ଛୋଟ ଛୋଟ କଥାକୁ ନେଇ ବେଳେବେଳେ ଘରୋଇ କଳି ଏଭଳି ସ୍ତରକୁ ଚାଲିଆସେ ଯେ ସମ୍ପର୍କ ଭାଙ୍ଗିବା ଯାଏ କଥା ପହଞ୍ଚିଯାଏ। କ୍ରୋଧ ଉପରେ ନିୟନ୍ତ୍ରଣ ନ ରହିଲେ ପରିସ୍ଥିତି ଏଭଳି ଅଣାୟତ୍ତ ହୋଇଯାଏ। ଠିକ୍ ଏମିତି ଏକ ଘଟଣା ଘଟିଛି ଉତ୍ତରପ୍ରଦେଶର ଆଗ୍ରାରେ। ସୋରିଷ ତେଲକୁ ନେଇ ଏହି ଅଞ୍ଚଳରେ ଏକ ଦମ୍ପତି ଝଗଡା କରି ପରସ୍ପରଠାରୁ ଅଲଗା ହୋଇ ଯାଇଛନ୍ତି। ଏମିତି କି ଛାଡପତ୍ର ଦେବା ଯାଏ ବି କଥା ପହଞ୍ଚିଛି। ଏବେ ସେମାନେ ଥାନାର ଦ୍ୱାରସ୍ଥ ହୋଇଛନ୍ତି। ୨୦୨୦ ମସିହାରେ ଏହି ଦମ୍ପତି ପରସ୍ପରକୁ ବିବାହ କରିଥିଲେ। ତେବେ ବିବାହର ଦୁଇ ତିନି ବର୍ଷ ପରେ ଘରଖର୍ଚ୍ଚକୁ ନେଇ ଉଭୟଙ୍କ ମଧ୍ୟରେ ଛୋଟମୋଟ ଝଗଡା ଆରମ୍ଭ ହୋଇଥିଲା। ପରେ ଏହି ଝଗଡା ବଢି ଚାଲିଲା। ଏବେ କିଛିଦିନ ତଳେ ସୋରିଷ ତେଲକୁ ନେଇ ଉଭୟଙ୍କ ମଧ୍ୟରେ ବିବାଦ ହୋଇଥିଲା। ସ୍ବାମୀ ଜଣକ ଅଭିଯୋଗ କରିଥିଲେ ଯେ ତାଙ୍କ ସ୍ତ୍ରୀ ଘରେ ଥିବା ସୋରିଷ ତେଲକୁ ବାପଘରକୁ ନେଇ ବିକ୍ରି କରି ଦେଉଛନ୍ତି। ଏହି କଥାକୁ ନେଇ ପରସ୍ପର ମଧ୍ୟରେ ବିବାଦ ଏତେ ବଢିଯାଇଥିଲା ଯେ ସେମାନେ ପରସ୍ପରଠାରୁ ଅଲଗା ହୋଇ ଯାଇଥିଲେ। ପତ୍ନୀ ଶାଶୁଘର ଛାଡି ବାପଘରକୁ ଚାଲି ଯାଇଥିଲେ ଓ ଥାନାରେ ଅଭିଯୋଗ କରିଥିଲେ। ଏହାପରେ ଉଭୟ ପରସ୍ପରଠାରୁ ଛାଡପତ୍ର ନେବାକୁ ବି କହିଥିଲେ। ତେବେ ପୋଲିସ ଏହି ଘଟଣାକୁ ଏବେ ପରିବାର ଅଦାଲତକୁ ପଠାଇବା ପରେ ସେଠାରେ ଉଭୟଙ୍କର କାଉନସେଲିଂ କରାଯାଇ ଏକାଠି ରହିବା ପାଇଁ ପରାମର୍ଶ ଦିଆଯାଇଛି।
