ସୋନପୁର,୧।୧୨(ନି.ପ୍ର.): ସୁବର୍ଣ୍ଣପୁର ଜିଲାରେ ଏଡ୍ସ କାୟା ବିସ୍ତାର କରି ଚାଲିଛି । ସରକାରୀ ହିସାବରେ ଜିଲାରେ ଏଚଆଇଭି ଆକ୍ରାନ୍ତଙ୍କ ସଂଖ୍ୟା ଏବେ ୧୯୧। ଆକ୍ରାନ୍ତଙ୍କ ମଧ୍ୟରେ ଗର୍ଭବତୀ ମହିଳା ଅଛନ୍ତି । ୨୦୦୫ରୁ ୨୦୨୨ ଅକ୍ଟୋବର ମାସ ଶେଷ ସୁଦ୍ଧା ଜିଲାରେ ଏଡ୍ସରେ ୩୦ଜଣଙ୍କ ମୃତ୍ୟୁ ହୋଇଛି। ପ୍ରତିମାସରେ ଏହି ସଂଖ୍ୟା ବୃଦ୍ଧି ପାଉଥିବା ବେଳେ ବେସରକାରୀ ଭାବେ ଏହି ସଂଖ୍ୟା ବହୁ ଅଧିକ। ସେହିଭଳି ୨୫ ଜଣ ଆକ୍ରାନ୍ତ ମୃତ କିମ୍ବା ଜୀବିତ ଅଛନ୍ତି ସେ ସମ୍ପର୍କରେ କୌଣସି ସୂଚନା ସ୍ବାସ୍ଥ୍ୟ ବିଭାଗ ନିକଟରେ ନାହିଁ।
ଜିଲାର ସୋନପୁର ବ୍ଲକରେ ସର୍ବାଧିକ ୫୬ ଜଣ ଆକ୍ରାନ୍ତ ଅଛନ୍ତି। ଆକ୍ରାନ୍ତଙ୍କ ମଧ୍ୟରୁ ପଡୋଶୀ ବୌଦ୍ଧ ଜିଲାର ୩୨ଜଣ, ବଲାଙ୍ଗୀରର ୩ ଜଣ, କଳାହାଣ୍ଡିର ୨ ଜଣ, ବରଗଡ, ରାଜ୍ୟ ବାହାର ତେଲେଙ୍ଗାନା ଓ ଛତିଶଗଡର ଜଣେ ଲେଖାଏ ଥିବା ଜଣାପଡିଛି। ଏହା ପଛକୁ ବୀରମହାରାଜପୁର, ଡୁଙ୍ଗୁରିପାଲି, ବିନିକା ଓ ଉଲୁଣ୍ଡା ବ୍ଲକରେ ଆକ୍ରାନ୍ତଙ୍କ ସଂଖ୍ୟା ଅଧିକ। ଶିଳ୍ପ ବିହୀନ ଏହି ଜିଲାରେ ନିଯୁକ୍ତି ପାଇଁ ବିଶେଷ ସୁଯୋଗ ନ ଥିବାରୁ ଅଧିକାଂଶ ବେକାରୀ ଯୁବକ ରାୟପୁର, ହାଇଦ୍ରାବାଦ, ସୁରଟ, ଚେନ୍ନାଇ, କଲିକତା ଓ ବମ୍ବେ ଆଦି ସ୍ଥାନକୁ କାମ କରିବାକୁ ଯାଇଥାନ୍ତି। ସେଠାରେ ଅଧିକାଂଶ ଅସୁରକ୍ଷିତ ଯୌନ କ୍ରିୟାରେ ଲିପ୍ତ ରହିବା ଯୋଗୁଁ ଏହି ରୋଗରେ ଆକ୍ରାନ୍ତ ହେଉଛନ୍ତି। ଆଉ କେତେକ ଡ୍ରାଇଭର ସଚେତନତା ଅଭାବରୁ ଏହି ରୋଗର ବାହକ ସାଜୁଛନ୍ତି । ଏହି ରୋଗକୁ ସମ୍ପୂର୍ଣ୍ଣ ବିଲୁପ୍ତ ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କର ବିଭିନ୍ନ ସଂସ୍ଥା ଏବଂ ସ୍ବେଚ୍ଛାସେବୀ ଅନୁଷ୍ଠାନ ସଚେତନତା କାର୍ଯ୍ୟ କରୁଥିଲେ ହେଁ ଏହା ନିୟନ୍ତ୍ରଣ ହୋଇ ପାରୁନାହିଁ।
ସୁବର୍ଣ୍ଣପୁର ସ୍ବାସ୍ଥ୍ୟ ବିଭାଗରୁ ମିଳିଥିବା ତଥ୍ୟ ଅନୁଯାୟୀ ୨୦୦୫ରୁ ବର୍ତ୍ତମାନ ସୁଦ୍ଧା ୧ଲକ୍ଷ ୬୪ହଜାର ୯୧୩ଜଣ ଏଡ୍ସ ସମ୍ପର୍କରେ ପରାମର୍ଶ ପାଇଁ ଡାକ୍ତରଖାନାକୁ ଆସିଥିଲେ। ସେମାନଙ୍କ ମଧ୍ୟରୁ ୧ଲକ୍ଷ ୩୬ହଜାର ୩୨୨ଜଣଙ୍କ ପରୀକ୍ଷା କରାଯାଇଥିଲା। ପୂର୍ବରୁ ଆକ୍ରାନ୍ତ ମାନେ କଟକ, ବ୍ରହ୍ମପୁର ଅବା ବୁର୍ଲା ମେଡିକାଲକୁ ଚିକିତ୍ସା ନିମନ୍ତେ ଯାଉଥିଲେ। ଏବେ ଏଡ୍ସର ଭୟାବହତାକୁ ଲକ୍ଷ୍ୟ କରି ବଲାଙ୍ଗୀରରେ ଏଡ୍ସ ଚିକିତ୍ସା ପାଇଁ ଏଆରଟି(ଆଣ୍ଟି ରେଟ୍ରୋ ଭାଇରାଲ ଥେରାପି) ସେଣ୍ଟର ପ୍ରତିଷ୍ଠା କରାଯାଇଛି। ଫଳରେ ଜିଲାର ଆକ୍ରାନ୍ତମାନେ ଏଠାରୁ ଔଷଧ ମାଗଣାରେ ପାଉଛନ୍ତି। ସୋନପୁର, ଡୁଙ୍ଗୁରିପାଲି ଓ ତରଭାରେ ପରୀକ୍ଷା କେନ୍ଦ୍ର ଖୋଲାଯାଇ ରକ୍ତ ପରୀକ୍ଷା କରାଯାଉଛି। ବୀରମହାରାଜପୁର, ବିନିକା, ଉଲୁଣ୍ଡା ଓ ନାଇକେନପାଲି ସ୍ବାସ୍ଥ୍ୟକେନ୍ଦ୍ରରେ ମଧ୍ୟ ସ୍କ୍ରିନିଂ ଟେଷ୍ଟ ହେଉଛି। ରିପୋର୍ଟ ଅନୁଯାୟୀ ବର୍ତ୍ତମାନ କେବଳ ୧୩୬ ଜଣ ରୋଗୀ ହିଁ ଔଷଧ ଖାଉଛନ୍ତି।
