ନୂଆଦିଲ୍ଲୀ,୪।୨(ପି.ଟି.): ଅଜୟ ସିଂ ବକ୍ସିଂ ଫେଡେରେଶନ ଅଫ୍ ଇଣ୍ଡିଆ (ବିଏଫ୍ଆଇ)ର ଅଧ୍ୟକ୍ଷ ଭାବେ ପୁଣିଥରେ ନିର୍ବାଚିତ ହୋଇଛନ୍ତି। ଅନ୍ତର୍ଜାତୀୟ ବକ୍ସିଂ ଆସୋସିଏଶନ (ଏଆଇବିଏ) ପର୍ଯ୍ୟବେକ୍ଷକଙ୍କ ଉପସ୍ଥିତିରେ ଅନୁଷ୍ଠିତ ହୋଇଥିବା ମତଦାନରେ ଅଜୟ ଅତି ସହଜରେ ଆଶିଷ ଶେଲାରଙ୍କୁ ପରାସ୍ତ କରି ଆଗାମୀ ୪ ବର୍ଷ ପାଇଁ ଏହି ହାଇପ୍ରୋଫାଇଲ ପଦକୁ ନିର୍ବାଚିତ ହୋଇଛନ୍ତି।
ଅଜୟ ସ୍ପାଇଶ୍ ଜେଟ୍ର ଚେୟାରମ୍ୟାନ ରହିଛନ୍ତି। ଗୁରୁଗ୍ରାମ୍ରେ ଅନୁଷ୍ଠିତ ଏହି ମତଦାନରେ ଅଜୟ ୩୭- ୨୭ ବ୍ୟବଧାନରେ ବିଜୟୀ ହୋଇଥିଲେ। ସେହିପରି ଆସାମର ହେମନ୍ତ କୁମାର କାଲିଟା ନୂଆ ସାଧାରଣ ସମ୍ପାଦକ ଭାବେ ନିର୍ବାଚିତ ହୋଇଛନ୍ତି। ମହାରାଷ୍ଟ୍ରର ଜୟ କୋଓ୍ବଲିଙ୍କ ସ୍ଥାନରେ କାଲିଟା ଦାୟିତ୍ୱ ସମ୍ଭାଳିବେ। କାଲିଟା ସେଲାରଙ୍କୁ ସମର୍ଥନ କରିଥିଲେ ଓ ନିର୍ବାଚନ ଲଢିବାକୁ ନିଷ୍ପତ୍ତି ନେଇଥିଲେ। ପୁଣି ଥରେ ନିର୍ବାଚିତ ହୋଇଥିବାରୁ ଅଜୟ ଖୁସି ଜାହିର କରିଛନ୍ତି। ବିଏଫ୍ଆଇ ମୋ ଉପରେ ପୁଣିଥରେ ଭରସା କରିଥିବାରୁ କୃତଜ୍ଞ ରହିବି ବୋଲି ସେ କହିଛନ୍ତି। ମହିଳା ବକ୍ସିଂ ଉପରେ ପ୍ରାଧାନ୍ୟ ଦେବେ ବୋଲି ଅଜୟ କହିଛନ୍ତି। ସପୋର୍ଟ ଷ୍ଟାଫ୍ ଭୂମିକାରେ ମହିଳାମାନଙ୍କୁ ଆଗକୁ ଆଣିବାକୁ ପ୍ରୟାସ କରାଯିବ। ଗୋଆର ଦନୁଷ୍କା ଡ’ଗାମା ଯୁଗ୍ମ ସମ୍ପାଦକ ଭାବେ ଆମ ଟିମ୍ରେ ସାମିଲ ହେବେ ବୋଲି ସେ କହିଛନ୍ତି। ଆଶିଷ ଶେଲାର ମହାରାଷ୍ଟ୍ରର ଜଣେ ଭାଜପା ଏମ୍ଏଲ୍ଏ। ସେ ମଧ୍ୟ ମୁମ୍ବାଇ କ୍ରିକେଟ ଆସୋସିଏଶନ (ଏମ୍ସିଏ)ର ପୂର୍ବତନ ଅଧ୍ୟକ୍ଷ ଭାବେ ଦାୟିତ୍ୱ ତୁଲାଇଛନ୍ତି। ମତଦାନରେ ଏଆଇବିଏ ପର୍ଯ୍ୟବେକ୍ଷକ ଭାବେ ୟୁରୀ ଜେସେଭ ଉପସ୍ଥିତ ଥିଲେ। ଏହି ନିର୍ବାଚନ ପ୍ରଥମେ ଗତବର୍ଷ ସେପ୍ଟେମ୍ବରରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ କୋଭିଡ୍-୧୯ ମହାମାରୀ କାରଣରୁ ଏହାକୁ ଘୁଞ୍ଚାଇ ଦିଆଯାଇଥିଲା। ମାମଲା ଦିଲ୍ଲୀ ହାଇକୋର୍ଟରେ ପହଞ୍ଚଥିଲା। ଫଳରେ ୩ ତାରିଖରେ ଅନୁଷ୍ଠିତ ଷଷ୍ଠ ବାର୍ଷିକ ସାଧାରଣ ବୈଠକରେ ନିର୍ବାଚନ ଆୟୋଜିତ ହୋଇଥିଲା।
