ପିଲାଦିନୁ ସଙ୍ଗୀତ ପ୍ରତି ଥିଲା ପ୍ରବଳ ଆଗ୍ରହ। ବୟସ ବଢ଼ିବା ସଙ୍ଗେ ସଙ୍ଗେ ଜଣେ କଣ୍ଠଶିଳ୍ପୀ ହେବାର ଇଚ୍ଛା ମଧ୍ୟ ପୂରଣ ହେଲା। ସୁମଧୁର କଣ୍ଠସ୍ବର ତାଙ୍କୁ ଜଣେ ଭଲ କଣ୍ଠଶିଳ୍ପୀ ଭାବେ ଜିଲା ଓ ଜିଲା ବାହାରେ ପରିଚିତ କରାଇଛି। ଗୀତ ଗାଇବା ସହ ଅଭିନୟ ଓ ସୁନ୍ଦର ନୃତ୍ୟ ପରିବେଷଣରେ ସେ ପାରଙ୍ଗମ ହୋଇପାରିଲେ। ଏହି ନିଆରା ପ୍ରତିଭା ହେଉଛନ୍ତି ଭଦ୍ରକ ପୌରାଞ୍ଚଳ ଗବସାହିର କଣ୍ଠଶିଳ୍ପୀ ଶୁଭ୍ରସ୍ମିତା ରାଉତ(୨୦)।
ଜୟନ୍ତ ରାଉତ ଓ ପ୍ରଭାତୀ ରାଉତଙ୍କ ଝିଅ ହେଉଛନ୍ତି ଶୁଭ୍ରସ୍ମିତା। ବାପା ଶିକ୍ଷା ବିଭାଗର ଜଣେ ଚତୁର୍ଥ ଶ୍ରେଣୀ କର୍ମଚାରୀ ଓ ମା’ ଗୃହିଣୀ। ସେ ଏବେ ସଙ୍ଗୀତରେ ଚଣ୍ଡିଗଡ଼ ବିଶ୍ୱବିଦ୍ୟାଳୟରେ ଗ୍ରାଜୁଏଶନ ଶେଷବର୍ଷରେ ଅଧ୍ୟୟନରତ ଅଛନ୍ତି। ୨୦୧୨ରେ ଜଣେ ଗୁରୁଙ୍କ ନିକଟରେ ସଙ୍ଗୀତ ଶିକ୍ଷା ଆରମ୍ଭ କରିଥିଲେ। ୨୦୧୪ରେ ଦିଲ୍ଲୀରେ ଏକ ଅଡିସନରେ ଭାଗନେଇ ୯ ହଜାର ପ୍ରତିଯୋଗୀଙ୍କ ମଧ୍ୟରେ କୃତକାର୍ଯ୍ୟ ହୋଇଥିଲେ। ଏହା ଥିଲା ତାଙ୍କ ଜୀବନର ସଫଳତାର ପ୍ରଥମ ପାହାଚ। ପରେ ଜିଲା ଓ ଜିଲା ବାହାରେ ବିଭିନ୍ନ ମଞ୍ଚରେ ନିଜର କଳା ପ୍ରଦର୍ଶନ କରି ପ୍ରଶଂସିତ ଓ ପୁରସ୍କୃତ ହୋଇଛନ୍ତି। ଭଦ୍ରକ ମହୋତ୍ସବ, ଆଗରପଡ଼ା ମହୋତ୍ସବ, ଭଦ୍ରାୟଣୀ ପରି ବଡ଼ ମଞ୍ଚରେ ତାଙ୍କର କଣ୍ଠର ଯାଦୁ ଦର୍ଶକଙ୍କୁ ବିମୋହିତ କରିଥିଲା। ବାରବାଟୀ ଷ୍ଟାଡିୟମରେ ଅନୁଷ୍ଠିତ ଅଡିସନ ଫାଇନାଲ ରାଉଣ୍ଡରେ ପ୍ରଥମ ହୋଇଥିଲେ। ଏହି ସଫଳତା ତାଙ୍କୁ ଆଗକୁ ବଢ଼ିବା ପାଇଁ ପ୍ରେରଣା ଯୋଗାଇଥିଲା। ମୁମ୍ବାଇର ଏକ ମ୍ୟୁଜିକ ଅନୁଷ୍ଠାନ ପକ୍ଷରୁ ଫୋନ୍ କଲ୍ କରି ଭଏସ୍ ଟେଷ୍ଟ ନେଇଥିଲେ। ୪ର୍ଥ ପର୍ଯ୍ୟାୟ ପର୍ଯ୍ୟନ୍ତ ଉନ୍ନୀତ ହୋଇଥିଲେ। ‘ଜବ୍ କୋଇ ବାତ୍ ବିଗଡ୍ ଜାଏ’ ଗୀତ ତାଙ୍କୁ ଭଦ୍ରକରୁ ମୁମ୍ବାଇ ପହଞ୍ଚାଇଥିଲା। ଜି ଟିଭିର ସାରେଗାମାପା, ଇଣ୍ଡିଆନ ଆଇଡଲ, କଲର୍ସର ରାଇଜିଂ ଷ୍ଟାର ଆଦି ବିଭିନ୍ନ ପ୍ରତିଯୋଗିତାରେ ଭାଗ ନେଇ ସଫଳତା ପାଇଥିଲେ। ବିଭିନ୍ନ ଭାଷାରେ ଗୀତ ଗାଇ ପ୍ରତିଭା ପ୍ରଦର୍ଶନ କରିବାକୁ ତାଙ୍କର ଲକ୍ଷ୍ୟ ରହିଛି ବୋଲି ଶୁଭ୍ରସ୍ମିତା କହିଛନ୍ତି। ଏଥିପାଇଁ ଦିନକୁ ୨ ଘଣ୍ଟା ଅଭ୍ୟାସ ଜାରି ରଖିଛନ୍ତି। ନିଷ୍ଠା ଓ ଅଧ୍ୟବସାୟ ବଳରେ ସଫଳତା ହାସଲ କରିପାରିବେ ବୋଲି ଆଶାବାଦୀ ଅଛନ୍ତି। ଏହି ଯାତ୍ରାରେ ତାଙ୍କ ମା’ ତାଙ୍କର ଆଦର୍ଶ ବୋଲି ସେ କହିଛନ୍ତି।
-ସନାତନ ରାଉତ, ଭଦ୍ରକ
