ସୋନପୁର,୨୯।୧(ମୃତ୍ୟୁଞ୍ଜୟ ଶତପଥୀ): ସୁବର୍ଣ୍ଣପୁର ଗାନ୍ଧୀ ପଡିଆରେ ଜିଲା କ୍ରିକେଟ୍ ସଂଘ ଆନୁକୂଲ୍ୟରେ ଚାଲିଥିବା ୩୫ତମ ସର୍ବଭାରତୀୟ ଲାଲମନି କ୍ରିକେଟ୍ ଟୁର୍ନାମେଣ୍ଟ ରବିବାର ଉଦ୍ଯାପିତ ହୋଇଯାଇଛି। ଫାଇନାଲ ମ୍ୟାଚ୍ ଏସ୍ଓସି ବ୍ଲାଷ୍ଟର ଆସାନସୋଲ, ପଶ୍ଚିମବଙ୍ଗ ଓ ଏମ୍ଏମ୍ସିସି ସମ୍ବଲପୁର ମଧ୍ୟରେ ଅନୁଷ୍ଠିତ ହୋଇଥିଲା। ପ୍ରଥମେ ଅନୁଷ୍ଠିତ ଟି ୨୦ ମାଚ୍ରେ ବ୍ଲାଷ୍ଟର ଦଳ ପ୍ରଥମେ ବ୍ୟାଟିଂ କରି ୧୯.୪ ଓଭରରେ ସମସ୍ତ ଉଇକେଟ୍ ହରାଇ ୧୧୮ ରନ କରିଥିଲା। ଦଳ ପକ୍ଷରୁ ଶୁଭମ ସିଂ ୫୦ରନ ଓ ମାର୍ସଲ ଚାପଲା ୨୧ରନ କରିଥିଲେ। ସମ୍ବଲପୁରର ପପୁ ରାୟ ୪ ଓ ରଜତ ଶର୍ମା ୨ ଉଇକେଟ ଅକ୍ତିଆର କରିଥିଲେ। ଜବାବରେ ସମ୍ବଲପୁର ଦଳ ୧୧୯ରନର ବିଜୟ ଲକ୍ଷ୍ୟକୁ ୧୫.୨ ଓଭରରେ ୨ ଉଇକେଟ ବିନିମୟରେ ଅନାୟସରେ ଅତିକ୍ରମ କରିନେଇଥିଲା। ଦଳ ପକ୍ଷରୁ ଟପ୍ ସ୍କୋରର ଗୌରବ ତୋମାରଙ୍କ ୫୩ ଏବଂ ସଞ୍ଜିବ ସିଂ ୨୭ ଓ ଅଭିନନ୍ଦନ ସିଂ ୨୫ରନ କରିଥିଲେ।
ପଶ୍ଚିମବଙ୍ଗ ଦଳର ସତ୍ୟମ କୁମାର ଓ ସୌରଭ କୁମାର ଗୋଟିଏ ଲେଖାଏ ଉଇକେଟ୍ ଅକ୍ତିଆର କରିଥିଲେ। ଟୁର୍ନାମେଣ୍ଟ ନିୟମାନୁସାରେ ସମ୍ବଲପୁର ଦଳକୁ ବୋନସ ୬ ରନ ମିଳିଥିଲା। ପରେ ଅନୁଷ୍ଠିତ ଟି୧୦ମ୍ୟାଚ୍ରେ ପଶ୍ଚିମବଙ୍ଗ ଦଳ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ଓଭରରେ ୮ ଉଇକେଟ ହରାଇ ୪୯ ରନ କରିଥିଲା। ଦଳ ପକ୍ଷରୁ ଅଜୟ ସାହୁ ୨୧ରନ କରିଥିଲେ। ସମ୍ବଲପୁର ପକ୍ଷରୁ ପ୍ରୟାସ ରାୟ ୩ ଓ ପପୁ ରାୟ ୨ ଉଇକେଟ୍ ନେଇଥିଲେ। ଜବାବରେ ସମ୍ବଲପୁର ଦଳ ୬.