ନୂଆଦିଲ୍ଲୀ, ୧୯।୧ : ଦିଲ୍ଲୀ ପୋଲିସର ସାଇବର ୟୁନିଟ କ୍ଲବ୍ ହାଉସ୍ ନାମକ ସେଶନ୍ ଚାଟ୍୍ରେ ମୁସଲମାନ ମହିଳାଙ୍କ ପ୍ରତି ଅଶ୍ଳୀଳ ତଥା ଆପତ୍ତିଜନକ ମନ୍ତବ୍ୟ ଦିଆଯାଉଥିବା ନେଇ ମାମଲା ରୁଜୁ କରିଛି। ଦିଲ୍ଲୀ ପୋଲିସ ଆଇପିସିର ଧାରା ୧୫୩-ଏ, ୨୯୫-ଏ. ୩୫୪-ଏ ଅନ୍ତର୍ଗତ ଏକ ମାମଲା ରୁଜୁ କରାଯାଇଛି। ମାମଲାଟି ଏଫ୍ଆଇଆର୍ ନମ୍ବର ୧୨/୨୨ରେ ପଞ୍ଜିକରଣ ହୋଇଛି।
ଏହାପୂର୍ବରୁ ଦିଲ୍ଲୀ ମହିଳା ଆୟୋଗ ଏହି ପ୍ରସଙ୍ଗ ସମ୍ପର୍କରେ ଅବଗତ ହୋଇଥିଲେ। ମୁସଲିମ ମହିଳାଙ୍କୁ ଟାର୍ଗେଟ କରୁଥିବା କ୍ଲବ ହାଉସ୍ ସେଶନ ଚାଟ୍ ଉପରେ ଦିଲ୍ଲୀ ପୋଲିସ ପକ୍ଷରୁ ତଦନ୍ତ ଆରମ୍ଭ ହୋଇଛି। ନିକଟରେ ବୁଲି ବାଈ ଆପ୍ ମାଧ୍ୟମରେ ସୋସିଆଲ ମିଡିଆରେ ମୁସଲମାନ୍ ମହିଳାଙ୍କ ପ୍ରତି ଘୃଣାଭାବ ସୃଷ୍ଟି କରୁଥିବା ମାମଲା ସାମ୍ନାକୁ ଆସିଥିଲା।
ଦିଲ୍ଲୀ ପୋଲିସର ଆଇଏଫ୍ଏସ୍ଓ ୟୁନିଟ ଏହି ମାମଲାରେ ଅଜ୍ଞାତ ବ୍ୟକ୍ତିଙ୍କ ବିରୋଧରେ ଏଫ୍ଆଇଆର୍ ପଞ୍ଜିକରଣ କରିଛି। କ୍ଲବ ହାଉସ ଆପ୍ରେ ଏକ ସେଶନ ସମୟରେ କିଛି ଲୋକ ଅଶ୍ଳୀଳ ମନ୍ତବ୍ୟ ଦେଉଥିବାର ଦେଖାଯାଇଥିଲା। ଆପରେ ଚାଲୁଥିବା ହେଡଲାଇନ ଥିଲା, ମୁସଲମାନ ଝିଅମାନେ ହିନ୍ଦୁ ଝିଅଙ୍କ ତୁଳନାରେ ଅଧିକ ସୁନ୍ଦର। ଏହି ଲୋକମାନେ ମୁସଲମାନ ମହିଳାମାନଙ୍କ ପ୍ରତି ଅଶ୍ଳୀଳ ଓ ଅପମାନଜନକ ଭାଷା ବ୍ୟବହାର କରୁଥିଲେ। କ୍ଲବ୍ ହାଉସ୍ ଆପ୍ ସେଶନର ବାର୍ତ୍ତାଳାପର ଏକ ରେକର୍ଡିଂ ଟୁଇଟ୍ କରାଯାଇଥିଲା।
@jaiminism ଆଇଡି ସହିତ ଏକ ଟୁଇଟର ହ୍ୟାଣ୍ଡେଲ ତିଆରି କରାଯାଇଥିଲା। ଏଥିରେ କିଛି ଯୁବକ ମୁସଲମାନ ଝିଇମାନଙ୍କ ବିରୁଦ୍ଧରେ ଅଶ୍ଳୀଳ କଥାବାର୍ତ୍ତା କରୁଥିବା ଶୁଣିବାକୁ ମିଳିଥିଲା। ଏହି ସେଶନରେ କେତେକ ଝିଇ ମଧ୍ୟ ସାମିଲ ହୋଇଥିଲେ।
