ଢେଙ୍କାନାଳ ଅଫିସ,୨୧।୪: ଢେଙ୍କାନାଳ ଜିଲାରେ ୨୦୧୮ରେ ଜଣେ ଆର୍ଆଇ ନିଜ ସିସିଆର୍ରେ ତତ୍କାଳୀନ ଜିଲାପାଳଙ୍କ ଦସ୍ତଖତ ଜାଲ କରିଥିବା ଘଟଣା ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲା। ଏହି ଘଟଣାର ଅଭିଯୁକ୍ତ ତଥା ସେତେବେଳର ଗଁଦିଆ ଓ ଭୁବନ ତହସିଲ ଯୁଗ୍ମ ଦାୟିତ୍ୱରେ ଥିବା ଆର୍ଆଇ ବିଶ୍ୱନାଥ ପ୍ରଧାନଙ୍କୁ ୫ବର୍ଷ ପରେ ଟାଉନଥାନା ପୋଲିସ ଗୁରୁବାର କାମାକ୍ଷାନଗରରୁ ଉଠାଇ ଆଣି ପଚରାଉଚରା କରୁଛି। ଆର୍ଆଇଙ୍କ ସିସିଆର ଓ ଅନ୍ୟ ଦସ୍ତାବିଜ୍ ଜବତ କରି ଯାଞ୍ଚ କରାଯାଉଛି।
ଅଭିଯୋଗରୁ ଜଣାପଡ଼ିଛି, ଆର୍ଆଇ ବିଶ୍ୱନାଥ ନିଜ ସିସିଆର୍ରେ ତାଙ୍କ କାର୍ଯ୍ୟଦକ୍ଷତା ଅତି ସନ୍ତୋଷଜନକ ବୋଲି ଲେଖି ତତ୍କାଳୀନ ଜିଲାପାଳ ରୂପାରୋଶନ ସାହୁଙ୍କ ଜାଲ ଦସ୍ତଖତ କରିଥିଲେ। ତେବେ ଏହା ରୂପାରୋଶନଙ୍କ ଦସ୍ତଖତ ନୁହେଁ ବୋଲି ସେ ସ୍ପଷ୍ଟ କରିଥିଲେ। ହେଲେ ଘଟଣା ଧରାପଡ଼ିବା ବେଳକୁ ରୂପାରୋଶନଙ୍କ ଅନ୍ୟତ୍ର ବଦଳି ହୋଇଯାଇଥିଲା। ସେତେବେଳର ଜିଲାପାଳ ଥିବା ନିଖିଲ ପଓ୍ବନ କଲ୍ୟାଣ ଏ ସଂକ୍ରାନ୍ତରେ ଟାଉନ ଥାନାରେ ଅଭିଯୋଗ କରିଥିଲେ। ଏ ନେଇ ନଂ. ୧୦୧/୧୮ରେ ଏକ ମାମଲା ରୁଜୁ ହୋଇଥିଲା। ତେବେ ପୋଲିସ ଏହାକୁ ଅତି ହାଲୁକା ଭାବେ ନେଇଥିଲା। ଘଟଣାର ଦୀର୍ଘ ୫ବର୍ଷ ପରେ ଟାଉନ ଥାନା ପୋଲିସ ମାମଲାର ତଦନ୍ତ ଆରମ୍ଭ କରିଥିଲା। ଇତିମଧ୍ୟରେ ବିଶ୍ୱନାଥଙ୍କ କାମାକ୍ଷାନଗର ତହସିଲକୁ ବଦଳି ହୋଇଥିବାବେଳେ ପୋଲିସ ତାଙ୍କୁ ସେଠାରୁ ଉଠାଇ ଆଣି ତନାଘନା ଆରମ୍ଭ କରିଛି। ପଚରାଉଚରା ସମୟରେ ବହୁ ତଥ୍ୟ ଜଣାପଡ଼ିଛି। ତତ୍କାଳୀନ ଅତିରିକ୍ତ ଜିଲାପାଳଙ୍କ ଷ୍ଟେନୋ, ପୂର୍ବତନ ଜିଲାପାଳଙ୍କ ଠିକାରେ ଗାଡ଼ି ଚଳାଉଥିବା ଡ୍ରାଇଭର ସେହି ସମୟରେ ଫାଇଲପତ୍ର ନେବା ଆଣିବା କରୁଥିଲେ। ସେମାନଙ୍କୁ ମଧ୍ୟ ତଦନ୍ତ ପରିସରଭୁକ୍ତ କରାଯାଇଛି। ଶୁକ୍ରବାର ଉଭୟଙ୍କୁ ପଚରାଉଚରା କରାଯିବ ବୋଲି ଟାଉନ ଥାନାଧିକାରୀ ରାଜେନ୍ଦ୍ର ପ୍ରଧାନ ସୂଚନା ଦେଇଛନ୍ତି।
