ନୂଆଦିଲ୍ଲୀ,୨୬।୬: ଆମକୁ ଦିନିକିଆ ଭଳି ଟେଷ୍ଟରେ ମଧ୍ୟ ଦଳର ଆବଶ୍ୟକତା ଅନୁଯାୟୀ ଖେଳି ପାରୁଥିବା ଖେଳାଳି ଦରକାର। ବିଶ୍ୱ ଟେଷ୍ଟ ଚାମ୍ପିୟନ ଫାଇନାଲରେ ପରାଜୟ ପରେ ଏଭଳି ମନ୍ତବ୍ୟ ଦେଇଥିଲେ ଭାରତୀୟ ଅଧିନାୟକ ବିରାଟ କୋହଲି। ଏହା ଥିଲା ଦଳର କିଛି ଖେଳାଳିଙ୍କ ପାଇଁ କୋହଲିଙ୍କ ସିଧାସଳଖ ଚେତାବନୀ। ଏଣୁ ଆଗାମୀ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ ଲାଭି ଭାରତରେ କିଛି ବଡ଼ ପରିବର୍ତ୍ତନ ହୋଇପାରେ।
ଯୁବ ଓପନର ଶୁବମାନ ଗିଲ ଗତ ୭ଟି ଟେଷ୍ଟ ଇନିଂସରେ ଯଥାକ୍ରମେ ୦,୧୪,୧୧, ୧୫*,୦, ୨୮,୮ ରନ୍ କରିଛନ୍ତି। ସେହିଭଳି ଗତ ୩୫ ଇନିଂସରେ ଗୋଟିଏ ହେଲେ ଶତକ ହାସଲ କରିପାରି ନାହାନ୍ତି ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା। ୨୦୨୦ରେ ଅଧିନାୟକ ବିରାଟ କୋହଲି ଟେଷ୍ଟରେ ୧୯.୩୩ ହାରରେ ରନ୍ କରୁଥିବାବେଳେ ଏପର୍ଯ୍ୟନ୍ତ ୨୦୨୧ରେ ୨୮.୬୩ ଆଭରେଜରେ ରନ୍ ସଂଗ୍ରହ କରିଛନ୍ତି। ଅଜିଙ୍କ୍ୟ ରାହାନେ ଅଷ୍ଟ୍ରେଲିଆରେ ୧୨୫ ରନ୍ର ଶତକୀୟ ଇନିଂସ ଖେଳିଥିଲେ। ତାଙ୍କ ଆଭରେଜ (୪୧.୧୨) ଅନ୍ୟମାନଙ୍କ ଅପେକ୍ଷା ଖୁବ୍ ଭଲ ରହିଛି। ରିଷଭ ପନ୍ତ ଜଣେ ଦକ୍ଷତାସମ୍ପନ୍ନ ଖେଳାଳି। କିନ୍ତୁ ତାଙ୍କ ଉପରେ ସମାନ ପରିମାଣର ଧ୍ୟାନ ଦେବାକୁ ପଡ଼ିବ।
ବର୍ତ୍ତମାନ କୋହଲିଙ୍କୁ ୩ୟ କ୍ରମରେ ବ୍ୟାଟିଂ କରିବା ଦରକାର ନେଇ ଆଲୋଚନା ହେଉଛି। ହନୁମା ବିହାରୀ ଓ ଲୋକେଶ ରାହୁଲ ମଧ୍ୟ କ୍ରମ ବ୍ୟାଟିଂ ସମ୍ଭାଳିବେ। ଯାହା ଫଳରେ ପୂଜାରା ଦଳରୁ ବାଦ୍ ପଡ଼ିପାରନ୍ତି। ଏହା ଟେଷ୍ଟ ସ୍ପେଶାଲିଷ୍ଟ ପାଇଁ ଏକ ଚେତାବନୀ ସଦୃଶ। ବ୍ୟାଟିଂ ଶୈଳୀରେ ପରିବର୍ତ୍ତନ କର ନ ହେଲେ ଅନ୍ୟଙ୍କ ପାଇଁ ବାଟ ଛାଡ଼।
ବୋଲିଂ ବିଭାଗର କର୍ଣ୍ଣଧାର ଯଶପ୍ରୀତ ବୁମରା ସଠିକ୍ ଲେନ୍ଥ ଖୋଜୁଛନ୍ତି। ଏହା ଉପରେ କାମ କରିବା ଲାଗି ତାଙ୍କ ପାଖରେ ୫ ସପ୍ତାହ ଅଛି। ଟେଷ୍ଟ କ୍ରିକେଟରେ ୧୪ ବର୍ଷ ପୂରଣ କରିସାରିଥିବା ୩୨ ବର୍ଷୀୟ ଇଶାନ୍ତ ଶର୍ମା ପୂର୍ବ ଭଳି ଏବେ ଲମ୍ବା ସ୍ପେଲ ପକାଇ ପାରୁନାହାନ୍ତି। ଡବ୍ଲ୍ୟୁଟିସି ଫାଇନାଲରୁ ଏତିକି ସ୍ପଷ୍ଟ ଯେ, ଇଂଲଣ୍ଡ ବିପକ୍ଷରେ ଭଲ ଫଳାଫଳ ପାଇଁ ୪ ପେସରଙ୍କୁ ଖେଳିବାକୁ ପଡ଼ିବ। ଏଣୁ ଆଶା କରାଯାଉଛି, ମହମ୍ମଦ ସିରାଜଙ୍କୁ ପ୍ରତ୍ୟେକ ଟେଷ୍ଟରେ ସୁଯୋଗ ମିଳିବ। ପଦାର୍ପଣ ଅପେକ୍ଷାରେ ଥିବା ୨୪ ବର୍ଷୀୟ ଅଭେଶ ଖାନଙ୍କୁ ଦଳୀୟ ଏକାଦଶରେ ଖୁବ୍ ଶୀଘ୍ର ଯାଗା ମିଳିପାରେ। ଶାର୍ଦ୍ଦୁଳ ଠାକୁରଙ୍କୁ ଅଲରାଉଣ୍ଡର ଭାବେ ଖେଳାଇବାକୁ ଚିନ୍ତା କରୁଛି ଟିମ୍ ମ୍ୟାନେଜମେଣ୍ଟ।
