ଅନୁଗୋଳ ଅଫିସ,୧ା୧୨: ସଚେତନ, ସତର୍କ ଓ ସଂଜମ ଆଚରଣ ଦ୍ୱାରା ହିଁ ଏଡ୍ସର ପ୍ରତିରୋଧ କରାଯାଇପାରିବ। ଦୀର୍ଘବର୍ଷ ହେଲା ସରକାର ଏହା ବୁଝାଉଛନ୍ତି। ବିଭିନ୍ନ ଯୋଜନା, କାର୍ଯ୍ୟକ୍ରମ, ଏନ୍ଜିଓ ମାଧ୍ୟମରେ ସଚେତନତା ସୃଷ୍ଟିର ଉଦ୍ୟମ କରିଆସୁଛନ୍ତି। ହେଲେ ଅନୁଗୋଳ ଜିଲାର ଅନେକେଙ୍କ ନିକଟରେ ଏପରି ସଚେତନତାର ବାର୍ତ୍ତା ପହଞ୍ଚିପାରି ନାହିଁ। କାରଣ ଶିଳ୍ପରେ ଭରା ଅନୁଗୋଳ ଜିଲାରେ ଏଡ୍ସ ସ୍ଥିତି ଏବେ ବି ଅଣାୟତ୍ତ ଅବସ୍ଥାରେ ରହିଛି। ଗତ କିଛି ବର୍ଷ ପରି ଚଳିତବର୍ଷର ମାତ୍ର ୭ ମାସ ମଧ୍ୟରେ ଏଡ୍ସ ଆକ୍ରାନ୍ତଙ୍କ ସଂଖ୍ୟା ଶହେ ଟପିଯାଇଛି। ଏହି ଭୂତାଣୁଧାରୀଙ୍କ ମଧ୍ୟରେ ୯ ଜଣ ଗର୍ଭବତୀ ଓ ୨ ଶିଶୁ ରହିବା ଉଦ୍ବେଗର ବିଷୟ ହୋଇଛି।
ଜିଲା ଏଡ୍ସ ପ୍ରତିକାର ଓ ନିୟନ୍ତ୍ରଣ ୟୁନିଟ୍ (ଡାପ୍ସୁ) ପକ୍ଷରୁ ମିଳିଥିବା ସୂଚନା ମୁତାବକ, ୨୦୦୩ ମସିହାରୁ ଅନୁଗୋଳ ଜିଲାରେ ଏଚ୍ଆଇଭି ନମୁନା ସଂଗ୍ରହ ହେଉଛି। ସେବେଠାରୁ ଏଯାବତ୍ ଜିଲାରେ ମୋଟ୍ ୨୩୧୮ ଜଣ ରୋଗୀ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରେ ୧୪୨୬ ପୁରୁଷ ରହିଥିବାବେଳେ ୭୨୬ ହେଉଛନ୍ତି ମହିଳା। ସେହିପରି ଏହି ୧୯ ବର୍ଷରେ ୧୬୬ ଶିଶୁ ଓ୨୩୫ ଗର୍ଭବତୀ ଏହି ମରାତ୍ମକ ରୋଗର ଶିକାର ହୋଇଛନ୍ତି। ଜିଲାର ବିଭିନ୍ନ ବ୍ଲକ ଅନୁଯାୟୀ ଦେଖିଲେ ଅନୁଗୋଳ ବ୍ଳକରେ ସର୍ବାଧିକ ୪୩୧ ଜଣ ଏଡ୍ସରେ ସଂକ୍ରମିତ ହୋଇଛନ୍ତି। ଏହାପରେ ଖଣିଖାଦାନ ଭରା ତାଳଚେର ବ୍ଲକରେ ୪୩୬ ଜଣ, ବଅଁରପାଳ ବ୍ଲକରେ ୩୫୪, କିଶୋରନଗର ବ୍ଲକରେ ୧୮୫, ଛେଣ୍ଡିପଦା ବ୍ଳକରେ ୧୮୫, ଆଠମଲ୍ଲିକ ବ୍ଲକରେ ୧୨୦, କଣିହାଁ ବ୍ଲକରେ ୧୧୧ ଓ ପାଲଲହଡ଼ା ବ୍ଲକରୁ ୬୧ ଜଣ ଏଡ୍ସ ରୋଗୀ ବାହାରିଛନ୍ତି। ଏମାନଙ୍କ ମଧ୍ୟରୁ ବାହାର ଜିଲାରୁ ଆସି ଏଠାରେ ୪୧୫ ଜଣ ପଜିଟିଭ୍ ଚିହ୍ନଟ ହୋଇଥିବା ଜଣାପଡ଼ିଛି। ତେବେ କରୋନା ସମୟରେ ଏଚ୍ଆଇଭି ସଂଖ୍ୟା ବୃଦ୍ଧିରେ ସାମାନ୍ୟ ରୋକ୍ ଲାଗିଥିଲା। ହେଲେ ଏବେ ପୁଣି ଆକ୍ରାନ୍ତଙ୍କ ସଂଖ୍ୟା ଉପରମୁହାଁ ହୋଇଛି। ୨୦୧୭ – ୧୮ରେ ଜିଲାରୁ ୧୧୧ ଜଣ ପଜିଟିଭ ଚିହ୍ନଟ ହୋଇଥିଲେ। ୨୦୧୮-୧୯ରେ ୧୩୨, ୨୦୧୯-୨୦ରେ ୧୩୨, ୨୦୨୦-୨୧ରେ ୧୨୮, ୨୦୨୧-୨୨ରେ ୧୨୩ ଜଣ ସଂକ୍ରମିତ ବାହାରିଥିବା ବେଳେ ଚଳିତବର୍ଷ ଏପ୍ରିଲରୁ ଅକ୍ଟୋବର ମଧ୍ୟରେ ୧୦୫ ସଂକ୍ରମିତ ଚିହ୍ନଟ ହୋଇଥିବା ସୂଚନା ମିଳିଛି। ଏଥିରୁ ଅନୁଗୋଳ ବ୍ଲକରୁ ୧୭ ଜଣ, ବଅଁରପାଳରୁ ୧୦, ତାଳଚେରରୁ ସର୍ବାଧିକ ୨୬ ଓ କିଶୋରନଗରରୁ ୧୦ ଜଣ ରହିଛନ୍ତି। କେବଳ ଅକ୍ଟୋବର ମାସରେ ଜିଲାରୁ ୧୫ ପଜିଟିଭି ଚିହ୍ନଟ ହୋଇଛନ୍ତି ବୋଲି ଡାପସୁ ପକ୍ଷରୁ କୁହାଯାଇଛି।
