ସୀତାପୁର, ୨୭।୮- ଉତ୍ତର ପ୍ରଦେଶର ସୀତାପୁର ଜିଲାରୁ ଚକିିତ କଲାଭଳି ଏକ ଘଟଣା ସାମ୍ନାକୁ ଆସିଛି। ୪୦ ଜଣ ବ୍ରାହ୍ମଣ ୧୧ ଦିନ ଧରି ଘରେ ପୂଜାପାଠ କରିବା ପରେ ଜଣେ ବ୍ୟକ୍ତି ତାଙ୍କୁ ଦକ୍ଷିଣା ବାବଦକୁ ୯ ଲକ୍ଷ ଟଙ୍କାର ନକଲି ନୋଟ୍ ପ୍ରଦାନ କରିଛନ୍ତି। ଏହି ଘଟଣାଟି ରାମପୁର ମଥୁରା ଥାନା ଅନ୍ତର୍ଗତ ମନକାପୁର ଗ୍ରାମରେ ଘଟିଛି। ଏହି ଗ୍ରାମର ହୁଲାସୀ ପାଠକ ଓ ତାଙ୍କ ସ୍ତ୍ରୀ ଗୀତା ଘରେ ଲକ୍ଷ୍ମୀ ସୂତ୍ର ଅନୁଷ୍ଠାନ ପୂଜା କରିଥିଲେ। ଏଥିଲାଗି ସେମାନେ ଅଯୋଦ୍ଧାରୁ ୪୦ ଜଣ ବ୍ରାହ୍ମଣଙ୍କୁ ଡାକି ଏହି ପୂଜା ଆୟୋଜିତ କରିଥିଲେ। ପ୍ରଥମେ ଏହି ପୂଜା ୯ ଦିନ ଚାଲିବା ପରେ ଏହାକୁ ଆଉ ୨ଦିନକୁ ବୃଦ୍ଧି କରାଯାଇଥିଲା। ଏହାପରେ ପୂଜା ଶେଷ ହେବାପରେ ବ୍ରାହ୍ମଣମାନେ ଦକ୍ଷିଣା ବାବଦକୁ ୯ ଲକ୍ଷ ୨ ହଜାର ଟଙ୍କା ମାଗିଥିଲେ। ଗୀତା ଏକ ପଲ୍ଥିନରେ ୯ ଲକ୍ଷ ୨ ହଜାର ଟଙ୍କା ଆଣି ବ୍ରାହ୍ମଣଙ୍କୁ ଦେଇଥିଲେ। ବ୍ରାହ୍ମଣମାନେ ଯେତେବେଳେ ପଲ୍ଥିନ ଖୋଲିଥିଲେ, ସମସ୍ତ ନୋଟ୍ ନକଲି ଥିବା ଜାଣିବାକୁ ପାଇଥିଲେ। ଏହାପରେ ସେମାନେ ଗୀତାଙ୍କୁ ଏନେଇ ପଚାରିବାରୁ ସେ ହଙ୍ଗାମା ଆରମ୍ଭ କରିଦେଇଥିଲେ ଏବଂ ପରେ ପରିବାରର ସମସ୍ତ ସଦସ୍ୟ ଫେରାର୍ ହୋଇଯାଇଥିଲେ। ସୂଚନା ପାଇ ସ୍ଥାନୀୟ ଥାନା ଅଧିକାରୀ ଘଟଣାସ୍ଥଳରେ ପହଞ୍ଚିବା ସହ ବ୍ରାହ୍ମଣମାନଙ୍କଠାରୁ ସମସ୍ତ ଘଟଣା ପଚାରି ବୁଝିଥିଲେ। ଏହାପରେ ପୋଲିସ ପଲଥିନ ଭର୍ତ୍ତି ନକଲି ନୋଟ୍ ଜବତ କରି ତଦନ୍ତ ଆରମ୍ଭ କରିଛନ୍ତି। ଗୀତା ଓ ତାଙ୍କ ସ୍ବାମୀ ଏତେ ପରିମାଣର ନକଲି ନୋଟ୍ କେଉଁଠାରୁ ଆଣିଲେ ତାହା ଏବେ ପୋଲିସ ପାଇଁ ଚିନ୍ତାର କାରଣ ପାଲଟିଛି।
