କଟକ ଅଫିସ,୩୦।୧୧: ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ନେଇ କଟକ ବକ୍ସିବଜାରସ୍ଥିତ ପୋଲିସ ମୁଖ୍ୟାଳୟରେ ସୋମବାର ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ଏଥିରେ ଡିଜିପି ଅଭୟ ଯୋଗଦେଇ ରାଜ୍ୟର ସମସ୍ତ ଏସ୍ପି, ରେଞ୍ଜ ଆଇଜି, ଡିଆଇଜି ଓ କଟକ-ଭୁବନେଶ୍ୱର ଡିସିପିଙ୍କ ସହ ଭିଡିଓ କନ୍ଫରେନ୍ସରେ ଆଲୋଚନା କରିଥିଲେ। ପ୍ରଥମେ ଅପରାଧ ସମ୍ପର୍କିତ ସର୍କୁଲାର ଅପ୍ଡେଟ ଓ ନାର୍କୋଟିକ୍ସ ବିରୋଧରେ କାର୍ଯ୍ୟଶୈଳୀର ସମୀକ୍ଷା କରାଯାଇଥିଲା। ପରେ ଆସନ୍ତା ବିଧାନସଭା ଅଧିବେଶନରେ ସୁରକ୍ଷା ବ୍ୟବସ୍ଥା କଡାକଡି କରିବା ଉପରେ ଡିଜିପି ଗୁରୁତ୍ୱାରୋପ କରିଥିଲେ। ସେହିପରି ମାଲଖାନା ମଡ୍ୟୁଲ୍ ଓ ଏସ୍ଆର୍ ମଡ୍ୟୁଲ୍ ଲାଗୁ, ନ୍ୟାଶନାଲ ଇଣ୍ଟେଲିଜେନ୍ସ ଗ୍ରୀଡ୍ ସମ୍ବନ୍ଧରେ ଉପସ୍ଥାପନା ଏବଂ ସିସିଟିଏନ୍ଏସ୍ ମାଧ୍ୟମରେ ଅପରାଧ ସମୀକ୍ଷା କରାଯାଇଥିଲା। ଏଥିସହ ସିଭିଲ୍ ପୋଲିସର ସୁଦୃଢୀକରଣ, ଓଡ଼ିଶା ପୋଲିସର ଫ୍ୟାମିଲି କ୍ୱାର୍ଟର୍ସ ସ୍ଥାପନ, କାର୍ଯ୍ୟାଳୟର ଆଦେଶ ମୁତାବକ ବଦଳି ତଥା ପଦୋନ୍ନତି ଲାଗୁ, ପୋଲିସ କର୍ମଚାରୀଙ୍କ ଅଭିଯୋଗ, ମେଡାଲ୍ ଅପ୍ଡେଟ୍, ପରବର୍ତ୍ତୀ ବରିଷ୍ଠ ପୋଲିସ ଅଫିସର୍ସ ସମ୍ମିଳନୀ ସମ୍ପର୍କରେ ଆଲୋଚନା ହୋଇଥିଲା। ଶେଷରେ ସହକାରୀ ଡ୍ରାଇଭର ଓ କନଷ୍ଟେବଳ ନିଯୁକ୍ତି ସଂକ୍ରାନ୍ତରେ ସମୀକ୍ଷା କରାଯାଇଥିଲା।
ବୈଠକରେ କଟକ-ଭୁବନେଶ୍ୱରର ପୋଲିସ କମିଶନର, ରେଳ ବିଭାଗର ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ, ଏସ୍ସିଆର୍ବି ନିର୍ଦ୍ଦେଶକ, ଗୋଇନ୍ଦା ନିର୍ଦ୍ଦେଶକ, ଆଇଜି (ଅପରେଶନ), ଡିଆଇଜି (ଏସ୍.ଆଇ.ଡବ୍ଲ୍ୟୁ), ଡିଆଇଜି.(ଗୋଇନ୍ଦା), ଡିଆଇଜି ଏସ୍ଟିଏଫ୍ ପ୍ରମୁଖ ଉପସ୍ଥିତ ଥିଲେ। ସେହିପରି ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ କ୍ରାଇମବ୍ରାଞ୍ଚ ଓ ଆଇଜି କ୍ରାଇମବ୍ରାଞ୍ଚ ପ୍ରମୁଖ ଭିଡିଓ କନଫରେନ୍ସରେ ଅଂଶଗ୍ରହଣ କରିଥିଲେ। ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ (ଆଇନଶୃଙ୍ଖଳା), ଆଇଜି (ମୁଖ୍ୟାଳୟ), ଆଇଜି (ପର୍ସନେଲ୍) ପ୍ରମୁଖ ପୋଲିସ୍ ମୁଖ୍ୟାଳୟରେ ଉପସ୍ଥିତ ଥିଲେ।
