ଅନାଥଙ୍କ ସାହାରା ପାଲଟିଛନ୍ତି ଲାମା ଥୁପଟେନ ଫୁନଷ୍ଟୋକ। ଅରୁଣାଚଳ ପ୍ରଦେଶରେ ସେ ମଞ୍ଜୁଶ୍ରୀ ବିଦ୍ୟାପୀଠ ପ୍ରତିଷ୍ଠା କରି ୩୦୦ ଅନାଥ ପିଲାଙ୍କୁ ମାଗଣାରେ ପଢ଼ାଉଛନ୍ତି। ସେଠାରେ ପିଲାମାନେ ରହୁଛନ୍ତି, ଖାଉଛନ୍ତି ଓ ପଢୁଛନ୍ତି। ତାଓ୍ବାଙ୍ଗ ଜିଲାର ପାହାଡ଼ିଆ ଅଞ୍ଚଳର ଏକ ଛୋଟ ଗାଁରେ ଏହି ସ୍କୁଲ ଚାଲିଛି। ସେ ୧୯୮୮ରେ ଏକ ଝୁପୁଡ଼ିରେ ୧୭ ଜଣ ଅନାଥ ପିଲାଙ୍କୁ ନେଇ ଏହି ସ୍କୁଲ ଆରମ୍ଭ କରିଥିଲେ। ଏବେ ଏହି ସଂଖ୍ୟା ବୃଦ୍ଧିପାଇ ୩୦୦ରେ ପହଞ୍ଚିଲାଣି। ସ୍କୁଲଟି ସିବିଏସ୍ଇରେ ପଞ୍ଜୀକୃତ ହୋଇଛି । ଏଠାରେ ୧୦ ଶ୍ରେଣୀ ଯାଏ ପିଲା ପଢୁଛନ୍ତି। ଏମାନେ ଅରୁଣାଚଳ ପ୍ରଦେଶର ବିଭିନ୍ନ ଜିଲାରୁ ଆସିଛନ୍ତି। ସ୍କୁଲରେ ୩୭ ଜଣ ଷ୍ଟାଫ୍ ଅଛନ୍ତି । ଲାମା ନିଜେ ପିଲାଙ୍କୁ ବି ପଢ଼ାଉଛନ୍ତି। ଲାମା ଜଣେ ମେଧାବୀ । ସେ ତିବ୍ବତୀୟ ଭାଷରେ ପିଏଚ୍.ଡି କରିଛନ୍ତି। ସେ ପ୍ରଥମେ ଏକ ପବ୍ଲିକ ସ୍କୁଲରେ ଶିକ୍ଷକ ଭାବେ କାମ କରୁଥିଲେ। ସେଥିରୁ ଅର୍ଥ ସଞ୍ଚୟ କରି ଅନାଥଙ୍କ ପାଇଁ ସ୍କୁଲ ଆରମ୍ଭ କରିଥିଲେ। ସବୁ ବିଷୟ ସହିତ ବୁଦ୍ଧିଷ୍ଟ ଫିଲୋଶଫି ସହ ସ୍ଥାନୀୟ ଭାଷା ମଧ୍ୟ ପଢ଼ାଯାଉଛି। ଏହି ସ୍କୁଲରୁ ପିଲା ପାସ୍ କରି ଆଇନଜୀବୀ, ଆଇଏଏସ୍ ଅଧିକାରୀ ହୋଇ ସାରିଲେଣି।
