ଆଲିଗଡ,୨୯ ।୯: ଉତ୍ତର ପ୍ରଦେଶର ଆଲିଗଡ଼ ଲୋଧା ଥାନା ଅଞ୍ଚଳରେ ଅଲ ଦୁଆ ମିଟ ଫ୍ୟାକ୍ଟ୍ରିରେ ଗୁରୁବାର ଏକ ବଡ ଦୁର୍ଘଟଣା ଘଟିଛି । ଏଠାରେ ପ୍ୟାକେଜିଂ ଡିପାର୍ଟମେଣ୍ଟରେ ଆମୋନିଆ ଗ୍ୟାସ ଲିକ ହେବାରୁ ସେଠାରେ କାମ କରୁଥିବା ମହିଳା କର୍ମଚାରୀ ବେହୋସ ହାଇଯାଇଥିଲେ । ଏମାନଙ୍କ ସଂଖ୍ୟା ପ୍ରାୟ ୫୦ ହେବ । ତୁରନ୍ତ ଏମାନଙ୍କୁ ଏକ ବସ ଯୋଗେ ମେଡିକାଲ କଲେଜ ପଠାଇ ଦିଆଯାଇଛି ।
ଘଟଣା ସମ୍ପର୍କରେ ଖବର ମିଳିବା ପରେ ତୁରନ୍ତ ଘଟଣା ସ୍ଥଳରେ ଡିଏମ ଓ ଏସଏସପି ସମେତ ବହୁ ପ୍ରଶାସନିକ ଅଧିକାରୀ ପହଞ୍ଚିଯାଇଥିଲେ । ଡିଏମ ତୁରନ୍ତ ଆହତଙ୍କ ଚିକିତ୍ସା କରିବାକୁ ନିର୍ଦ୍ଦେଶ ଦେଇଛନ୍ତି । ଜିଲାପାଳ ଏ ସମ୍ପର୍କରେ ଗଣମାଧ୍ୟମକୁ ସୂଚନା ଦେବା ସହ ଭୟଭୀତ ହେବାର କୌଣସି କାରଣ ନାହିଁ ବୋଲି କହିଛନ୍ତି । ଏକ ଡାକ୍ତରୀ ଟିମ ଆହତଙ୍କୁ ଚିକିତ୍ସା କରୁଥିବା ବେଳେ ଏବେ ସେମାନଙ୍କ ଅବସ୍ଥା ସ୍ଥିର ରହିଛି ଓ କୌଣସି ବିପଦ ନାହିଁ ବୋଲି ଡାକ୍ତରମାନେ କହିଛନ୍ତି ।
