ବୈପାରିଗୁଡ଼ା,୧୧ା୧(କଳ୍ପତରୁ ମହାନ୍ତି): କୋରାପୁଟ ଜିଲା ବୈପାରିଗୁଡ଼ା ଥାନା ଅଧୀନ ମାଝିଗୁଡ଼ା ପଞ୍ଚାୟତ ଭାଲିଆପଦର ଗାଁରେ ଏକ ଦୁଃଖଦ ଘଟଣା ଘଟିଛି। ସ୍ତ୍ରୀ, ସ୍ବାମୀ ଦୁହେଁ ଆତ୍ମହତ୍ୟା କରିଥିବା ଜଣାପଡିଛି। ବଚସାକୁ କେନ୍ଦ୍ରକରି ପ୍ରଥମେ ସ୍ତ୍ରୀ ଆତ୍ମହତ୍ୟା କରିଦେଇଥିଲେ। ଏହି ଦୁଃଖ ସହି ନ ପାରି ପରେ ସ୍ବାମୀ ଜୀବନ ହାରିଥିବା ଜଣାପଡ଼ିଛି।
ମିଳିଥିବା ସୂଚନା ମୁତାବକ, ବୁଧବାର ରାତିରେ କୌଣସି ଘଟଣାକୁ କେନ୍ଦ୍ରକରି ସ୍ବାମୀ ଦିନୁ ପରଜା(୪୫) ଓ ସ୍ତ୍ରୀ ରୁକ୍ମିଣୀଙ୍କ ମଧ୍ୟରେ ବଚସା ହୋଇଥିଲା। ଉକ୍ତ ଘଟଣା ପରେ ଦିନୁ ବାହାରକୁ ଚାଲିଯାଇଥିଲେ। ଏହି ସମୟରେ ରୁକ୍ମିଣୀ ଘର ଭିତରେ ଦଉଡି ଲଗାଇ ଆତ୍ମହତ୍ୟା କରିଥିଲେ। ଘର ଭିତରୁ କିଛି ଶବ୍ଦ ଶୁଣି ପଡ଼ୋଶୀ ଲୋକେ ଓ ସ୍ବାମୀ ଦିନୁ ଘର ଭିତରକୁ ଆସି ଦେଖିବା ବେଳକୁ ରୁକ୍ମିଣୀଙ୍କ ମୃତଦେହ ଝୁଲୁଥିଲା। ସମସ୍ତେ ମିଶି ମୃତଦେହ ବାହାର କରି ତଳକୁ ଆଣିଥିଲେ। ଘଟଣା ପରେ ଦିନୁ ମର୍ମାହତ ହୋଇ ସେହି ରାତିରେ ଘରଠାରୁ କିଛି ଦୂରରେ ଥିବା ଏକ କାଜୁବାଡ଼ିରେ ଦଉଡ଼ି ଲଗାଇ ଆତ୍ମହତ୍ୟା କରିଥିଲେ।
ଗୁରୁବାର ଦିନୁଙ୍କ ପରିବାର ଲୋକେ ବୈପାରିଗୁଡ଼ା ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା। ଏନେଇ ପୋଲିସ ଏକ ମାମଲା(ନଂ. ୧ ଓ ୨/୨୪) ରୁଜୁ କରି ତଦନ୍ତ ଆରମ୍ଭ କରିଛି।