୪ ଓଭରରେ ୩ ଉଇକେଟ୍ ବିନିମୟରେବିଜୟ ପାଇଁ ଆବଶ୍ୟକ ରନ ସଂଗ୍ରହ କରିନେଇଥିଲା । ଦଳ ପକ୍ଷରୁ ଗୌରବ ତୋମାର ସର୍ବାଧିକ ୩୧ରନ କରିଥିଲେ। ସମ୍ବଲପୁର ଦଳ ୭ ଉଇକେଟ୍ରେ ଉଭୟ ଫର୍ମାଟରେ ମ୍ୟାଚ ଜିତି ଟୁର୍ନାମେଣ୍ଟର ଚାମ୍ପିୟନ ହୋଇଥିଲା। ସୋନପୁର ବିଧାୟକ ତଥା ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ଏବଂ ସଂସଦୀୟ ବ୍ୟାପାର ମନ୍ତ୍ରୀ ନିରଞ୍ଜନ ପୂଜାରୀ ମୁଖ୍ୟ ଅତିଥି ଭାବେ ଯୋଗଦେଇ ଚାମ୍ପିୟନ ଓ ରନର ଅପ୍ ଦଳକୁ ଟ୍ରଫି ଓ ଅର୍ଥରାଶି ପ୍ରଦାନ କରିଥିଲେ। ସମ୍ମାନିତ ଅତିଥି ଭାବେ ପ୍ରାକ୍ତନ ଆନ୍ତର୍ଜାତୀୟ କ୍ରିକେଟ୍ ଖେଳାଳି ହରବିନ୍ଦର ସିଂ, ଓଡିଶା କ୍ରିକେଟ ସଂଘର ସମ୍ପାଦକ ସଞ୍ଜୟ ବେହେରା, ଓଡିଶା କ୍ରିକେଟ ଏକାଡେମୀର ୧୯ବର୍ଷରୁ କମ୍ କ୍ରିକେଟ୍ ଦଳର କୋଚ ଶୋଭନ ଦେବ, ସାମାଜିକକର୍ମୀ ଶ୍ରୀବତ୍ସ ମଲ୍ଳିକ, ଝାରସୁଗୁଡା ଜିଲା କ୍ରିକେଟ ସଂଘର ସମ୍ପାଦକ ମେହେତାବ ଖାଁ, ବୌଦ୍ଧ ଜିଲା କ୍ରିକେଟ୍ ସଂଘର ସମ୍ପାଦକ ଯୁଗଳ ସାମଲ ଯୋଗଦାନ କରିଥିଲେ। ସୁବର୍ଣ୍ଣପୁର ଜିଲା କ୍ରିକେଟ୍ ସଂଘର ସଭାପତି ରାମଶଙ୍କର ସାହୁ ଓ ସମ୍ପାଦକ ପ୍ରଦୀପ ସେଠୀ ମଞ୍ଚାସିନ ଥିଲେ। ସମ୍ବଲପୁର ଦଳର ଗୌରବ ତୋମାରଙ୍କୁ ମ୍ୟାନ୍ ଅଫ ଦି ମାଚ୍ ଓ ବେଷ୍ଟ ବ୍ୟାଟ୍ସମ୍ୟାନ୍, ଅଭିନନ୍ଦନ ସିଂଙ୍କୁ ମ୍ୟାନ୍ ଅଫ ଦି ସିରିଜ୍ ଓ ବେଷ୍ଟ ବୋଲର ଏବଂ ପଶ୍ଚିମବଙ୍ଗର ସଚିନ ମିଶ୍ରଙ୍କୁ ବେଷ୍ଟ ଉଇକେଟକିପର ପୁରସ୍କାର ପ୍ରଦାନ କରା ଯାଇଥିଲା। ମ୍ୟାଚ୍ ପରିଚାଳନା କରିଥିଲେ ଓସିଏ ସ୍ବୀକୃତିପ୍ରାପ୍ତ ଅମ୍ପାୟର ପୃଥ୍ବୀରାଜ ମିଶ୍ର ଓ ସତ୍ୟପ୍ରସାଦ ରଥ।
