ଦିଗପହଣ୍ଡି,୨।୩(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ବମୋକେଇ ପଞ୍ଚାୟତ ବାରିଆକଟା ଗ୍ରାମ ମା’ ବୁଢ଼ୀ ଠାକୁରାଣୀଙ୍କ ମନ୍ଦିର ପୁନଃରୁଦ୍ଧାର ନିମନ୍ତେ ଗତ ୨୦୨୩-୨୪ ଆର୍ଥିକବର୍ଷରେ ମୁଖ୍ୟମନ୍ତ୍ରୀଙ୍କ ସ୍ଵତନ୍ତ୍ର ପାଣ୍ଠିରୁ ୪ ଲକ୍ଷ ଟଙ୍କା ବ୍ୟୟ ମଞ୍ଜୁରୀ କରାଯାଇଥିଲା। ବ୍ଲକ କାର୍ଯ୍ୟାଳୟ କନିଷ୍ଠଯନ୍ତ୍ରୀ ସୁବ୍ରତ ମହାରଣାଙ୍କ ନାଁରେ କାର୍ଯ୍ୟାଦେଶ ଦିଆଯାଇ ରାଜମିସ୍ତ୍ରୀ କୈଳାସ ପ୍ରଧାନଙ୍କୁ ନିର୍ମାଣ କାମ ନିମନ୍ତେ ଦାୟିତ୍ଵ ଦିଆଯାଇଥିଲା। ଅର୍ଦ୍ଧନିର୍ମିତ ମନ୍ଦିରର ଇଟା ଯୋଡେଇ ସରିବା ପରେ ନିର୍ମାଣ କାର୍ଯ୍ୟର ମଧ୍ୟବର୍ତ୍ତୀକାଳୀନ ଖର୍ଚ୍ଚ ଅର୍ଥରାଶିର ବିଲ୍ କରାଯିବ ବୋଲି ତାଙ୍କୁ କନିଷ୍ଠଯନ୍ତ୍ରୀ କହିଥିଲେ ।
ପରେ କାର୍ଯ୍ୟାଦେଶରେ ଉଲ୍ଲେଖ ଥିବା ସମସ୍ତ ନିର୍ମାଣ କାର୍ଯ୍ୟ ସରିଲେ ହିଁ ବିଲ୍ ମଞ୍ଜୁର କରାଯାଇ ଅର୍ଥରାଶି ପ୍ରଦାନ କରାଯିବ ବୋଲି ସେ ପ୍ରତିଶ୍ରୁତି ଦେଇଥିଲେ । ନିର୍ମାଣ କାର୍ଯ୍ୟର ବର୍ଷାଧିକ ସମୟ ବିତିଯାଇଥିଲେ ଶ୍ରମିକମାନଙ୍କ ବକେୟା ମଜୁରୀ ୨,୩୮୦୦୦ ଟଙ୍କା ପ୍ରଦାନ କରିବାରେ ବ୍ଲକ ପ୍ରଶାସନ ଟାଳ ଟୁଳ ନୀତି ଅବଲମ୍ବନ କରିବାରୁ ଗତ ଜାନୁଆରୀ ୯ ତାରିଖରେ ଏ ନେଇ ଗଞ୍ଜାମ ଜିଲାପାଳ, ବ୍ରହ୍ମପୁର ଅତିରିକ୍ତ ଶ୍ରମ କମିଶନର ଏବଂ ଦିଗପହଣ୍ଡି ବିଡ଼ିଓ ଗୋଷ୍ଠୀଙ୍କୁ ଅବଗତ କରାଯାଇଥିଲା। କିନ୍ତୁ ଏହାର କୌଣସି ସୁଫଳ ମିଳିଲା ନାହିଁ ।
ସୋମବାର ସି.ପି.ଆଇ(ଏମ) ର ପ୍ରାକ୍ତନ ଗଞ୍ଜାମ ଜିଲା ସମ୍ପାଦକ କୈଳାଶ ଷଡ଼ଙ୍ଗୀ, ଆଇନଜୀବୀ କୁରେଶୁ ପଣ୍ଡା, ରାଜମିସ୍ତ୍ରୀ ୟୁନିୟନର ସମ୍ପାଦକ ଉପେନ୍ଦ୍ର ବେହେରା, ରାଜମିସ୍ତ୍ରୀ କୈଳାଶ ପ୍ରଧାନ, ସମ୍ବାରୁ ପାଇକ, ସୂର୍ଯ୍ୟମଣି ପାଇକ, ନାର୍ସୁ ପାଇକ, ବୁଲୁ ପ୍ରଧାନ ପ୍ରମୁଖ ସୋମବାର ବ୍ଲକ କାର୍ଯ୍ୟାଳୟରେ ପହଞ୍ଚି ଦିଗପହଣ୍ଡି ବିଡ଼ିଓଙ୍କ ଉଦ୍ଦେଶ୍ୟରେ ଅତିରିକ୍ତ ବିଡ଼ିଓ ଉମେଶ ସେଠୀଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି । ବିଡ଼ିଓ ଅନାମିକା ପାଣ୍ଡେଙ୍କୁ ଏନେଇ ପଚାରିବାରୁ ଅଭିଯୋଗର ତଦନ୍ତ କରାଯାଇ ଆବଶ୍ୟକ ପଦକ୍ଷେପ ନିଆଯିବ ବୋଲି କହିଛନ୍ତି । ଏନେଇ ସମ୍ପୃକ୍ତ କନିଷ୍ଠ ଯନ୍ତ୍ରୀଙ୍କ ପ୍ରତିକ୍ରିୟା ପାଇଁ ଚେଷ୍ଟା କରାଯାଇଥିଲେ ମଧ୍ୟ ତାଙ୍କ ସହ ଯୋଗାଯୋଗ ସମ୍ଭବ ହୋଇପାରିନାହିଁ ।
