ମୁମ୍ବାଇ: ବଲିଉଡର ଖିଲାଡି ଅକ୍ଷୟ କୁମାରଙ୍କ ଚର୍ଚ୍ଚିତ ଫିଲ୍ମ ‘ ଓ୍ବେଲକମ୍-୩’ ସହିତ ଫେରୁଛନ୍ତି। ନିକଟରେ ଓ୍ବେଲକମ୍ ଟୁ ଦ ଜଙ୍ଗଲ’ର ଟିଜର ମୁକ୍ତିଲାଭ କରିଥିଲା, ଯାହା ଦର୍ଶକଙ୍କଠାରୁ ଅନେକ ସକାରାତ୍ମକ ପ୍ରତିକ୍ରିୟା ପାଇଥିଲା। କିନ୍ତୁ ଏହି ସମୟରେ ଫିଲ୍ମକୁ ନେଇ ଏକ ନୂଆ ବିବାଦ ଦେଖାଦେଇଛି। କୁହାଯାଉଛି ଯେ ଫିଲ୍ମର ଶୁଟିଂକୁ ବନ୍ଦ କରିଦିଆଯାଇଛି।
ବାସ୍ତବରେ ଫେଡେରେଶନ ଅଫ ୱେଷ୍ଟର୍ନ ଇଣ୍ଡିଆ ସିନେ କର୍ମଚାରୀ (ଏଫ୍ଡବ୍ଲ୍ୟୁଆଇସିଇ) ଫିଲ୍ମର ନିର୍ମାତା ଫିରୋଜ ନାଡିଆଡୱାଲାଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ଫିରୋଜଙ୍କ ବିରୋଧରେ ଏହି ଅଭିଯୋଗ ଅଛି ଯେ, ଏହି ଫ୍ରାଞ୍ଚାଇଜ୍ର ପୂର୍ବ ଚଳଚ୍ଚିତ୍ରରେ କାମ କରୁଥିବା କର୍ମଚାରୀମାନଙ୍କୁ ସେ ଏପର୍ଯ୍ୟନ୍ତ ପେମେଣ୍ଟ କରିନାହାଁନ୍ତି। ଏହି କର୍ମଚାରୀମାନଙ୍କ ମଧ୍ୟରେ ଅନେକ ଟେକ୍ନିସିଆନ ଏବଂ କଳାକାର ଅନ୍ତର୍ଭୁକ୍ତ, ଯେଉଁମାନେ ଏଯାଏ ଦରମା ପାଇନାହାଁନ୍ତି।
ଏଫ୍ଡବ୍ଲ୍ୟୁଆଇସିଇ ଅନୁଯାୟୀ, ଫିରୋଜ କର୍ମଚାରୀମାନଙ୍କୁ ଦରମା ଦେବା ପାଇଁ ପ୍ରାୟ ୪କୋଟି ଟଙ୍କା କଥା ହୋଇଥିଲେ। କିନ୍ତୁ ପରେ ସେ ଏହାକୁ ୨କୋଟି ଟଙ୍କାକୁ ହ୍ରାସ କରିଥିଲେ। ଯେତେବେଳେ କର୍ମଚାରୀମାନେ ଚେକ୍କୁ ବ୍ୟାଙ୍କକୁ ନେଇକି ଯାଇଥିଲେ, ଚେକ ବାଉନ୍ସ ହୋଇଥିଲା। ଏଭଳି ପରିସ୍ଥିତିରେ ଏଫ୍ଡବ୍ଲ୍ୟୁଆଇସିଇ କହିଛି ଯେ, ପେମେଣ୍ଟ ନହେବା ପର୍ଯ୍ୟନ୍ତ ଫିଲ୍ମର ଶୁଟିଂ ଆରମ୍ଭ ହେବ ନାହିଁ। ସୂଚନାଯୋଗ୍ୟ, ଏହି ସମସ୍ତ ଘଟଣା ‘ଓ୍ବେଲକମ୍-୨’ ସମୟରେ ଘଟିଥିଲା, ଯାହା ୨୦୧୫ରେ ମୁକ୍ତିଲାଭ କରିଥିଲା।
