ଲାହୋର,୨୯।୫: ସର୍ବଦା ପାକିସ୍ତାନ କ୍ରିକେଟ ଟିମ୍ର କୋଚ୍ ପଦକୁ ନେଇ ବିବାଦ ଲାଗି ରହିଥାଏ। ସ୍ବଦେଶୀ କୋଚ୍ ହୁଅନ୍ତୁ ଅବା ବିଦେଶୀ, ସମସ୍ତଙ୍କୁ ନେଇ ବିବାଦ ଦେଖାଦେଇଥାଏ। ବର୍ତ୍ତମାନ ସମୟରେ ଅନେକ ପୂର୍ବ ଅଭିଜ୍ଞ ଖେଳାଳି ରହିଛନ୍ତି, ଯେଉଁମାନେ କୋଚ୍ ଭୂମିକା ବେଶ୍ ଭଲ ଭାବେ ନିର୍ବାହ କରିପାରିବେ। ହେଲେ ଖେଳାଳିମାନେ ନିଜେ ଏଥିରୁ ଓହରି ଯାଉଛନ୍ତି। ପାକିସ୍ତାନ କ୍ରିକେଟ ଟିମ୍ର ଉନ୍ନତି ଚାହୁଁଥିଲେ ହେଁ କୋଚ୍ ହେବାକୁ ସେମାନେ ଚାହୁଁ ନ ଥିବା ରୋକଠୋକ ଶୁଣାଇଦେଇଛନ୍ତି। ଏଭଳି ଜଣେ ଖେଳାଳି ହେଉଛନ୍ତି ଓ୍ବାସିମ୍ ଆକ୍ରମ।
ଆଇପିଏଲ୍ରେ କୋଚିଂ ଦେଇଥିବା ଓ୍ବାସିମ୍ ଭାରତ ସହ ଅନେକ ଥର ଯୋଡ଼ି ହୋଇଛନ୍ତି। ହେଲେ ପାକିସ୍ତାନୀ ଟିମ୍ର ସହାୟତା ପାଇଁ ସେ ସକ୍ରିୟ ଭାବେ ଆଗକୁ ଆସିନାହାନ୍ତି। ଏନେଇ ସେ କୁହନ୍ତି, ପ୍ରଥମ କଥା ହେଲା ଯଦି ଆପଣ ପାକିସ୍ତାନ ନଚେତ ଅନ୍ୟ ଅନ୍ତରାଷ୍ଟ୍ରୀୟ ଟିମ୍ ସହ ଯୋଡ଼ି ହୁଅନ୍ତି ତେବେ ବର୍ଷକୁ ଅତିକମ୍ରେ ୨୦୦-୨୫୦ ଦିନ ଦେବାକୁ ହେବ। ହେଲେ ଦେଶ ଏବଂ ନିଜ ପରିବାରଠାରୁ ଏତେ ଦିନ ଦୂରରେ ରହିପାରିବି ନାହିଁ। ଯେଉଁ ଖେଳାଳିଙ୍କୁ ସହାୟତା ଆବଶ୍ୟକ ଥାଏ ସେମାନେ ଯୋଗାଯୋଗ କରିଥାନ୍ତି ଏବଂ ସେ ତାଙ୍କର ସାହାଯ୍ୟ କରିଥାନ୍ତି। ଦ୍ୱିତୀୟ କଥା ହେଲା, ସେ ମୁର୍ଖ ନୁହନ୍ତି। ପ୍ରତ୍ୟହ ସୋସିଆଲ ମିଡିଆ ନିଶ୍ଚିତ ଭାବେ ଦେଖିଥାନ୍ତି। ସେଠାରେ କିଛି ଖେଳାଳି ନିଜର କୋଚ୍ ଏବଂ ସିନିୟରମାନଙ୍କ ଅପମାନ କରନ୍ତି ତାହା ମଧ୍ୟ ସେ ଦେଖୁଛନ୍ତି। କୋଚ୍ କ୍ରିକେଟ ଖେଳନ୍ତି ନାହିଁ। ଖେଳାଳିମାନଙ୍କୁ ତାହା କରିବାକୁ ପଡ଼ିଥାଏ। ଯୋଜନା ପ୍ରସ୍ତୁତ କରିବା କୋଚ୍ର କାମ। ହେଲେ ଟିମ୍ ହାରିଲେ ସବୁତକ ଦୋଷ କୋଚ୍କୁ ଦିଆଯିବା ଅନୁଚିତ। ଏଭଳି କଥାକୁ ସହିବା କଷ୍ଟକର ବୋଲି ସେ କହିଛନ୍ତି।
