ଦିଗପହଣ୍ଡି,୨୨ା୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଫାସିଗୁଡ଼ା ପଞ୍ଚାୟତ ଜଲମେରିପଲ୍ଲୀ ଗ୍ରାମର ସିମାଞ୍ଚଳ ରାଉତଙ୍କ ସ୍ତ୍ରୀ ଊର୍ମିଳା ରାଉତ(୫୧) ରବିବାର ସକାଳେ ଦନ୍ତା ହାତୀ ଆକ୍ରମଣରେ ମୃତ୍ୟୁବରଣ କରିଛନ୍ତି। ଦିଗପହଣ୍ଡି ପୋଲିସ ତାଙ୍କ ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରିଥିଲା। ତାଙ୍କ ଚକ୍ଷୁ ୨ଟିକୁ ପରିବାର ଲୋକେ ସ୍ବେଚ୍ଛାକୃତ ଭାବେ ଦାନ କରିବାକୁ ଚାହିଁଥିଲେ। ବ୍ୟବଚ୍ଛେଦ ପୂର୍ବରୁ ପରିବାର ଲୋକଙ୍କ ସହମତିରେ ବଡ଼ ଡାକ୍ତରଖାନା ଚକ୍ଷୁ ବିଭାଗ ଡାକ୍ତରୀ ଟିମ୍ ତାଙ୍କ ଦୁଇଟି ଚକ୍ଷୁକୁ ସଂଗ୍ରହ କରିଥିଲେ।
ମୃତ୍ୟୁ ପରେ ବି ଅମର ହୋଇଗଲେ ଊର୍ମିଳା। ଦାନ କରିଥିବା ଦୁଇ ଚକ୍ଷୁରେ ସେ ଜୀବଜଗତ ଦେଖିପାରିବେ ବୋଲି ଡାକ୍ତର କହିବା ପରେ ଉପସ୍ଥିତ ପରିବାର ଲୋକେ ଭୋଭୋ ହୋଇ କାନ୍ଦିଥିଲେ। ସକାଳେ ଗାଁ ନିକଟ ପରିବା ବାଡ଼ରେ ସ୍ବାମୀଙ୍କ ସହ ମିଶି ଊର୍ମିଳା ହସଖୁସିରେ ଫୁଲକୋବି ତୋଳୁଥିଲେ ଦନ୍ତା ହାତୀକୁ ଦେଖି ଆଖପାଖରେ ଥିବା ଲୋକେ ପାଟିକଲେ। ହାତୀ ଆସିଥିବା ଜାଣି ଉଭୟ ସ୍ବାମୀ ସ୍ତ୍ରୀ ଦୌଡ଼ି ଥିଲେ। ସ୍ତ୍ରୀ ଦୌଡ଼ି ନ ପାରିବାରୁ ସ୍ବାମୀ ତାଙ୍କୁ ପିଠିରେ ପକାଇ ଦୌଡ଼ିବା ବେଳେ ହାତୀ ଶୁଣ୍ଢରେ ସ୍ତ୍ରୀଙ୍କୁ ଝିକି ନେଇଥିଲା। ସ୍ବାମୀ ଦୌଡ଼ି ଯାଇ ନିକଟରେ ଥିବା ଏକ ଆମ୍ବ ଗଛ କଡ଼ରେ ଠିଆ ହୋଇ ଭୟଭୀତ ଅବସ୍ଥାରେ ଥରୁଥିଲେ। ତାଙ୍କ ଆଖି ଆଗରେ ସ୍ତ୍ରୀ ଊର୍ମିଳାଙ୍କୁ ହାତୀ କଚାଡ଼ି ଦେବା ସହ ଦଳି ଦେଇଥିଲା।
ଖବରପାଇ ଦିଗପହଣ୍ଡି ବିଧାୟକ ଡ.ସିଦ୍ଧାନ୍ତ ମହାପାତ୍ର, ତହସିଲଦାର ସନ୍ତୋଷ କୁମାର ସାହୁ, ସରପଞ୍ଚ ପ୍ରତିନିଧି ଶିବରାମ ପ୍ରଧାନ, ଏମ୍.ସନ୍ତୋଷ, ଗଜପତି ଜିଲା ପାରଳାଖେମୁଣ୍ଡି ବନଖଣ୍ଡ କାର୍ଯ୍ୟାଳୟର ଅତିରିକ୍ତ ବନସଂରକ୍ଷକ ଅରୁଣ କୁମାର ସାହୁ, ଚନ୍ଦ୍ରଗିରି ରେଞ୍ଜର ରୂପକ କୁମାର ପ୍ରଧାନ, ଥାନା ଏସ୍.ଆଇ ରାଜକିଶୋର ପାତ୍ର ସଦଳବଳ ଗାଁରେ ପହଞ୍ଚି ପରିବାର ଲୋକଙ୍କୁ ସମବେଦନା ଜଣାଇବା ସହ ଉପସ୍ଥିତ ଗ୍ରାମବାସୀଙ୍କ ସହ ଆଲୋଚନା କରିଥିଲେ। ଗଞ୍ଜାମ ଜିଲାପାଳ କୀର୍ତ୍ତି ଭାସନଙ୍କ ନିର୍ଦ୍ଦେଶକ୍ରମେ ତହସିଲଦାର ଉଭୟ ମୃତକ ପରିବାରଙ୍କୁ ରେଡକ୍ରସ ପାଣ୍ଠିରୁ ୩୦ ହଜାର ଟଙ୍କା ଲେଖାଏ ଅନୁକମ୍ପା ମୂଳକ ସହାୟତା ରାଶି ପ୍ରଦାନ କରିଥିଲେ। ବନ ବିଭାଗ ପକ୍ଷରୁ ଅନୁକମ୍ପା ମୂଳକ ସହାୟତା ରାଶି ୧୦ ଲକ୍ଷ ଟଙ୍କା ମୃତକଙ୍କ ନିକଟ ସମ୍ପର୍କୀୟଙ୍କୁ ଦିଆଯିବ। ଶୁଦ୍ଧିକ୍ରିୟା ବାବଦକୁ ଅନୁକମ୍ପା ରାଶିର ୧୦ ପ୍ରତିଶତ ତତ୍କାଳ ପ୍ରଦାନ କରାଯିବ ବୋଲି ଅତିରିକ୍ତ ବନ ସଂରକ୍ଷକ କହିଛନ୍ତି।
