ପୁରୀ ଅଫିସ, ୬ା୧: ‘ସେ କୁଷ୍ଠ ରୋଗରେ ଆକ୍ରାନ୍ତ ହୋଇଥିବା ଜାଣିବା ପରେ ଏକ ନିଷ୍ଠୁର ନିଷ୍ପତ୍ତି ନେଇଥିଲେ ଓ ମୋତେ ଯିବାକୁ ଦେଇଥିଲେ। ସେ ଜଣେ ମହାନ୍ ମା’। କାରଣ ସେ କେବଳ ମୋ ପାଇଁ ଏଭଳି ପଦକ୍ଷେପ ନେଇଥିଲେ, ଯେପରିକି ମୁଁ ଭଲରେ ଜୀବନ ଜିଇ ପାରିବି।’ ଏହା ହେଉଛି ନିଜ ମା’ଙ୍କ ପ୍ରତି ଜଣେ ଝିଅର କିଛି ଆବେଗଭରା ଅଭିବ୍ୟକ୍ତି, ଯାହା କୌଣସି ଲୋକର ହୃଦୟକୁ ତରଳାଇଦେଇପାରେ।
୧୫ ବର୍ଷ ତଳେ ଓଡ଼ିଶାରୁ ଏକ ଅଷ୍ଟ୍ରେଲୀୟ ଦମ୍ପତିଙ୍କ ଦ୍ୱାରା ପୋଷ୍ୟ ଭାବେ ଗ୍ରହଣ ହୋଇଥିବା ମମତା ପୁରୀ ଚାଇଲ୍ଡ ଲାଇନକୁ ଏକ ଚିଠି ଲେଖିଛନ୍ତି। ସେଥିରେ ସେ ଏଭଳି କିଛି ଭାବପୂର୍ଣ୍ଣ ବାକ୍ୟ ଲେଖି ନିଜ ମା’ଙ୍କୁ ଖୋଜିଦେବା ପାଇଁ ଆକୁଳ ନିବେଦନ କରିଛନ୍ତି। ମମତା ଏବେ ପ୍ରାପ୍ତ ବୟସ୍କା ଏବଂ ସେ ଅଷ୍ଟ୍ରେଲିଆର ଭିକ୍ଟୋରିଆରେ ପାଳିତ ମାତା ପିତାଙ୍କ ପାଖରେ ରହି ସ୍ନାତକ ଶିକ୍ଷା ଶେଷ କରିଛନ୍ତି। ସମ୍ପ୍ରତି ସେ ନିଜର ଜନ୍ମଦାତ୍ରୀ ମା’ ବାସନ୍ତୀ ଦାସଙ୍କୁ ଖୋଜୁଛନ୍ତି। ବାସନ୍ତୀ ଖୋର୍ଦ୍ଧା ଜିଲାର ବାସିନ୍ଦା ବୋଲି ଜଣାପଡ଼ିଛି।
ଏ ନେଇ ପୁରୀ ଚାଇଲ୍ଡ ଲାଇନ୍ ନିର୍ଦ୍ଦେଶକ ଦେବାଶିଷ ରଥ କହିଛନ୍ତି, ୧୫ ବର୍ଷ ତଳେ ଅର୍ଥାତ୍ ୨୦୦୭ ଜାନୁୟାରୀ ୧୩ରେ ମାତ୍ର ୩ବର୍ଷ ବୟସରେ ମମତା ହଜିଯାଇଥିଲେ। ତାଙ୍କୁ ଏକାକୀ ଅସହାୟ ଅବସ୍ଥାରେ ପୁରୀ ସିଂହଦ୍ୱାର ନିକଟରୁ ପୁରୀ ଚାଇଲ୍ଡ ଲାଇନ କର୍ତ୍ତୃପକ୍ଷ ଉଦ୍ଧାର କରିଥିଲେ। ସେତେବେଳେ କୌଣସି ଶିଶୁ ମଙ୍ଗଳ କମିଟି ଗଠନ ହୋଇ ନ ଥିଲା। ତେଣୁ ତାଙ୍କୁ ନିଜ ମା’ଙ୍କୁ ହସ୍ତାନ୍ତର କରାଯାଇଥିଲା। ତେବେ ପରଦିନ ମମତାଙ୍କୁ ତାଙ୍କ ମା’ ଫେରାଇ ଦେଇଥିଲେ ଏବଂ ଝିଅର ଲାଳନପାଳନ ନେଇ ଅସହାୟତା ପ୍ରକାଶ କରିଥିଲେ। ସେତେବେଳେ ସମ୍ପୃକ୍ତ ମହିଳା ଦିବ୍ୟାଙ୍ଗ ହୋଇଥିବା ବେଳେ କୁଷ୍ଠରୋଗରେ ଆକ୍ରାନ୍ତ ଥିଲେ। ତାଙ୍କର ଏଭଳି ନିଷ୍ପତ୍ତିରେ ଆମେମାନେ ପ୍ରଥମେ ଆଶ୍ଚର୍ଯ୍ୟାନ୍ବିତ ହୋଇଥିଲୁ। ପରେ ତାଙ୍କୁ କଟକସ୍ଥିତ ବସୁନ୍ଧରା ଶିଶୁ ଯତ୍ନ କେନ୍ଦ୍ରକୁ ହସ୍ତାନ୍ତର କରାଯାଇଥିଲା। ଝିଅକୁ ଦେବା ନେଇ ଆଇନଗତ ପ୍ରକ୍ରିୟା ସମ୍ପୂର୍ଣ୍ଣ ହେବା ପରେ ମମତା ପ୍ରାୟ ୧୮ ମାସ ଧରି ବସୁନ୍ଧରା ଶିଶୁ ଯତ୍ନ କେନ୍ଦ୍ରରେ ରହିଥିଲେ। କୌଣସି ଭାରତୀୟ ଦମ୍ପତି ମମତାଙ୍କୁ ତାଙ୍କ ମା’ଙ୍କ ସ୍ବାସ୍ଥ୍ୟବସ୍ଥା ସମସ୍ୟା କାରଣରୁ କୋଳେଇ ନେବାକୁ ଆଗ୍ରହ ପ୍ରକାଶ କରି ନ ଥିଲେ। ତେବେ ଏକ ଅଷ୍ଟ୍ରେଲୀୟ ଦମ୍ପତି ମମତାଙ୍କୁ ପୋଷ୍ୟ ଭାବେ ଗ୍ରହଣ କରିବାକୁ ଇଚ୍ଛା ପ୍ରକାଶ କରି ଆଗେଇ ଆସିଥିଲେ। ସେହି ଦମ୍ପତି ନିୟମ ଅନୁସାରେ ମମତାଙ୍କୁ ପୋଷ୍ୟ ଝିଅ ଭାବେ ଗ୍ରହଣ କରି ସେମାନଙ୍କ ସାଥିରେ ଅଷ୍ଟ୍ରେଲିଆ ନେଇଯାଇଥିଲେ। ୨୦୧୯ରେ ଇ-ମେଲ୍ ମାଧ୍ୟମରେ ଚାଇଲ୍ଡ ଲାଇନ୍ ନିର୍ଦ୍ଦେଶକ ରଥଙ୍କ ନିକଟକୁ ଏକ ଫଟୋ ଆସିଥିଲା, ଯାହା ମମତାଙ୍କର ଥିଲା। ଏହି ଫଟୋ ଦେଖିବା ପରେ ମମତାଙ୍କୁ ରଥ ଚିହ୍ନିପାରିଥିଲେ। ମମତାଙ୍କୁ ପୋଷ୍ୟ ସନ୍ତାନ ଭାବେ ଗ୍ରହଣ କରିଥିବା ଦମ୍ପତି ରଥଙ୍କ ସହ କଥା ହୋଇଥିଲେ। ମମତା ପୁରୀ ଯିବା ସହ ତାଙ୍କ ମା’ଙ୍କୁ ଭେଟିବା ପାଇଁ ଚାହୁଁଛନ୍ତି ବୋଲି ସେମାନେ ଜଣାଇଥିଲେ। ପ୍ରାୟ ଦୁଇବର୍ଷ ତଳେ ନିଜ ମା’ଙ୍କୁ ଭେଟିବା ପାଇଁ ଇଚ୍ଛା ପ୍ରକାଶ କରି ମମତା ଇ-ମେଲ୍ ଯୋଗେ ପୁରୀ ଚାଇଲ୍ଡ ଲାଇନକୁ ଏକ ଚିଠି ପଠାଇଥିଲେ। ମାତ୍ର କୋଭିଡ୍ କଟକଣା କାରଣରୁ ସେତେବେଳେ ମମତା ତାଙ୍କ ପାଳିତ ମା, ବାପାଙ୍କ ସହିତ ପୁରୀ ଆସିପାରି ନ ଥିଲେ। ଚଳିତ ଜାନୁୟାରୀ ମାସ ୩ ତାରିଖରେ ତାଙ୍କ ୧୮ତମ ଜନ୍ମଦିନ ଅବସରରେ ସେ ପୁଣି ଏଭଳି ଏକ ଚିଠି ଲେଖିଛନ୍ତି। ପ୍ରତ୍ୟେକ ଥର ସେ ତାଙ୍କ ଚିଠିରେ ନିଜ ମା’ଙ୍କୁ ମହାନ ବୋଲି ଉଲ୍ଲେଖ କରିଛନ୍ତି। ଆର୍ଥିକ ସ୍ବଚ୍ଛଳ ହେବା ପରେ ମମତା ତାଙ୍କ ମା’ଙ୍କ ପାଇଁ କିଛି କରିବାକୁ ଚାହଁୁଛନ୍ତି। ସମ୍ଭବତଃ ଚଳିତ ମାସରେ ନିଜ ଜନ୍ମଦାତ୍ରୀ ମା’ଙ୍କୁ ଭେଟିବା ଲାଗି ମମତା ପୁରୀ ଆସିବେ। ତେଣୁ ତାଙ୍କ ମା’ ବାସନ୍ତୀଙ୍କ ସହିତ ଯୋଗାଯୋଗ କରିବାକୁ ପୁରୀ ଚାଇଲ୍ଡ ଲାଇନ ଉଦ୍ୟମ ଜାରି ରଖିଛି ବୋଲି ନିର୍ଦ୍ଦେଶକ ରଥ ସୂଚନା ଦେଇଛନ୍ତି। ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।
