ନୂଆଦିଲ୍ଲୀ,୧୩।୧୦: ଏୟାର ଇଣ୍ଡିଆ ବିକ୍ରି ପରେ ଏବେ ସେଣ୍ଟ୍ରାଲ ଇଲୋକ୍ଟ୍ରୋନିକ୍ସ୍ ଲିମିଟେଡ୍ (ସିଇଏଲ୍) ବିକ୍ରି ହେବ। ଏନେଇ କେନ୍ଦ୍ର ସରକାରଙ୍କୁ ସିଇଏଲ୍ର ଶତ ପ୍ରତିଶତ ଅଂଶଧନ ଏବଂ ମ୍ୟାନେଜମେଣ୍ଟ୍ କଣ୍ଟ୍ରୋଲ ହସ୍ତାନ୍ତର କରିବା ଲାଗି ଫାଇନାନ୍ସିଆଲ ବିଡ୍ ହାସଲ ହୋଇଛି। ଏନେଇ ଅର୍ଥ ମନ୍ତ୍ରଣାଳୟ ପକ୍ଷରୁ ସୂଚନା ପ୍ରଦାନ କରାଯାଇଛି।
ପୁଞ୍ଜି ବିନିଯୋଗ ଏବଂ ପବ୍ଲିକ ଆସେଟ ମ୍ୟାନେଜମେଣ୍ଟ ବିଭାଗ (ଡିଆଇପିଏଏମ) ସଚିବ ତୁହିନ କାନ୍ତ ପାଣ୍ଡେ କହିଛନ୍ତି ଯେ, ସିଇଏଲ୍ରୁ ପୁଞ୍ଜି ପ୍ରତ୍ୟାହାର ପାଇଁ ଯୋଜନା ବଦ୍ଧ ଭାବେ ରଣନୀତି ପ୍ରସ୍ତୁତ ହୋଇଛି।
ତେବେ ସିଇଏଲ୍କୁ କିଣିବାକୁ ଆଗ୍ରହୀ ଥିବା କମ୍ପାନୀ ପାଖରେ ୨୦୧୯ ମାର୍ଚ୍ଚ ସୁଦ୍ଧା ୫୦ କୋଟିର ନିଟ୍ ଓ୍ବର୍ଥ ରହିଥିବା ଆବଶ୍ୟକ। ଆସନ୍ତା ୩ ବର୍ଷ ପାଇଁ ସମ୍ପୃକ୍ତ କମ୍ପାନୀ ସିଇଏଲ୍ର ଅଂଶଧନ ଅନ୍ୟ କାହାକୁ ବିକ୍ରି କରି ପାରିବେ ନାହିଁ ବୋଲି ସରକାରଙ୍କ ପକ୍ଷରୁ ସର୍ତ୍ତ ରଖାଯାଇଛି।
ସିଇଏଲ୍ କେନ୍ଦ୍ର ସରକାରଙ୍କ ଇଞ୍ଜିନିୟରିଂ କମ୍ପାନୀ। ଏହା ଉତ୍ତରପ୍ରଦେଶର ଗାଜିଆବାଦ ଜିଲାର ସାହିବାବାଦରେ ଅବସ୍ଥିତ। ଏହି କମ୍ପାନୀ ସୋଲାର ଫଟୋ ଭୋଲଟେଇକ୍ସ୍, ଫିରାଇଟ୍ସ୍, ପିଜୋ ସେରାମିକ୍ସ୍ ଆଦି ନିର୍ମାଣ କରିଥାଏ। ୧୯୭୭ରେ ପ୍ରଥମ କରି ସିଇଏଲ୍ ଭାରତରେ ସୋଲାର ସେଲ୍ ବିକଶିତ କରିଥିବାବେଳେ ୧୯୭୮ରେ ସୋଲାର ପ୍ୟାନେଲ୍ ନିର୍ମାଣ କରିଥିଲା।
ସେହିପରି ୧୯୯୨ରେ ସିଇଏଲ୍ ପକ୍ଷରୁ ଦେଶରେ ପ୍ରଥମ ସୋଲାର ପ୍ଲାଣ୍ଟ୍ ସ୍ଥାପନ କରାଯାଇଥିଲା। ସେହିପରି ୨୦୧୫ରେ ସିଇଏଲ୍ ପକ୍ଷରୁ ପ୍ରଥମେ କ୍ରିଷ୍ଟାଲାଇନ୍ ଫ୍ଲେକ୍ସିବୁଲ୍ ସୋଲା ପ୍ୟାନେଲ ବିକଶିତ କରାଯାଇଥିଲା। ଏହି ପ୍ୟାନେଳକୁ ଟ୍ରେନ୍ର ଛାତରେ ସ୍ଥାପନା କରାଯାଇ ଥାଏ। ସିଇଏଲ୍ ଲଗାତାର କ୍ଷତିରେ ଚାଲୁଥିବାରୁ ସରକାର ଏହାକୁ ବିକ୍ରି କରିବାର ଯୋଜନା କରିଛନ୍ତି।
