ନୂଆଦିଲ୍ଲୀ,୧୭।୪: ଲୋକ ସଭା ନିର୍ବାଚନ ପାଇଁ ବିଭିନ୍ନ ଦଳର ନେତାମାନେ ଜୋରସୋରରେ ପ୍ରଚାର ଚଳାଇଛନ୍ତି। ଏଥିସହ ଭୋଟରଙ୍କୁ ଆକୃଷ୍ଟ କରିବା ପାଇଁ ନେତାମାନେ ବିଭିନ୍ନ ପ୍ରତିଶ୍ରୁତି ଦେଉଥିବା ଦେଖିବାକୁ ମିଳିଛି। ଏହି କ୍ରମରେ ଉତ୍ତର-ପୂର୍ବ ଦିଲ୍ଲୀ ଆସନ ପାଇଁ ନିର୍ବାଚନ ଲଢ଼ୁଥିବା ସାନ୍ଝି ବିରାସତ ଦଳର ଆଶାୟୀ ପ୍ରାର୍ଥୀ ନିଜର ପ୍ରଚାର ପାଇଁ ଜନତାଙ୍କୁ ନିଆରା ପ୍ରତିଶ୍ରୁତି ଦେଇଥିବା ଦେଖିବାକୁ ମିଳିଛି। ଉକ୍ତ ଦଳର ଆଶାୟୀ ପ୍ରାର୍ଥୀ ଅମିତ ଶର୍ମା ନିର୍ବାଚନ ଜିତିଲେ ଇଦ୍ରେ ମୁସଲମାନମାନଙ୍କୁ ମାଗଣାରେ ଛେଳି ଦେବା ସହ ମଦର ଦାମ୍କୁ ଅଧା କମାଇ ଦିଆଯିବ। ଏଥିସହ ମହିଳାଙ୍କୁ ମାଗଣାରେ ସୁନା ଦିଆଯିବ ବୋଲି ସେ କହିଛନ୍ତି। ସୂଚନାଯୋଗ୍ୟ, ଅମିତ ନିଜ ପ୍ରଚାର ପୋଷ୍ଟରରେ ସେହି ପ୍ରସଙ୍ଗକୁ ସ୍ଥାନ ଦେଇଛନ୍ତି ଯେଉଁଗୁଡ଼ିକୁ ଦଳ ଭୋଟରଙ୍କୁ ଦେବାକୁ ଚାହଁୁଛି। ଭୋଟରଙ୍କୁ ଆକୃଷ୍ଟ କରିବା ପାଇଁ ଦଳ ଏହି ଅଫରକୁ ‘ପ୍ରତିଶ୍ରୁତି’ ବଦଳରେ ଏହାକୁ ‘ପ୍ରସଙ୍ଗ’ ବୋଲି କହିଛି। ଏହି ପ୍ରସଙ୍ଗରେ ରହିଛି ପିଏଚ୍ଡି ପର୍ଯ୍ୟନ୍ତ ଛାତ୍ରଙ୍କ ପାଇଁ ଫିସ୍ ଦେୟ ମୁକ୍ତ, ବସ୍ ଓ ମେଟ୍ରୋ ଟ୍ରେନରେ ଯାତାୟାତ ମାଗଣା। କେବଳ ସେତିକି ନୁହେଁ ପ୍ରାଇଭେଟ ସ୍କୁଲ ଗୁଡ଼ିକରେ ମାଗଣାରେ ପାଠପଢ଼ା, ଝିଅ ଜନ୍ମ ହେଲେ ୫୦ହଜାର ଟଙ୍କା ଓ ସେମାନଙ୍କ ବିବାହ ପାଇଁ ଅଢ଼େଇ ଲକ୍ଷ ଟଙ୍କା ଦିଆଯିବ। ଏଥିସହ ବୃଦ୍ଧ, ବିଧବା ଓ ବିକଳାଙ୍ଗଙ୍କ ପାଇଁ ୫ହଜାର ଟଙ୍କା ପେନ୍ସନ୍, ପ୍ରାଇଭେଟ ହସ୍ପିଟାଲରେ ୧୦ଲକ୍ଷ ଲୋକଙ୍କୁ ମାଗଣାରେ ଚିକିତ୍ସା ସୁବିଧା ଆଦି ପ୍ରସଙ୍ଗକୁ ଅମିତ ନିଜ ପୋଷ୍ଟରରେ ସ୍ଥାନ ଦେଇଛନ୍ତି।
