ବ୍ରହ୍ମପୁର,୨୯ା୧୦(ସୁବାସ ଚନ୍ଦ୍ର ପାଢ଼ୀ): ଗଞ୍ଜାମ ଜିଲା ସଦର ଥାନା ଅନ୍ତର୍ଗତ ବାଲିପଡ଼ା ନିକଟସ୍ଥ ନାରାୟଣପୁର ଗ୍ରାମରେ ଶୁକ୍ରବାର ରାତିରେ ଦୁନିଆ ସାହୁ, ତାଙ୍କ ଭାଇ ଆଲୋକ ସାହୁ ଓ ମା’ କୁନି ସାହୁଙ୍କୁ ସଂଘବଦ୍ଧ ଭାବେ ଘାତକ ଆକ୍ରମଣ ହୋଇଥିଲା। ସେମାନଙ୍କୁ ଏମ୍କେସିଜି ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ଦୁନିଆଙ୍କୁ ମୃତ ଘୋଷଣା କରିଥିଲେ। ଶନିବାର ପୋଲିସ ଦୁନିଆ ସାହୁଙ୍କ ମୃତଦେହ ପଞ୍ଚନାମା କରିବା ପରେ ବ୍ୟବଛେଦ ପାଇଁ ପଠାଇଥିଲା। ଥାନାରେ ଏନେଇ ଏକ ହତ୍ୟା ମାମଲା ରୁଜୁ ହୋଇଛି। ଉକ୍ତ ହତ୍ୟାକାଣ୍ଡ ପଛରେ ପ୍ରେମ ବ୍ୟାପାର ଓ ପୂର୍ବ ଶତ୍ରୁତା ଥିବା ପୋଲିସ କହିଛି। ଅପରାଧୀମାନେ ଚିହ୍ନଟ ହୋଇଥିବା ବେଳେ ଖୁବଶୀଘ୍ର ସେମାନଙ୍କୁ ଗିରଫ କରାଯିବ ବୋଲି ସଦର ଏସଡ଼ିପିଓ ଶିବ ଶଙ୍କର ମହାପାତ୍ର ସୂଚନା ଦେଇଛନ୍ତି। ଦୁନିଆ ଓ ମା’ କୁନି ଏକ ମାମଲାରେ ଗତ ମାର୍ଚ୍ଚ ମାସରେ ଗିରଫ ହୋଇଥିଲେ। କୁନିଙ୍କୁ ଜାମିନ୍ ମିଳିଯାଇଥିବା ବେଳେ ପ୍ରାୟ ୧ମାସ ତଳେ ଦୁନିଆ ଜାମିନରେ ଆସିଥିଲେ। ପରେ ଦୁନିଆ ଭାଇଗିରି ଦେଖାଇବାକୁ ନିଜର ସହଯୋଗୀମାନଙ୍କୁ ନେଇ ଆପରାଧିକ କାର୍ଯ୍ୟକଳାପ ବଢ଼ାଇବାକୁ ଚେଷ୍ଟା ଚଳାଇଥିଲା। ଗାଁର ଏକ ପରିବାର ସହିତ ଦୁନିଆଙ୍କ ଶତ୍ରୁତା ରହିଥିଲା। ଏଣୁ ସେହି ପରିବାରର ଜଣେ ସଦସ୍ୟ ତା’ର ସହଯୋଗୀ ସହାୟତାରେ ଏହି ହତ୍ୟାକାଣ୍ଡ ଘଟାଇଥିବା ପୋଲିସ ତଦନ୍ତରେ ଜାଣିବାକୁ ପାଇଛି। ହତ୍ୟାକାରୀଙ୍କୁ ଧରିବା ପାଇଁ ଏକ ଟିମ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି।
ସୂଚନା ଅନୁସାରେ, ମାର୍ଚ୍ଚ ୧୬ ତାରିଖରେ ନିମଖଣ୍ଡି ଥାନା ଅନ୍ତର୍ଗତ ଶ୍ରୀକ୍ଷେତ୍ରବିହାର ସ୍ଥିତ ଏକ ଘରେ କିଛି ଅପରାଧୀ ଲୁଚି ରହିଥିବା ପୋଲିସ ଖବର ପାଇଥିଲା। ପୋଲିସ ସେଠାରେ ଚଢ଼ଉ କରିବାରୁ ଅପରାଧୀମାନେ ବୋମାମାଡ଼ କରିଥିଲେ। ବୋମାମାଡ଼ରୁ ପୋଲିସ ଅଳ୍ପକେ ବର୍ତ୍ତି ଯାଇଥିଲା। ଏହି ଘଟଣାରେ ନିମଖଣ୍ଡି ପୋଲିସ ୫ଜଣଙ୍କୁ ଗିରଫ କରିଥିଲା। ଗିରଫଙ୍କ ମଧ୍ୟରେ ଦୁଇଜଣ ମହିଳା ଥିବା ବେଳେ ୩ଜଣ ପୁରୁଷ ଥିଲେ। ସେମାନଙ୍କ ମଧ୍ୟରେ ମା’ କୁନି ଓ ପୁଅ ଦୁନିଆ ଥିଲେ। ସେତେବେଳେ ଉଭୟ ମା’, ପୁଅ ଗିରଫ ହୋଇ ଜେଲ୍ ଯାଇଥିଲେ। ଦୁନିଆ ସହିତ ଗାଁର ଏକ ପରିବାରର ଶତ୍ରୁତା ଲାଗି ରହିଥିଲା। ପ୍ରାୟ ୫ବର୍ଷ ହେଲା ଦୁନିଆଙ୍କ ସହିତ ଗାଁର ଅନ୍ୟ ଏକ ପରିବାର ସହିତ ତିକ୍ତତା ରହିଥିଲା। ଶୁକ୍ରବାର ସନ୍ଧ୍ୟାରେ ସେହି ପରିବାରର ଜଣେ ବ୍ୟକ୍ତି ତା’ର ସହଯୋଗୀ ସହିତ ଦୁନିଆଙ୍କ ଘରକୁ ଯାଇଥିଲେ। ସେମାନେ ଦୁନିଆଙ୍କୁ ଖଣ୍ଡାରେ ହାଣିବା ସହିତ ମା’ କୁନି ଓ ସାନପୁଅ ଆଲୋକଙ୍କୁ ମଧ୍ୟ ମରଣାନ୍ତକ ଆକ୍ରମଣ କରିଥିଲେ। ଏହି ଘଟଣାରେ ୩ଜଣ ଗୁରୁତର
ହୋଇଥିବା ବେଳେ ଚିକିତ୍ସାଧୀନ ଅବସ୍ଥାରେ ଦୁନିଆଙ୍କ ମୃତ୍ୟୁ ଘଟିଥିଲା।
