପସ ସ୍ବାଇଁ): ଜଣେ ଫେରାର ଅଭିଯୁକ୍ତଙ୍କୁ ଗିରଫ କରିବାକୁ ଯାଇ ପୋଲିସକୁ ମାଡ଼ ଖାଇବାକୁ ପଡ଼ିଛି। ଏପରିକି ଅଭିଯୁକ୍ତଙ୍କୁ ସ୍ଥାନୀୟ ଲୋକେ ପୋଲିସ ହାତରୁ ଛଡ଼ାଇ ନେଇଛନ୍ତି। ବାଲିକୁଦା ଥାନା ଅଞ୍ଚଳରେ ଏପରି ଏକ ଘଟଣା ଘଟିଛି। ଏହି ଘଟଣାରେ ଏସ୍ଆଇ ବସନ୍ତ କୁମାର ସୋରେନଙ୍କ ସମେତ ୩ ପୋଲିସ କର୍ମଚାରୀ ଆହତ ହୋଇଛନ୍ତି। ସେମାନେ ବାଲିକୁଦା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସିତ ହୋଇ ଥାନାରେ ପହଞ୍ଚି ଆଇଆଇସିଙ୍କ ନିକଟରେ ଲିଖିତ ଅଭିଯୋଗ କରିଥିଲେ।
ଏସ୍ଆଇ ସୋରେନଙ୍କ ଅଭିଯୋଗ ଅନୁଯାୟୀ, ମାଡ଼ ମାରିବା ଘଟଣାରେ ସମ୍ପୃକ୍ତ ୮ ଅଭିଯୁକ୍ତଙ୍କ ନାମରେ ମାମଲା ରୁଜୁ କରାଯାଇଛି। ସେମାନେ ହେଲେ ଏହି ଥାନା ଅନ୍ତର୍ଗତ ଓଷକଣା ପଞ୍ଚାୟତ ପାଣିତରା ଗ୍ରାମର ସନ୍ତୋଷ ମଲ୍ଲିକ, ଅଶୋକ ମଲ୍ଲିକ, ଗଙ୍ଗା ମଲ୍ଲିକ, ବାବୁ ମଲ୍ଲିକ, ମାମି ମଲ୍ଲିକ, ରାନୁ ମଲ୍ଲିକ, ତପନ ମଲ୍ଲିକ, ମଞ୍ଜୁ ମଲ୍ଲିକ।
ଅଭିଯୋଗ ଅନୁଯାୟୀ, ପାଣିତରା ଗ୍ରାମର ବାପି ମଲ୍ଲିକଙ୍କ ନାମରେ ୫ରୁ ଊର୍ଦ୍ଧ୍ୱ ମାମଲା ରହିଛି। ଏନେଇ ତାଙ୍କୁ ଧରିବା ପାଇଁ ଜଗତ୍ସିଂହପୁର ଏସ୍ଡିଜେମ୍ କୋର୍ଟ ପକ୍ଷରୁ ଜାମିନବିହୀନ ଗିରଫ ପରଓ୍ବାନା ଜାରି କରାଯାଇଥିଲା। ଆଇଆଇସି ସଲିଳ ପ୍ରଧାନଙ୍କ ନିର୍ଦ୍ଦେଶ କ୍ରମେ ଏସ୍ଆଇ ବସନ୍ତ କୁମାର ସୋରେନ ୬ ଜଣିଆ ଟିମ୍ ସହ ପାଣିତିରା ଗ୍ରାମରେ ଚଢ଼ାଉ କରି ବାପିଙ୍କୁ ଧରିଥିଲେ। ଏହି ସମୟରେ ଉପରୋକ୍ତ ଅଭିଯୁକ୍ତମାନେ ବାଡ଼ି, ଲୁହା ଛଡ଼ ଓ ମାରଣାସ୍ତ୍ର ଧରି ପୋଲିସକୁ ଅତର୍କିତ ଭାବେ ଆକ୍ରମଣ କରି ବାପିଙ୍କୁ ଛଡାଇ ନେଇଯାଇଥିଲେ। ଅଭିଯୁକ୍ତମାନଙ୍କୁ ଧରିବା ପାଇଁ ଉଦ୍ୟମ ଜାରି ରହିଛି ବୋଲି ଆଇଆଇସି ପ୍ରଧାନ କହିଛନ୍ତି।
