ଜଗତ୍ସିଂହପୁର, ୧୮ା୮(ପ୍ରମୋଦ କୁମାର ନାୟକ): ୨୦୨୪ସାଧାରଣ ନିର୍ବାଚନକୁ ନେଇ ଏବେଠାରୁ ପ୍ରମୁଖ ରାଜନୈତିକ ଦଳଗୁଡ଼ିକ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଗଲାଣି। ସମୟ ଯେତିକି ପାଖେଇ ଆସୁଛି ରାଜନୈତିକ ଚର୍ଚ୍ଚା ମଧ୍ୟ ସେତିକି ହେଉଛି। ଏ ପରିସ୍ଥିତିରେ ଜଗତ୍ସିଂହପୁର ଜିଲା ପାରାଦୀପ ବିଧାନସଭା ନିର୍ବାଚନ ମଣ୍ଡଳୀର ରାଜନୈତିକ ଉଷ୍ମତା ବଢ଼ିବାରେ ଲାଗିଛି। ବିଗତ ୩ ନିର୍ବାଚନକୁ ଅନୁଧ୍ୟାନ କଲେ ଜଣାଯାଏ ବିଜେଡି ପ୍ରାର୍ଥୀମାନେ ବିଜୟୀ ହୋଇଛନ୍ତି। ଦ୍ୱିତୀୟ ସ୍ଥାନରେ କଂଗ୍ରେସ ଓ ତୃତୀୟରେ ଭାଜପା ରହିଛି। କିନ୍ତୁ ୨୦୧୯ ନିର୍ବାଚନ ପରେ ଏହି ନିର୍ବାଚନ ମଣ୍ଡଳୀରେ କଂଗ୍ରେସ ଦୁର୍ବଳ ହେବା ପ୍ରକାରାନ୍ତରେ ବିଜେଡି ଅପେକ୍ଷା ଭାଜପାକୁ ସୁହାଇଛି। ବିଶେଷକରି ଭାଜପା ନେତା ସମ୍ପଦ ସ୍ବାଇଁଙ୍କ ନେତୃତ୍ୱ ବିଜେଡି ପାଇଁ ଚିନ୍ତାର କାରଣ ହୋଇଛି। ଏନେଇ ଚର୍ଚ୍ଚା ଜୋର ଧରିଛି।
୨୦୦୯ ନିର୍ବାଚନରେ ବିଜେଡି ପ୍ରାର୍ଥୀ ଦାମୋଦର ରାଉତଙ୍କୁ ୫୩%, ସ୍ବାଧୀନ ପ୍ରାର୍ଥୀ ରମେଶ ସାମନ୍ତରାୟଙ୍କୁ ୨୯% ଓ କଂଗ୍ରେସର ପ୍ରମୋଦ କିଶୋର ଜେନାଙ୍କୁ ୧୧% ଭୋଟ ମିଳିଥିଲା। ବିଜେଡି ଓ ସ୍ବାଧୀନ ପ୍ରାର୍ଥୀଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହୋଇଥିଲା। ବିଜେଡି ପ୍ରାର୍ଥୀ ୩୦,୩୫୧ ଖଣ୍ଡ ଭୋଟ ବ୍ୟବଧାନରେ ସ୍ବାଧୀନ ପ୍ରାର୍ଥୀଙ୍କୁ ହରାଇଥିଲେ। ୨୦୧୪ରେ ଚିତ୍ର ବଦଳି ଥିଲା। ଏହି ନିର୍ବାଚନରେ ଦାମୋଦର ରାଉତ ପୁଣିଥରେ ବିଜେଡି ପ୍ରାର୍ଥୀ ହୋଇ ୬୦% ଭୋଟ ପାଇଥିଲେ। ସେତେବେଳେ କଂଗ୍ରେସ ପକ୍ଷରୁ ପ୍ରାର୍ଥୀ ବଦଳି ଥିଲା। ପ୍ରମୋଦଙ୍କ ସ୍ଥାନରେ ବାପି ସର୍ଖେଲଙ୍କୁ ପ୍ରାର୍ଥୀ କରି ଦଳ ଭଲ ପ୍ରଦର୍ଶନ କରିଥିଲା। ଅର୍ଥାତ୍ ବାପିଙ୍କ ସପକ୍ଷରେ ୩୩% ଭୋଟ ଯାଇଥିଲା। ଭାଜପା ପ୍ରାର୍ଥୀ ଦୀପ୍ତିରେଖା ନାୟକଙ୍କୁ ମାତ୍ର ୪% ଭୋଟ ମିଳିଥିଲା। ଏହି ନିର୍ବାଚନରେ କଂଗ୍ରେସଠାରୁ ବିଜେଡି ପ୍ରାର୍ଥୀ ୩୮,୬୦୦ ଖଣ୍ଡ ଅଧିକ ଭୋଟ ପାଇ ବିଜୟୀ ହୋଇଥିଲେ। ଏଥିରୁ ସ୍ପଷ୍ଟ ଯେ ବିଜେଡି, କଂଗ୍ରେସ ଭୋଟ ତୁଳନାରେ ଭାଜପାର ସ୍ଥିତି ଅତି ଦୁର୍ବଳ ଥିଲା। କିନ୍ତୁ ୨୦୧୯ ନିର୍ବାଚନରେ ବିଜେଡି, କଂଗ୍ରେସ ତୁଳନାରେ ଭାଜପା ସ୍ଥିତି ଆଶାତୀତ ଭାବେ ସୁଦୃଢ ହୋଇଥିବା ପ୍ରମାଣିତ ହୋଇଛି। ବଡ଼ କଥା ହେଲା ଏହି ନିର୍ବାଚନରେ ବରିଷ୍ଠ ନେତା ଦାମୋଦର ରାଉତଙ୍କୁ ବିଜେଡି ଟିକେଟ୍ ନ ଦେଇ ତାଙ୍କ ପୁଅ ସମ୍ବିତଙ୍କୁ ପ୍ରାର୍ଥୀ କରିଥିଲା। ସମ୍ବିତ ୪୫% ଭୋଟ ପାଇ ଜିତିଥିଲେ ସୁଦ୍ଧା ଦଳ ୧୫% କମ୍ ଭୋଟ ପାଇଥିଲା। କଂଗ୍ରେସ ପ୍ରାର୍ଥୀ ବାପି ମଧ୍ୟ ୨% କମ ଅର୍ଥାତ୍ ୩୧% ଭୋଟ ପାଇଥିଲେ। କିନ୍ତୁ ଭାଜପା ସପକ୍ଷରେ ୧୮% ଅଧିକ ଅର୍ଥାତ୍ ୨୨% ଭୋଟ ଯିବା ଆଲୋଚନାର ବିଷୟ ହୋଇଥିଲା। କାରଣ ଭାଜପା ପକ୍ଷରୁ ଦୀପ୍ତିରେଖାଙ୍କ ବଦଳରେ ସମ୍ପଦଙ୍କୁ ପ୍ରାର୍ଥୀ କରାଯିବାରୁ ଏଭଳି ସଫଳତା ମିଳିଥିଲା। ଏହି ନିର୍ବାଚନରେ ଦାମ ରାଉତଙ୍କ ପୁଅ ହୋଇଥିବା ସାଙ୍ଗକୁ ବିଜେଡି ଫ୍ଲୋ ସମ୍ବିତଙ୍କୁ ବିଜୟୀ କରିବାରେ କେତେକାଂଶରେ ସହାୟତା କରିଥିଲା। ପରବର୍ତ୍ତୀ ସମୟରେ ବିଜେଡିରେ ଗୋଷ୍ଠୀ କନ୍ଦଳ ସମ୍ବିତଙ୍କ ପାଇଁ ଅଡୁଆ ପରିସ୍ଥିତି ସୃଷ୍ଟି କରିଛି। ଅନ୍ୟପକ୍ଷେ କଂଗ୍ରେସ ନେତା ବାପି ମଧ୍ୟ ୨୦୧୯ ନିର୍ବାଚନ ପରଠାରୁ ଏପରି କି ପୌର ନିର୍ବାଚନରେ ମଧ୍ୟ ଏକ ପ୍ରକାର ନୀରବ ରହିଥିଲେ। ଏହାର ଫାଇଦା ଭାଜପା ନେତା ସମ୍ପଦ ନେଉଛନ୍ତି। କଂଗ୍ରେସ ଭୋଟ ହାତେଇବା ପାଇଁ ଜୋରଦାର ଲାଗି ପଡିଛନ୍ତି। ନିର୍ବାଚନ ମଣ୍ଡଳୀର ସର୍ବାଧିକ ଭୋଟର କୁଜଙ୍ଗ ବ୍ଲକ ଅଞ୍ଚଳରେ ଅଛନ୍ତି। ଏହି ବ୍ଲକର ଅନେକ କଂଗ୍ରେସ ଭୋଟରଙ୍କୁ ନିଜ ସପକ୍ଷରେ ଆଣିବାରେ ସମ୍ପଦ ସଫଳ ହୋଇଛନ୍ତି। ସେ ଏକଥା ମଧ୍ୟ କହିଛନ୍ତି ଆଗାମୀ ନିର୍ବାଚନରେ ଭାଜପା ତାର ଦୃଢ ସ୍ଥିତି ପ୍ରଦର୍ଶନ କରିବାକୁ ଯାଉଛି। ଏ ସମ୍ପର୍କରେ ବାପି ଓ ସମ୍ବିତଙ୍କ ସହ ଯୋଗାଯୋଗ ପାଇଁ ଚେଷ୍ଟା କରାଯାଇଥିଲେ ସୁଦ୍ଧା ସମ୍ଭବ ହୋଇ ନ ଥିଲା।
