ତେହେରାନ,୪।୧୨ : ଦୁଇ ମାସରୁ ଇରାନରେ ହିଜାବ ବିରୋଧୀ ଆନ୍ଦୋଳନରେ ଏପର୍ଯ୍ୟନ୍ତ ଶହ ଶହ ଲୋକ ପ୍ରାଣ ହରାଇଛନ୍ତି। ବର୍ତ୍ତମାନ ଇରାନର ଇସଲାମ ସରକାର ଲୋକଙ୍କ ଦାବି ଆଗରେ ମୁଣ୍ଡ ନୋଇବାକୁ ପ୍ରସ୍ତୁତ ହେବାକୁ ଯାଉଛନ୍ତି। ଖବର ଅନୁଯାୟୀ ସରକାର ନତମସ୍ତକ ହେବା ପାଇଁ ନିଷ୍ପତ୍ତି ନେଇଛନ୍ତି। ଏହି ଦଶନ୍ଧି ପୁରୁଣା ଆଇନରେ ପରିବର୍ତ୍ତନ ଆଣିବାକୁ ଇରାନ ସରକାର ନିଷ୍ପତ୍ତି ନେଇଛନ୍ତି। ସମ୍ପ୍ରତି ୪୦ ବର୍ଶ ପୁରୁଣା ଆଇନ ଅନୁସାରେ ଇରାନର ମହିଳାମାନେ ହିଜାବ ପିନ୍ଧିବା ଆବଶ୍ୟକ। ଯଦି ସେମାନେ ତାହା କରନ୍ତି ନାହିଁ ତେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
୧୬ ସେପ୍ଟେମ୍ବରରେ ମୂଳ କୁର୍ଦ୍ଦ ୨୨ ବର୍ଷ ବୟସ୍କା ମହସା ଆମିନୀଙ୍କ ପୋଲିସ ହେପାଜତରେ ମୃତ୍ୟୁ ଘଟିଥିଲା। ପୋଲିସ ତାଙ୍କ ହିଜାବ ଖସିପଡ଼ିବା ନେଇ ନିର୍ଯାତନା ଦେଇଥିଲା। ଯଦିଓ ଇରାନ ପ୍ରଶାସନ କ୍ରମାଗତ ଭାବରେ ସ୍ପଷ୍ଟୀକରଣ ଦେଉଛି ଏବଂ କହିଛି ଯେ ମହସାଙ୍କ ମୃତ୍ୟୁ ଏକ ଦୁର୍ଘଟଣା। ଇରାନରେ ଶରିଆ ଉପରେ ଆଧାରିତ ହିଜାବ ଆଇନ ଲାଗୁ କରାଯାଇଛି।
ଆମିନୀଙ୍କ ମୃତ୍ୟୁ ପରେ ଆରମ୍ଭ ହୋଇଥିବା ଏହି ଆନ୍ଦୋଳନ କେବଳ ଇରାନ ନୁହେଁ ଅନ୍ୟ ଅନେକ ଦେଶ ମଧ୍ୟ ସମର୍ଥନ କରିଥିଲେ। ଏନେଇ ଆମେରିକା ଏବଂ ବ୍ରିଟେନର ଷଡଯନ୍ତ୍ର ହୋଇଥିବା ବିଷୟରେ ଇରାନ ସରକାର ମଧ୍ୟ କହିଥିଲେ। ମହିଳାମାନେ ସେମାନଙ୍କର ହିଜାବ ବାହାର କରି ସର୍ବସାଧାରଣ ସ୍ଥାନରେ ପୋଡି ଦେଇଥିଲେ। ଏହି ସମୟରେ ପୋଲିସ ମଧ୍ୟ ଅନେକ ସ୍ଥାନରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା ଏବଂ ଅନେକ ଲୋକଙ୍କ ମୃତ୍ୟୁ ଘଟିଥିଲା। ଇରାନର ଆଟର୍ନି ଜେନେରାଲ ମହମ୍ମଦ ଜାଫର ମୋଣ୍ଟେଜେରି କହିଛନ୍ତି ଯେ ଉଭୟ ସଂସଦ ଏବଂ ନ୍ୟାୟପାଳିକା ଏହି ସମସ୍ୟାର ସମାଧାନ ପାଇଁ କାର୍ଯ୍ୟ କରୁଛନ୍ତି।
ଏହି ଆଇନରେ କେଉଁ ପରିବର୍ତ୍ତନଗୁଡିକ ବିଚାର କରାଯାଉଛି ତାହା ଆଟର୍ନି ଜେନେରାଲ ସ୍ପଷ୍ଟ କରି ନାହାଁନ୍ତି। ଆଟର୍ନି ଜେନେରାଲ କହିଛନ୍ତି ଯେ ଏହି ନିଷ୍ପତ୍ତି ଏକ କିମ୍ବା ଦୁଇ ସପ୍ତାହ ମଧ୍ୟରେ ଜଣା ପଡିବ। ରାଷ୍ଟ୍ରପତି ଇବ୍ରାହିମ ରାଇସି କହିଛନ୍ତି ଯେ ସମ୍ବିଧାନକୁ କାର୍ଯ୍ୟକାରୀ କରିବା ପାଇଁ କିଛି ଉପାୟ ଅଛି। ଆମେ ଏହା ଉପରେ କାର୍ଯ୍ୟ କରୁଛୁ।
ଇରାନର ଇସଲାମିକ ଗାର୍ଡ କର୍ପସର ଜଣେ ଜେନେରାଲ କହିଛନ୍ତି ଯେ ମହସା ଆମିନୀଙ୍କ ମୃତ୍ୟୁକୁ ନେଇ ଆନ୍ଦୋଳନ ଯୋଗୁ ପ୍ରାୟ ୩୦୦ ଲୋକଙ୍କ ମୃତ୍ୟୁ ଘଟିଥିଲା। ଏଥି ସହିତ, କେତେକ ମାନବାଧିକାର ସଂଗଠନ ଦାବି କରିଛନ୍ତି ଯେ ୪୪୮ରୁ ଅଧିକ ଲୋକଙ୍କ ମୃତ୍ୟୁ ଘଟିଛି। ଜାତିସଂଘର ମାନବାଧିକାର ମୁଖ୍ୟ କହିଛନ୍ତି ଯେ ଇରାନରେ ଶିଶୁ ଏବଂ ମହିଳାଙ୍କ ସମେତ ୧୪ ହଜାର ଲୋକଙ୍କୁ ଗିରଫ କରାଯାଇଛି।
