ମୁମ୍ବାଇ,୩।୨: ‘ଆମେ ସମସ୍ତେ ଚୋର’ ଏହା କୌଣସି ବଲିଉଡ୍ ଫିଲ୍ମର ଡାଏଲଗ୍ ନୁହେଁ, ଏହା ହେଉଛି ମୁମ୍ବାଇର ଏକ ପରିବାରର ନିରାଟ ସତ କାହାଣୀ। କାରଣ ଏହି ପରିବାରର ପ୍ରତ୍ୟେକ ସଦସ୍ୟ ଚୋର। ପୋଲିସ ସୂଚନାନୁଯାୟୀ, ଏହି ପରିବାର ନାଁରେ ଗୋଟିଏ କି ଦୁଇଟି ନୁହେଁ, ୫୦ ଚୋରିର ଅଭିଯୋଗ ରହିଛି।
ମହାରାଷ୍ଟ୍ର ବ୍ୟତୀତ ଏମାନେ ତେଲେଙ୍ଗାନା ଏବଂ ଛତିଶଗଡ଼ର ଜୁଏଲାରୀ ଦୋକାନରୁ ମଧ୍ୟ ଚୋରି କରନ୍ତି। ମାଲାଡ ଓ୍ବେଷ୍ଟର କୁରାର ଥାନା ଅଧୀନରେ ଥିବା ଏକ ଜୁଏଲାରୀ ଦୋକାନରୁ ଚୋରି କରିବା ପରେ ଏହି ଘଟଣାର ପର୍ଦ୍ଦାଫାସ ହୋଇଛି। ଏହି ଚୋରିରେ ପରିବାରର ୫ ସଦସ୍ୟଙ୍କୁ ଗିରଫ କରିବାରେ ପୋଲିସ ସଫଳତା ହାସଲ କରିଛି।
୧୩ ଜାନୁୟାରୀ ୨୦୨୧ରେ କୁରାର କ୍ଷେତ୍ରର ମୟୁର ଜୁଏଲାର୍ସରୁ ୧୦ ଭରି ସୁନା ଚୋରି ଯାଇଥିବା ଥାନାରେ ଅଭିଯୋଗ ହୋଇଥିଲା। ଦୋକାନୀ ମାଲିକ ପୋଲିସକୁ କହିଥିଲେ କି, ୧୩ ଜାନୁୟାରୀ ଅପରାହ୍ନ ୨ଟାରେ ଏକ କଳା ଏବଂ ହଳଦିଆ ରଙ୍ଗର ଟ୍ୟାକ୍ସିରେ କିଛି ଲୋକ ତାଙ୍କ ଦୋକାନକୁ ଆସିଥିଲେ। ତିନି ଜଣ କିଛି ସମୟ ପର୍ଯ୍ୟନ୍ତ ସୁନାଗହଣା ଦେଖିବା ପରେ ଚାଲିଯାଇଥିଲେ। ଏହା ପରେ ତାଙ୍କ ଦୋକାନରେ ୧୦ ଭରି ସୁନା ନ ଥିବା ସେ ଜାଣିବାକୁ ପାଇଥିଲେ। ଦୋକାନରେ ଲାଗିଥିବା ସିସିଟିଭିରେ ଏହି ଘଟଣା ରେକର୍ଡ ହୋଇଛି। ଏହାକୁ ଆଧାର କରି କୁରାରର ବରିଷ୍ଠ ପୋଲିସ ନିରୀକ୍ଷକ ପ୍ରକାଶ ବେଲେଙ୍କ ନେତୃତ୍ୱରେ ପୋଲିସ ଟିମ୍ ଯାଞ୍ଚ ଆରମ୍ଭ କରିଥିଲା।
ତଦନ୍ତ ସମୟରେ ଜଣାପଡ଼ିଥିଲା କି ଏହି ଚୋରମାନେ ପୁଣେ ଅଞ୍ଚଳର। ପୋଲିସ ଏହି ଘଟଣାରେ ସଂପୃକ୍ତ ରେଖା ହେମରାଜ(୪୫), ଅକ୍ଷୟ ହେମରାଜ ବାଣୀ(୧୯), ଶେଖର ହେମରାଜ(୨୮), ରେଣୁକା ଶେଖର ବାଣୀ (୨୩), ନରେନ୍ଦ୍ର ଅଶୋକ ସାଲୁଙ୍ଖେ(୩୫)ଙ୍କ ସମେତ ଟ୍ୟାକ୍ସି ଡ୍ରାଇଭର ଆଶୁତୋଷ ମିଶ୍ରଙ୍କୁ ଗିରଫ କରିଛି।
ପୋଲିସ କହିଛି, ଏମାନଙ୍କ ନାମରେ ମହାରାଷ୍ଟ୍ର ବ୍ୟତୀତ ଅନ୍ୟ ସ୍ଥାନରେ ମଧ୍ୟ ଚୋରି ଅଭିଯୋଗ ରହିଛି। ଏମାନଙ୍କ ନିକଟରୁ ୧ ଲକ୍ଷ ୯୦ ହଜାର ଟଙ୍କାର ସୁନା ଜବତ କରାଯାଇଛି। ଆଉ ୩ ଅଭିଯୁକ୍ତ ଫେରାର ଅଛନ୍ତି। ସେମାନଙ୍କୁ ଖୁବ୍ ଶୀଘ୍ର ଗିରଫ କରାଯିବ।
