ବ୍ରହ୍ମପୁର ଅଫିସ,୯।୨: ବ୍ରହ୍ମପୁର ମହାନଗର ନିଗମ (ବିଏମ୍ସି) ପକ୍ଷରୁ ସ୍ବଚ୍ଛତା ଦିବସ ଅବସରରେ ସହରର ବିଭିନ୍ନ ପୋଖରୀଗୁଡିକୁ ସଫେଇ କାର୍ଯ୍ୟ ନେଇ ପଦକ୍ଷେପ ଗ୍ରହଣ କରାଯାଇଛି। ବ୍ରହ୍ମପୁର ସହରରେ ମୋଟ ୪୨ ପୋଖରୀ ରହିଛି। ପ୍ରତ୍ୟେକ ମାସ ମଙ୍ଗଳବାର ବିଭିନ୍ନ ପୋଖରୀଗୁଡିକର ସଫେଇ ନିମନ୍ତେ ପଦକ୍ଷେପ ନିଆଯାଇଛି। ଗତ ୧ ତାରିଖରେ ଗଞ୍ଜାମ ଜିଲାପାଳ, ବିଏମ୍ସି କମିଶନର,ଏନ୍ଫୋର୍ସମେଣ୍ଟ ଅଧିକାରୀଙ୍କ ଉପସ୍ଥିତିରେ ବିଏମ୍ସି ୱାର୍ଡ ନଂ.୨୪ ଅନ୍ତର୍ଗତ ସୁନାରୀ ବନ୍ଧ ସଫେଇ କାର୍ଯ୍ୟ କରାଯାଇଥିଲା। ଯେଉଁଥିରେ ଖୋଦ ଜିଲାପାଳ ପୋଖରୀ ସଫେଇ କରିଥିଲେ। ପୋଖରୀରେ ପଡି ରହିଥିବା ଅଳିଆ ଆବର୍ଜନା ଓ ବିଭିନ୍ନ ପୂଜା ସାମଗ୍ରୀ ସଫା କରାଯାଇଥିଲା। କିନ୍ତୁ ସେହି ଦିବସ ପରେ ପୋଖରୀରେ ପୁଣି ପୂର୍ବଭଳି ଅଳିଆ ଆବର୍ଜନା ଓ ବିଭିନ୍ନ ପୂଜା ସାମଗ୍ରୀ ପଡି ରହିଥିବା ଦେଖିବାକୁ ମିଳିଛି। ସ୍ବଚ୍ଛତା ଦିବସ ପାଳନ ସମୟରେ ପୋଖରୀ ସଫେଇ ନେଇ ସଚେତନ କରାଗଲା ସତ, କିନ୍ତୁ ସବୁଦିନିଆ ସଫେଇ ପାଇଁ ବିଏମ୍ସି ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଗଲା ନାହିଁ। ଫଳରେ ପାହାଚଠାରୁ ଆରମ୍ଭ କରି ପାଣି ମଧ୍ୟରେ କୁଢ କୁଢ ଆବର୍ଜନା ପଡିରହିଛି। ଏପରିକି ଗାଧୁଆ ତୁଠ ମଧ୍ୟ ପରିଷ୍କାର ନାହିଁ। ଭିତରେ ଘାସବୁଦା ଉଠି ଅଧିକାଂଶ ଅଂଶ ପୋତି ହୋଇଯାଇଛି। ଅନ୍ୟପଟେ ପୋଖରୀକୁ ଲାଗି ୨ଟି ମନ୍ଦିର ରହିଥିବା ବେଳେ ମନ୍ଦିରର ସମସ୍ତ ପୂଜା ସାମଗ୍ରୀ ପଡି ପାଣି ଦୂଷିତ ହେଉଥିବା ନଜିର ରହିଛି। ଯାହାଦ୍ୱାରା ଏହା ଉପରେ ନିର୍ଭର କରୁଥିବା ବହୁ ବାସିନ୍ଦା ଚର୍ମ ରୋଗର ଶିକାର ହେଉଥିବା ଅଭିଯୋଗ ହୋଇଛି। ଅନ୍ୟପଟେ ଏହି ପୋଖରୀର ପୁନରୁଦ୍ଧାର କିମ୍ବା ସଫେଇ ନିମନ୍ତେ ବିଏମ୍ସି କର୍ତ୍ତୃପକ୍ଷ କୌଣସି ପଦକ୍ଷେପ ଗ୍ରହଣ କରୁ ନ ଥିବା ଅଭିଯୋଗ ହୋଇଛି। ଏହା ପାର୍ଶ୍ୱରେ କେବଳ ତାରଜାଲି ଲଗାଯାଇଥିବା ବେଳେ ପୋଖରୀ ସଫେଇ କ୍ଷେତ୍ରରେ ପଦକ୍ଷେପ ଗ୍ରହଣ କରାଯାଉ ନ ଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। କେବଳ କାୈଣସି ଦିବସ ପାଳନ ଅବସରରେ ସଫେଇ କାର୍ଯ୍ୟ ହାତକୁ ନିଆଯାଉଛି। ଏହାପରେ ଏଥିପ୍ରତି ଦୃଷ୍ଟି ଦିଆଯାଉ ନ ଥିବା ଅଭିଯୋଗ ହୋଇଛି। ଏଣୁ ପୋଖରୀ ସଫେଇ କ୍ଷେତ୍ରରେ ବିଏମ୍ସି କର୍ତ୍ତୃପକ୍ଷ ଉଚିତ ପଦକ୍ଷେପ ଗ୍ରହଣ କରିବା ପାଇଁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ବିଏମ୍ସି ଏନ୍ଫୋର୍ସମେଣ୍ଟ ଅଧିକାରୀ ତରୁଣକାନ୍ତଙ୍କୁ ପଚାରିବାରୁ ସଫେଇ ଲାଗି ଆକ୍ଟିଭ୍ ଆକ୍ସନ ଟିମ୍ ଗଠନ କରାଯିବ । ତା’ପରେ ସଫେଇ ଲାଗି ପଦକ୍ଷେପ ନିଆଯିବ ବୋଲି କହିଥିଲେ।
