ଭୁବନେଶ୍ୱର, ୧୦।୧(ବ୍ୟୁରୋ): ଜଣେ ସ୍କୁଲ ଛାତ୍ରଙ୍କ ପାଇଁ ବଦଳିଛି ‘ମୋ ବସ୍’ର ସମୟ ସୂଚୀ। ଭୁବନେଶ୍ୱରର ଏମ୍ବିଏସ୍ ସ୍କୁଲରେ ପଢୁଥିବା ସାଇ ଅନ୍ବେଷ ନାମକ ଜଣେ ଛାତ୍ରଙ୍କ ଅନୁରୋଧକ୍ରମେ ମୋ ବସ୍ ପରିଚାଳନା କରୁଥିବା କ୍ୟାପିଟାଲ ଅର୍ବାନ ଟ୍ରାନ୍ସପୋର୍ଟ (କ୍ରୁଟ୍) ପକ୍ଷରୁ ବସ୍ ଚଳାଚଳ ସମୟରେ ପରିବର୍ତ୍ତନ କରାଯାଇଛି।
ଅନ୍ବେଷ ଲିଙ୍ଗିପୁରରେ ପରିବାର ସହ ରହୁଛନ୍ତି। ମୋ ବସ୍ରେ ସ୍କୁଲ ଯିବା ଆସିବା ବେଳେ ସ୍କୁଲ ଓ ବସ୍ ଚଳାଚଳ ସମୟ ଭିନ୍ନ ରହୁଥିବାରୁ ସେ ବହୁତ ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ଅନ୍ବେଷ କ୍ରୁଟ୍ର ଏମ୍ଡି ତଥା ଆଇପିଏସ୍ ଅଫିସର ଅରୁଣ ବୋଥ୍ରାଙ୍କୁ ଟୁଇଟ୍ କରି ଜଣାଇଥିଲେ। ଉକ୍ତ ଟୁଇଟ୍ରେ ଅନ୍ବେଷ ଉଲ୍ଲେଖ କରିଥିଲେ ଯେ, ସେ ପଢ଼ୁଥିବା ଏମ୍ବିବିଏସ୍ ସ୍କୁଲଟି ଭୌମନଗରରେ ରହିଛି। ତାଙ୍କର ସ୍କୁଲ ପହଞ୍ଚତ୍ବା ଶେଷ ସମୟ ହେଉଛି ୭ଟା ୩୦। ମାତ୍ର ଲିଙ୍ଗିପୁର ଦେଇ ଯାଉଥିବା ମୋ ବସ୍ଟି ୭ଟା ୪୦ରେ ତାଙ୍କ ଘର ନିକଟରୁ ଛାଡ଼ିଥାଏ। ତେଣୁ ସ୍କୁଲରେ ପହଞ୍ଚତ୍ବାରେ ବହୁ ବିଳମ୍ବ ହେଉଥିବାରୁ ପାଠପଢ଼ାରେ ସମସ୍ୟାର ସମ୍ମୁଖୀନ ହେଉଛନ୍ତି। ଏଥିପ୍ରତି ଦୃଷ୍ଟି ଦେବାକୁ ସେ ବୋଥ୍ରାଙ୍କୁ ନିବେଦନ କରିଥିଲେ। ତେବେ ଏହି ଟୁଇଟ୍ର ମାତ୍ର କିଛି ସମୟ ମଧ୍ୟରେ ବୋଥ୍ରାଙ୍କ ସହଯୋଗରେ କ୍ରୁଟ୍ ରୁଟ୍ ନଂ.୧୩ରେ ଚଳାଚଳ କରୁଥିବା ମୋ ବସ୍ର ସମୟ ସୂଚୀରେ ପରିବର୍ତ୍ତନ କରିଛି। ବସ୍ଟି ଲିଙ୍ଗିପୁରରେ ୭ଟା ୪୦ରୁ ଛାଡ଼ିବା ପରିବର୍ତ୍ତେ ଏଣିକି ୭ଟାରେ ଛାଡ଼ିବ। ସାଇ ଅନ୍ବେଷଙ୍କୁ ସ୍କୁଲ ଯିବାରେ ଆଉ ଅସୁବିଧା ହେବନାହିଁ ବୋଲି ବୋଥ୍ରା କହିଛନ୍ତି। ତେବେ ଏହାର ସବୁ ଶ୍ରେୟ ମୋ ବସ୍ କର୍ତ୍ତୃପକ୍ଷ ଓ କ୍ରୁଟ୍ ଜିଏମ୍ ଦୀପ୍ତି ମହାପାତ୍ରଙ୍କୁ ଦେଇଛନ୍ତି ଅରୁଣ ବୋଥ୍ରା।
