ମେଲବୋର୍ନ,୨୨ା୧: ଅଷ୍ଟ୍ରେଲିଆନ୍ ଓପନ କ୍ୱାର୍ଟର ଫାଇନାଲ ଲାଇନ୍ଅପ୍ ସୋମବାର ଚୂଡାନ୍ତ ହୋଇଛି। ସୋମବାର ପୁରୁଷ ସିଙ୍ଗଲ୍ସ ପ୍ରି କ୍ୱାର୍ଟର ମ୍ୟାଚ୍ରେ ସ୍ପେନ୍ର କାର୍ଲୋସ୍ ଅଲକାରାଜ ଗାର୍ଫିଆ ଓ ଜର୍ମାନୀର ଆଲେକଜାଣ୍ଡାର ଜେଭରେଭ୍ ବିଜୟୀ ହୋଇଛନ୍ତି। ଓ୍ବିମ୍ବେଲଡନ୍ ବିଜେତା ତଥା ବିଶ୍ୱମାନ୍ୟତାର ୨ ନମ୍ବର ସ୍ଥାନରେ ଥିବା ୨୦ ବର୍ଷୀୟ ଅଲକାରାଜ ୬-୪, ୬-୪ ଓ ୬-୦ରେ ୨ ଘଣ୍ଟାରୁ କମ୍ ସମୟ ନେଇ ମିଓମିର କେମାନୋଭିକ୍ଙ୍କୁ ପରାସ୍ତ କରିଛନ୍ତି।
ରଡ୍ ଲାଭେର ଆରେନାରେ ଖେଳା ଯାଇଥିବା ମ୍ୟାଚ୍ରେ ଅଲକାରାଜ ଗୋଟିଏ ମାତ୍ର ସେଟ୍ ଡ୍ରପ୍ କରିଥିଲେ। ସେହିପରି ବିଶ୍ୱ ମାନ୍ୟତାର ଷଷ୍ଠ ସ୍ଥାନରେ ଥିବା ଜର୍ମାନୀର ଆଲେକ୍ଜାଣ୍ଡାର ଜେଭରେଭ୍ ୫ ସେଟ୍ ବିଶିଷ୍ଟ ସଂଘର୍ଷପୂର୍ଣ୍ଣ ମ୍ୟାଚ୍ରେ କାମେରନ୍ ନୋରିଙ୍କୁ ପରାସ୍ତ କରିଥିଲେ। ମାର୍ଗାରେଟ୍ କୋର୍ଟ ଆରେନାରେ ଖେଳା ଯାଇଥିବା ଏହି ମ୍ୟାଚ୍କୁ ଜେଭ୍ରେଭ୍ ୭-୫, ୩-୬, ୬-୩, ୪-୬ ଓ ୭-୬(୩)ରେ ଜିତି ନେଇଥିଲେ। ମ୍ୟାଚ୍ ଅଧାରେ ଜଣେ ଦର୍ଶକ ଯୁଦ୍ଧ ବିରୋଧୀ ପାମ୍ପଲେଟ୍ ଫୋପାଡିବା କାରଣରୁ ମ୍ୟାଚ୍ଟି ଅଧିକ ବିଳମ୍ବିତ ହୋଇଥିଲା।
ଏହି ମ୍ୟାଚ୍ଟି ୪ଘଣ୍ଟା ଧରି ଚାଲିଥିଲା। ଚଳିତ ବର୍ଷର ଏହା ୩୨ତମ ୫ ସେଟ୍ ବିଶିଷ୍ଟ ମ୍ୟାଚ୍। ଓପନ ଏରାରେ ଏହା ସର୍ବାଧିକ ତଥା ଏକ ବିଶ୍ୱ ରେକର୍ଡ। ଅଲକାରାଜ ଓ ଜେଭ୍ରେଭ୍ ପରସ୍ପରକୁ କ୍ୱାର୍ଟର ଫାଇନାଲରେ ଭେଟିବେ। ୩ ନମ୍ବର ଖେଳାଳି ଡାନିଲ ମେଡଭେଡେଭ ୬-୩, ୭-୬(୪), ୫-୭, ୬-୧ ସେଟ୍ରେ ବିଶ୍ୱ ମାନ୍ୟତାର ୬୯ ନମ୍ବର ସ୍ଥାନରେ ଥିବା ନୁନୋ ବର୍ଗସଙ୍କୁ ପରାସ୍ତ କରି କ୍ୱାର୍ଟରରେ ପ୍ରବେଶ କରିଥିଲେ। ଅନ୍ୟ ଏକ ମ୍ୟାଚ୍ରେ ୯ ନମ୍ବର ଖେଳାଳି ହ୍ୟୁବର୍ଟ ହରକାଜ ୭-୬(୬), ୭-୬(୩) ଓ ୬-୪ ସେଟ୍ରେ ଓ୍ବାଇଲ୍ଡ କାର୍ଡ ଖେଳାଳି ଆର୍ଥର କାଜାକ୍ସଙ୍କୁ ପରାସ୍ତ କରିଥିଲେ।
