ଭୁବନେଶ୍ୱର, ୩୦।୪(ବ୍ୟୁରୋ): ଯୁବକଙ୍କୁ ରାସ୍ତାରୁ ଅପହରଣ ପରେ ଏକ ଘରେ ମୁଣ୍ଡଜାମିନ ରଖି ନିର୍ଯାତନା ଦେବା ସହ ଟଙ୍କା ଦାବି କରିଥିଲେ ଅପହର୍ତ୍ତା। ଖବର ପାଇ ଖଣ୍ଡଗିରି ଥାନା ପୋଲିସ ଯଦୁପୁରରେ ଚଢ଼ାଉ କରି ଉକ୍ତ ଯୁବକଙ୍କୁ ଉଦ୍ଧାର କରିବା ସହ ୨ ଅପହରଣକାରୀଙ୍କୁ ଗିରଫ କରିଛି। ସେମାନେ ହେଲେ ଖୋର୍ଦ୍ଧା ଜିଲା ବେଗୁନିଆର ସେକ୍ ରାଜୁ (୨୪) ଓ ସେକ ନାଜିମ (୨୯)। ଏନେଇ ପୋଲିସ ମାମଲା (ନଂ.୨୧୭/୨୨) ରୁଜୁ କରି ଅଭିଯୁକ୍ତଦ୍ୱୟଙ୍କୁ ଶୁକ୍ରବାର କୋର୍ଟ ଚାଲାଣ କରିଛି।
ପୋଲିସ ସୂଚନାନୁଯାୟୀ, ଅପହୃତ ଯୁବକ ହେଲେ ଜାଗମରା ଉପରସାହିର ଆଦିତ୍ୟ ରାଜ୍ ଜେନା। ଗତ ୨୮ ତାରିଖରେ ସେ ତାଙ୍କ ସାଙ୍ଗଙ୍କ ସହିତ ହୋଟେଲ ରାଜବୋଗାର ଆଗରେ ଛିଡା ହୋଇଥିଲେ। ଏହି ସମୟରେ ଦୁଇ ଅଭିଯୁକ୍ତ ରାଜୁ ଓ ନାଜିମ କାରରେ ଆସି ତାଙ୍କୁ ବଳପୂର୍ବକ କାର ଭିତରକୁ ଟାଣି ନେଇ ଅପହରଣ କରିନେଇଥିଲେ। ଏହାପରେ ତାଙ୍କୁ ଯଦୁପୁର ଗ୍ରାମକୁ ନେଇ ଏକ କୋଠରିରେ ରଖି ଖଣ୍ଡା ଓ ବାଡିରେ ଆକ୍ରମଣ କରିବା ସହ ନଗଦ ୫୦ ହଜାର ଟଙ୍କା ମାଗିଥିଲେ। ପାଖରେ ଟଙ୍କା ନ ଥିବାରୁ ଅଭିଯୁକ୍ତଦ୍ୱୟ ତାଙ୍କ ସାଙ୍ଗ ସୁରଜଙ୍କୁ ଫୋନ କରି ଟଙ୍କା ଦାବି କରିଥିଲେ। ନଚେତ୍ ଜୀବନରୁ ମାରିଦେବେ ବୋଲି ଧମକ ଦେଇଥିଲେ। ଏନେଇ ସୁରଜ ଖଣ୍ଡଗିରି ପୋଲିସକୁ ସୂଚନା ଦେଇଥିଲେ। ପୋଲିସ ତୁରନ୍ତ ଘଟଣାସ୍ଥଳକୁ ଯାଇ ଅପହୃତ ଆଦିତ୍ୟଙ୍କୁ ଆହତ ଅବସ୍ଥାରେ ଉଦ୍ଧାର କରିବା ସହ ୨ ଅପହରଣକାରୀଙ୍କୁ ଗିରଫ କରିଥିଲା ।