ଏହାପୂର୍ବରୁ ୨୦୨୦ରେ, ଗିଟ୍ ହବ ପ୍ଲାଟଫର୍ମରେ ସୁଲି ଡିଲ୍ସ ପ୍ରସଙ୍ଗ ସାମ୍ନାକୁ ଆସିଥିଲା। ଶିବସେନା ଏମ୍ପି ପ୍ରିୟଙ୍କା ଚତୁର୍ବେଦୀ ଙ୍କ ଅଭିଯୋଗ ପରେ ମୁମ୍ବାଇ ପୋଲିସ ପକ୍ଷରୁ ଏକ ତଦନ୍ତକାରୀ ଦଳ ଗଠନ କରାଯାଇଥିଲା। ସେହିପରି ତଥା ମହିଳା ଗଣମାଧ୍ୟମ ପ୍ରତିନିଧିଙ୍କ ଅଭିଯୋଗ ଉପରେ ଦିଲ୍ଲୀ ଏବଂ ତେଲେଙ୍ଗାନା ପୋଲିସ ତଦନ୍ତ ଆରମ୍ଭ କରିଥିଲେ।
ଏଥିସହିତ ନ୍ୟାଶନାଲ କମିଶନ ଫର ମହିଳା (ଏନସିଡବ୍ଲ୍ୟୁ) ମଧ୍ୟ ଏହି ପ୍ରସଙ୍ଗ ସମ୍ପର୍କରେ ଅବଗତ ହୋଇଛନ୍ତି ଏବଂ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କହିଛନ୍ତି। କେତେକ ରାଜ୍ୟରେ ମହିଳା ଆୟୋଗଙ୍କ ନିକଟକଚ ଅଭିଯୋଗ ମଧ୍ୟ ପଠାଯାଇଛି। ସୁଲି ଡିଲ୍ସ୍ ଏବଂ ବୁଲି ବାଈ ପରେ ଏବେ କ୍ଲବ୍ ହାଉସ୍ ଆପ୍ ମୁସଲମାନ ମହିଳାମାନଙ୍କୁ ମାନସିକ ଏବଂ ଶାରୀରିକ ସ୍ତରରେ ପ୍ରତାଡିତ କରିବାକୁ ଲକ୍ଷ୍ୟ ରଖିଛି। ଏସବୁ ବିବାଦୀୟ ଆପଗୁଡ଼ିକରେ ମୁସଲମାନ ମହିଳାମାନଙ୍କ ଫଟୋ ଏବଂ ସୂଚନା ଅପଲୋଡ କରାଯାଇଥିଲା।
ଟୁଇଟର, ଇନଷ୍ଟାଗ୍ରାମ କିମ୍ବା ଫେସବୁକ ପରି ସୋସିଆଲ ମିଡିଆ ପ୍ଲାଟଫର୍ମରୁ ସମ୍ପୃକ୍ତକ୍ ମହିଳାମାନଙ୍କ ଆକାଉଣ୍ଟରୁ ଫଟୋ ଏବଂ ସୂଚନା ଚୋରି ହୋଇଥିଲା। ମାଇକ୍ରୋସଫ୍ଟର ଓପନସୋର୍ସ ସଫ୍ଟୱେର୍ କଣ୍ଟେଟ ଶେୟାରିଂ ପ୍ଲାଟଫର୍ମ ଗିଟ୍ ହବ୍ ରେ ଯେ କୌଣସି ବ୍ୟକ୍ତି ଅପଲୋଡ କରିପାରିବେ। ଲୋକମାନେ ଗିଟ୍ହବ୍ରେ ସେମାନଙ୍କର ଆପ ମଧ୍ୟ ବିକ୍ରି କରିପାରିବାର ସୁବିଧା ରହିଛି।
