ଜୟପୁର, ୩୦ା୫(ନି.ପ୍ର.): ନିଖିଳ ଓଡ଼ିଶା ଇପିଏଫ୍ ପେନସନ ଅନ୍ତର୍ଭୁକ୍ତ ବରିଷ୍ଠ ଶ୍ରମିକ କର୍ମଚାରୀଙ୍କ ଏକ ସଭା ସ୍ଥାନୀୟ ଯାଦବ ଭବନରେ କୋରାପୁଟ ଜିଲା ଶାଖା ସଭାପତି ନଳିନୀକାନ୍ତ ରଥଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି।ଏହି ସଭାରେ ଓଏଏସ୍ଆର୍ଟିସି, ଯୋଗାଣ ନିଗମ, ଉଠାଜଳସେଚନ ନିଗମ, ରାଜ୍ୟ କୃଷି ନିଗମ, ବିହନ ନିଗମ, ଓଡ଼ିଶା ମାଧ୍ୟମିକ ଶିକ୍ଷକ ସଂଘ, ସେବା କାଗଜ କଳ, ବିଭିନ୍ନ ସରକାରୀ ଓ ବେସରକାରୀ ସଂସ୍ଥାର ପେନସନଭୋଗୀ ଶ୍ରମିକ କର୍ମଚାରୀ ସଂଘ ଓ ସଭ୍ୟମାନେ ଯୋଗ ଦେଇଥିଲେ। ସିଟି କୋଅର୍ଡିନେଶନ୍ ଅଫ୍ ୟୁନିୟନ୍ସ ଆସୋସିଏଶନ୍ ସାଧାରଣ ସମ୍ପାଦକ ପ୍ରମୋଦ କୁମାର ମହାନ୍ତି ଇପିଏଫରେ ବହୁତ ବ୍ୟତିକ୍ରମ ହେଉଛି ବୋଲି କହିଛନ୍ତି। କେତେକ ସ୍ଥାନରେ ଇପିଏଫରେ ଅନ୍ତର୍ଭୁକ୍ତ କରାଯାଉନାହିଁ, ଇପିଏଫ୍ କାଟି ଜମା ହେଉନାହିଁ। ଏସବୁ ବିରୋଧରେ ସ୍ବର ଉତ୍ତୋଳନ କରିବା ସହ ସବୁ କ୍ଷେତ୍ରର ବ୍ୟକ୍ତିଙ୍କୁ ୬୦ ବର୍ଷ ପରେ ପେନ୍ସନ ସୁବିଧା ଯୋଗାଇ ଦେବାକୁ ଦାବି ହୋଇଛି। ପେନ୍ସନ ବୃଦ୍ଧାବସ୍ଥାରେ ମଣିଷ ପାଇଁ ସାହାଯ୍ୟକାରୀ ହୋଇଥାଏ। ଅନେକ ରାଜ୍ୟରେ ୬୦ବର୍ଷ ପରେ ମାସକୁ ୧ହଜାରରୁ ୨୫ଶହ ପର୍ଯ୍ୟନ୍ତ ବାର୍ଦ୍ଧକ୍ୟ ଭତ୍ତା ଦିଆଯାଉଛି। ସେତିକିବେଳେ ଯେଉଁମାନେ ଇପିଏଫକୁ ଯୋଗଦାନ କରୁଛନ୍ତି ସେମାନଙ୍କୁ ମାତ୍ର ୩ହଜାର ନ ଦେଇ ୯ହଜାରରୁ ଊର୍ଦ୍ଧ୍ୱ ଟଙ୍କା ଦେବାକୁ ଯେଉଁ ଦାବି ହୋଇଛି, ତାହାକୁ ଶ୍ରମିକମାନେ ସମର୍ଥନ କରିବାକୁ ସେ ଆହ୍ବାନ ଦେଇଛନ୍ତି। ସଭାପତି ନଳିନୀକାନ୍ତ ରଥ ରାଜ୍ୟସ୍ତରୀୟ ଦାବିପତ୍ରକୁ ଉପସ୍ଥାପନ କରିଥିଲେ।
ମାସିକ ପେନସନ ୯୦୦୦, ସୁପ୍ରିମକୋର୍ଟଙ୍କ ନିଷ୍ପତ୍ତି ଅନୁଯାୟୀ ବର୍ଦ୍ଧିତ ପେନସନ, ସମସ୍ତ ଇପିଏଫ ପେନସନ ଭୋଗୀଙ୍କୁ ନିଃଶୁଳ୍କ ସ୍ବାସ୍ଥ୍ୟ ସେବା ଯୋଗାଇବାକୁ ଦାବି ହୋଇଛି। ଏହି ଦାବି ପୂରଣ ପାଇଁ ଓଡ଼ିଶାରୁ ୩୦ହଜାର ପେନ୍ସନ ଭୋଗୀ ପ୍ରଧାନମନ୍ତ୍ରୀଙ୍କୁ ପୋଷ୍ଟକାର୍ଡ ମାଧ୍ୟମରେ ଜୁନ୍ ମାସ ଭିତରେ ଚିଠି ଦେବେ। କୋରାପୁଟରୁ ୧୦୦୦ ଚିଠି ଯିବ। ନଭେମ୍ବର ୧୬ ସୁଦ୍ଧା କେନ୍ଦ୍ର ସରକାରଙ୍କ ପେନସନ ନୀତିକୁ ବିରୋଧ ସହ ଦାବି କାର୍ଯ୍ୟକାରୀ କରିବାକୁ ଜିଲାପାଳଙ୍କ ଜରିଆରେ ପ୍ରଧାନମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରାଯିବ। ଏହି ସଭାରେ ଅନ୍ୟମାନଙ୍କ ମଧ୍ୟରେ କାହ୍ନୁଚରଣ ପାଢୀ, ରାମକୃଷ୍ଣ ସାବତ, ଦାମୋଦର ରଣା, ଭାଗିରଥି ରେଡ୍ଡୀ ପ୍ରମୁଖ ଉପସ୍ଥିତ ଥିଲେ। କୋଅର୍ଡିନେଶନ୍ କମିଟି ସଂଗଠନ ସମ୍ପାଦକ ଯୁଧିଷ୍ଠିର ରାଉଳ ଧନ୍ୟବାଦ ଅର୍ପଣ କରିଥିଲେ।
